ខេត្តមណ្ឌលគិរី ៖ នៅថ្ងៃទី៧ មិថុនា ឆ្នាំ២០២០ មន្ត្រីឧទ្យានុរក្សដែនជម្រកសត្វព្រៃស្រែពកនៃមន្ទីរបរិស្ថានខេត្តមណ្ឌលគិរី សហការជាមួយអង្គការ WWF បានលែងសត្វឈ្លូសជំទង់ឈ្មោល១ក្បាលទៅក្នុងព្រៃធម្មជាតិវិញ បន្ទាប់ពីទទួលបានការថែទាំ និងសម្រាកព្យាបាលអស់រយៈពេល២ថ្ងៃដោយមន្ត្រីជំនាញពេទ្យសត្វ ខណៈសត្វឈ្លូស១ក្បាលនេះចុះខ្សោយកម្លាំងខ្លាំង និងការរងសម្ពាធដែលបណ្តាលឲ្យមានកម្រិតស្ត្រេសខ្ពស់ (myopathy)។
គួរបញ្ជាក់ថា សត្វឈ្លូស១ក្បាលនេះត្រូវបានប្រជាពលរដ្ឋរស់នៅក្នុងសហគមន៍តំបន់ការពារធម្មជាតិ ក្នុងភូមិសាស្ត្រឃុំពូជ្រៃ ស្រុកពេជ្រាដា ប្រទះឃើញមានសភាពខ្សោះកម្លាំងគួរឲ្យអាណិត ក៏បានទំនាក់ទំនងទៅមន្ត្រីឧទ្យានុរក្សដើម្បីសង្គ្រោះ និងថែទាំសុខភាព។ ផ្អែកតាមលទ្ធផលពិនិត្យ និងវិភាគរោគវិនិច្ឆ័យពីមន្ត្រីជំនាញពេទ្យសត្វបង្ហាញថា សត្វឈ្លូស១ក្បាលនេះខ្សោះជាតិទឹកខ្លាំង និងមានកម្រិតស្ត្រេសខ្ពស់ តែមិនមានរងរបួសអ្វីទេ។
ដូច្នេះ អ្នកជំនាញបានផ្តល់អាហារនិងទឹក ព្រមទាំងបានផ្តល់ការព្យាបាលចាំបាច់នានា ដោយការដានសុខភាព និងថែទាំបន្តជាប់ជាប្រចាំក្នុងរយៈពេល២ថ្ងៃ រហូតដល់អ្នកជំនាញបានបញ្ជាក់ថា សត្វឈ្លូស១ក្បាលនេះមានសុខភាពប្រសើរឡើងវិញ និងមានលទ្ធភាពអាចវិលត្រលប់ទៅក្នុងព្រៃវិញបាន ទើបមន្ត្រីឧទ្យានុរក្ស និងអ្នកជំនាញរបស់អង្គការ WWF បានយកវាទៅលែងចូលទៅកាន់ទីជម្រករបស់វាវិញ។
ចែករំលែកព័តមាននេះ