ខេត្តបាត់ដំបង ៖ មន្ត្រីនគរបាលយុត្តិធម៌ខេត្តបាត់ដំបងរួមជាមួយមន្ត្រីនៃមន្ទីរសាធារណការ និងដឹកជញ្ជូនខេត្តបានចាត់វិធានការលើករណីផ្លាកលេខក្លែងក្លាយមួយបំពាក់លើរថយន្ត ដោយដាក់ឈ្មោះផ្លាក«បាត់ដំបង វត្តម្លប់ពោធិ៍ព្រឹក្ស» ។
អាជ្ញាធរពាក់ព័ន្ធបានចាត់វិធានការដោយ ចុះដកហូតនិងតម្រូវឱ្យ ម្ចាស់ធ្វើកិច្ចសន្យា ។ នេះបើតាមព័ត៌មានពីផេកក្រសួងសាធារណការនិងដឹកជញ្ជួនចុះថ្ងៃទី ០៧ ខែមិថុនា ឆ្នាំ ២០២០ ។ យោងតាមកំណត់ហេតុស្តាប់ចម្លើយ បានឲ្យដឹងថារថយន្តដែពាក់ផ្លាកលេខក្លែងក្លាយ «បាត់ដំបង វត្តម្លប់ពោធិ៍ព្រឹក្ស» គឺជាកម្មសិទ្ធរបស់ព្រះតេជគុណ ដាំ សុទិត្យ ជាចៅអធិការវត្តម្លប់ពោធិ៍ព្រឹក្ស ស្ថិតនៅភូមិអូរតាគី ស្រុកថ្មគោល ខេត្តបាត់ដំបង ។
ព្រះតេជគុណ ដាំ សុទិត្យ ជាចៅអធិការវត្តម្លប់ពោធិ៍ព្រឹក្សបានមានសង្ឃដីកាបំភ្លឺថា ព្រះតេជគុណបានទិញរថយន្តមួយគ្រឿងម៉ាក Toyota Vigo សេរីឆ្នាំ ២០០៥ ពណ៌ទឹកប្រាក់ «គ្មានពន្ធ» កាលពីថ្ងៃទី ១៦ មករា ឆ្នាំ២០១៩ នៅហាងបាត់ដំបង ក្រោយពីជាវបានប្រហែល២ខែព្រះអង្គក៏បំពាក់ផ្លាកលេខ ក្លែងក្លាយ «បាត់ដំបង វត្តម្លប់ពោធិ៍ព្រឹក្ស» ដើម្បីសម្គាល់ជារថយន្តរបស់វត្ត ។
យ៉ាងណាមិញ សមត្ថកិច្ចកាលពីថ្ងៃទី៧ មិថុនាបានចុះទៅដល់វត្ត «ដើម្បីដកហូតផ្លាកលេខមិនប្រក្រតី បញ្ឈប់មិនអោយប្រើប្រាស់បន្ត ។ ចំណែករថយន្តបានរក្សាទុកនៅក្នុងវត្តម្លប់ពោធិ៍ព្រឹក្សដដែល» ។
យោងតាមលិខិតបំភ្លឺដដែលបានបញ្ជាក់ថា «សមត្ថកិច្ចបានណែនាំ មិនអនុញ្ញាតអោយរថយន្តខាងលើធ្វើចរាចរណ៍ដោយគ្មានផ្លាកលេខ សំគាល់ត្រឹមត្រូវតាមច្បាប់ដែលបានកំណត់ធ្វើចរាចរណ៍ នៅលើផ្លូវសាធារណៈឡើយ» ។
ប្រភពដដែលបានបញ្ជាក់ថា ព្រមជាមួយគ្នានោះសមត្ថកិច្ចបានបញ្ជាក់ថាគ្រប់ផ្លាកសម្គាល់យានយន្ត ទាំងអស់ត្រូវមានទម្រង់ ដែលអនុលោមតាម អនុក្រឹត្យ លេខ ៧៣ អនក្រ.បក ស្តីពី ការចុះបញ្ជីផ្តល់ប័ណ្ណសម្គាល់យានជំនិះ និងបំពាក់ផ្លាកលេខសម្គាល់យានជំនិះ ចុះថ្ងៃទី ៣ ខែ មិថុនា ឆ្នាំ ២០១៩។
ម្ចាស់រថយន្តដែលមានផ្លាកលេខទម្រង់មិនត្រឹមត្រូវ ឬផ្ទុយពី ស្មារតីអនុក្រឹត្យខាងលើ ត្រូវដកចេញជាបន្ទាន់ រួចត្រូវទៅធ្វើការចុះបញ្ជីបំពាក់ផ្លាកលេខស្របច្បាប់ ឱ្យបានត្រឹមត្រូវ បើមិនដូច្នោះទេ ក្រសួង និងសមត្ថកិច្ចពាក់ព័ន្ធ នឹងចាត់វិធានការតាមផ្លូវច្បាប់ និងមិនអនុញ្ញាតធ្វើចរាចរណ៍លើផ្លូវសាធារណៈបានឡើយ ៕
ចែករំលែកព័តមាននេះ