រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរស២នាក់មកពីកោះពេជ្រជិះម៉ូតូទៅលេងវត្តភ្នំ ក៏ត្រូវស្ត្រីរកស៊ីផ្លូវភេទ៣នាក់ ប្រើល្បិចមកបន្លំលួចកាបូបលុយ និងទូរស័ព្ទយកទៅបាត់ ហើយក៏មានបុរសម្នាក់ទៀតជិះម៉ូតូមកដល់រួចយកសោច្រវ៉ាក់វាយជនរងគ្រោះបែកក្បាលហូរឈាម បណ្តាលឱ្យរងរបួសធ្ងន់តែម្តង ក្រោយមកក៏ត្រូវសមត្ថកិច្ចឃាត់ខ្លួនបានម្នាក់ បង្កឱ្យមានការភ្ញាក់ផ្អើលកាលពីម៉ោង9យប់ ថ្ងៃទី7 ខែមិថុនា ឆ្នាំ2020 តាមបណ្តាយផ្លូវ94កែងផ្លូវ13 នៅចំណុចដើមពូលទន្លេសាប ស្ថិតក្នុងភូមិ11 សង្កាត់ស្រះចក ខណ្ឌដូនពេញ ។
សេចក្តីរាយការណ៍បន្តថា ជនរងគ្រោះខាងលើឈ្មោះ ឆុន ឆើត ភេទប្រុស អាយុ25ឆ្នាំ មុខរបរធ្វើការសំណង់ មានស្រុកកំណើតនៅភូមិទួលវិហារមានជ័យ ឃុំក ស្រុកត្បូងឃ្មុំ ខេត្តត្បូងឃ្មុំ រីឯជនរងគ្រោះដែលរងបួសបែកក្បាលឈ្មោះ ហោ វិសាល ភេទប្រុស អាយុ29ឆ្នាំ ស្នាក់នៅភូមិវាលបំពង់ ឃុំខ្ពកតាងួន ស្រុកស្ទឹងត្រង់ ខេត្តកំពង់ចាម ។ ចំណែកបុរសដែលវាយគេនោះ ឈ្មោះ ហេង អ៊ិន ភេទប្រុស អាយុ41ឆ្នាំ មានមុខរបរអ្នករត់ម៉ូតូ ស្នាក់នៅម្តុំអូឌឹម សង្កាត់កំបូល ខណ្ឌកំបូល។
តាមប្រភពពីជនរងគ្រោះបានឱ្យដឹងថា មុនពេលកើតហេតុ គឺរូបខ្លួនជាមួយនឹងមិត្តភក្តិចេញមកពីធ្វើការសំណង់ រួចក៏ជិះម៉ូតូមួយគ្រឿងម៉ាកហុងដាវ៉េវ ពណ៌ខ្មៅ ពាក់ស្លាកលេខកំពង់ធំ 1H7458 ដោយជិះឌុបគ្នាមកពីមជ្ឍមណ្ឌលកោះពេជ្រ ក្នុងគោលបំណងទៅវត្តភ្នំជិះដើរលេង លុះបានមួយសន្ទុះក្រោយមកក៏ស្រាប់តែមានស្រីៗ៣នាក់មិនស្គាល់អត្តសញ្ញាណនោះទេ បានមកកាត់ពីមុខម៉ូតូរបស់ខ្លួន ។
ជនរងគ្រោះបន្តថា ខណៈនោះមានស្ត្រីម្នាក់បានឡើងជិះពីក្រោយ ចំណែកឯម្នាក់ទៀតបានកាកពីជំហៀង រួចនិយាយថាចង់បបួលជនរងគ្រោះ២នាក់ទៅដេកជាមួយ ក៏ប៉ុន្តែជនរងគ្រោះថា អត់មានលុយ ក៏និយាយថា អត់ទៅទេ ។ ភ្លាមៗនោះដែរ ជនរងគ្រោះភ្លេចខ្លួនមួយភ្លែតសោះ ស្រាប់តែបាត់សម្ភារៈមួយចំនួនដូចជា កាបូបលុយមានលុយ40$ និងលុយខ្មែរចំនួន4ម៉ឺនរៀល ថែមទាំងអត្តសញ្ញាណប័ណ្ណមួយសន្លឹក និងទូរស័ព្ទដៃមួយគ្រឿងទៀត ចំណែកនារីទាំង៣នាក់ដែលជាជនសង្ស័យនោះបាននាំគ្នារត់គេចខ្លួនអស់ទៅ។
ជនរងគ្រោះបន្តទៀតថា លុះមួយសន្ទុះក្រោយមកទៀត ក៏មានបុរសម្នាក់ឈ្មោះហេង អ៊ិន ជាអ្នករត់ម៉ូតូ ជិះម៉ូតូមួយគ្រឿងម៉ាកហុងដាឌ្រី ពណ៌ខ្មៅ សេរី2014 ពាក់ស្លាក់លេខភ្នំពេញ1CO1840 បើកមកដល់ជិតជនរងគ្រោះ ហើយក៏យកខ្សែច្រវ៉ាក់ទៅវាយក្បាលជនរងគ្រោះឈ្មោះហោ វិសាលតែម្តង បណ្តាលឱ្យបែកក្បាលហូរឈាមស្រោចពេញខ្លួន ។ ក្រោយមកជនរងគ្រោះក៏ស្រែកថា «ចោរៗប្លន់យកទូរស័ព្ទដៃ និងកាបូបលុយ» បន្ទាប់ពីឮបែបនេះ បុរសជាជនសង្ស័យដែលវាយជនរងគ្រោះនោះក៏ជិះម៉ូតូចង់រត់គេចខ្លួន ប៉ុន្តែត្រូវបានសមត្ថកិច្ចធ្វើការឃាត់ខ្លួនបាន យកមកសួរនាំនៅប៉ុស្តិ៍ស្រះចកតែម្តង។
ក្រោយពេលកើតហេតុខាងលើនេះ ជនរងគ្រោះបានទៅដាក់ពាក្យបណ្តឹងនៅឯប៉ុស្តិ៍ស្រះចក ដើម្បីឱ្យសមត្ថកិច្ចធ្វើតាមនីតិវិធី ចំណែកឯបក្សពួកដែលសេសសល់កម្លាំងជំនាញប៉ុស្តិ៍ និងព្រហ្មទណ្ឌខណ្ឌដូនពេញ នឹងតាមស្រាវជ្រាវជាបន្តទៅទៀត ៕ (កែសម្រួលដោយ ៖ បុប្ផា)
ចែករំលែកព័តមាននេះ