ប្រទេសចិន ៖ សមាគមបាល់ទាត់ចិន (CFA) បានប្រកាសកាលពីថ្ងៃសៅរ៍ថាកីឡាករចំនួន ៦ នាក់នៃក្រុមជម្រើសជាតិបុរសអាយុក្រោម ១៩ឆ្នាំ (U-19) ត្រូវទទួលរងទណ្ឌកម្មមិនឱ្យពាក់ព័ន្ធបាល់ទាត់រយៈពេល ៦ខែ បន្ទាប់ពីពួកគេបានរំលោភបទបញ្ជា អំឡុងពេលស្ថិតក្នុងជំរំហ្វឹកហាត់ ។
សូមជម្រាបជូនថា ក្រុម U19 បានកោះហៅកីឡាករចំនួន ៣៥នាក់ប្រមូលផ្តុំហ្វឹកហាត់នៅទីក្រុងសៀងហៃ ដោយបិទទ្វារចាប់ពីថ្ងៃទី១៧ ខែឧសភា ដល់ថ្ងៃទី៦ ខែមិថុនា ។ អំឡុងពេលនោះ សមាជិក ៦នាក់បានចាកចេញពីមូលដ្ឋានហ្វឹកហាត់របស់ក្រុម ដោយគ្មានការអនុញ្ញាតនៅកណ្តាលអធ្រាត្រថ្ងៃទី៣០ ខែឧសភា ព្រមទាំងបានសេពគ្រឿងស្រវឹងផងដែរ។
អង្គភាពគ្រប់គ្រងបាល់ទាត់របស់ប្រទេសចិន បានកត់សម្គាល់ថា «វាជាការរំលោភយ៉ាងធ្ងន់ធ្ងរទៅលើបទបញ្ជា ដែលវាមានផលប៉ះពាល់ និងជាគំរូមិនល្អដល់ក្រុមទាំងមូល ។ កីឡាករទាំង ៦នាក់នឹងត្រូវបានហាមឃាត់រាល់ការប្រកួត ឬសកម្មភាពពាក់ព័ន្ធបាល់ទាត់ទាំងអស់ ចាប់ពីថ្ងៃទី១ ខែមិថុនា ដល់ថ្ងៃទី៣០ ខែវិច្ឆិកា ឆ្នាំ២០២០។
CFA ក៏បានបញ្ជាក់ផងដែរថា កីឡាករទាំងនោះនឹងមិនត្រូវបានអនុញ្ញាតឱ្យចូលរួមជាមួយក្រុមជម្រើសជាតិ ហើយពួកគេនឹងត្រូវប្រឈមនឹងការដាក់ទណ្ឌកម្មបន្ថែមទៀតពីក្លិប ដែលពួកគេកំពុងប្រកបអាជីព។
គ្រូបង្វឹកលោក Cheng Yaodong ក៏បានមានប្រសាសន៍ថា «វាគឺជាការបាត់បង់សម្រាប់ក្រុម ហើយពិតណាស់វានឹងជះឥទ្ធិពលកាន់តែខ្លាំង ទៅលើកីឡាករខ្លួនឯង ។ ក្រុមជម្រើសជាតិ U-19 និងក្លិបរបស់ពួកគេទាំងអស់ មានទំនួលខុសត្រូវចំពោះការអប់រំពួកគេ។ ហើយយើងគួរតែរៀនពីមេរៀនមួយនេះ»។
សូមបញ្ជាក់ថា ជុំវិញបញ្ហានេះ CFA ពុំបានធ្វើការបង្ហាញអំពីអត្តសញ្ញាណ របស់កីឡាករទាំង ៦នាក់ដែលបានសាងកំហុសខ្លាំងខាងលើនោះទេ៕ (ដកស្រង់ចេញពី CGTN)
ចែករំលែកព័តមាននេះ