កូវីដ-១៩ ៖ សម្តេចតេជោ ហ៊ុន សែន នៅថ្ងៃទី៧ មិថុនានេះ បានរំលឹកពលរដ្ឋឲ្យចូលរួមទប់ស្កាត់ជំងឺឆ្លងរលាកផ្លូវដង្ហើមកូវីដ-១៩នៅកម្ពុជា។ ចំណែកអ្នកជំនាញផ្តល់យោបល់ថា ការរៀបការ…
កូវីដ-១៩ ៖ សម្តេចតេជោ ហ៊ុន សែន នៅថ្ងៃទី៧ មិថុនានេះ បានរំលឹកពលរដ្ឋឲ្យចូលរួមទប់ស្កាត់ជំងឺឆ្លងរលាកផ្លូវដង្ហើមកូវីដ-១៩នៅកម្ពុជា។ ចំណែកអ្នកជំនាញផ្តល់យោបល់ថា ការរៀបការ ការជប់លៀង ឬក៏ការចាក់ធុង បាសរាំជាដើម ត្រូវបន្តពន្យាល ពេលទៀត ដោយសារតែស្ថានភាពកូវីដ-១៩ នៅបន្តគំរាមកំហែងកម្ពុជា និងពិភពលោក។ សម្តេចបានលើក ឡើងថា នៅថ្ងៃចុងសប្តាហ៍បែបនេះ គឺមានប្រជាពលរដ្ឋមួយចំនួនធ្វើដំណើរកម្សាន្ត និងមានកម្មវិធីជួបជុំគ្នា ដូច្នេះកុំភ្លេចពាក់ម៉ាស មានអាល់កុលលាងដៃ ក្នុងការការពារខ្លួនកុំឆ្លងកូវីដ-១៩ ដែលមិនមានថ្នាំព្យាបាលនេះ។
សម្តេចតេជោ ហ៊ុន សែន បានលើកឡើងនៅក្នុងបណ្តាញទំនាក់ទំនងសង្គមសម្តេច ដូច្នេះថា «នៅថ្ងៃចុងសប្តាហ៍ដែលអាចមានបងប្អូនប្រជាពលរដ្ឋមួយចំនួនធ្វើដំណើរកម្សាន្តនៅតាម តំបន់រមណីយដ្ឋាន នានាដែលអាចជួបជុំក្រុមមនុស្សច្រើន ហើយមានក្រុមគ្រួសារខ្លះនាំកូនចៅទៅទទួលទានអាហារនៅតាម ភោជនីយដ្ឋាន និងដើរកម្សាន្តនៅតាមផ្សារទំនើបតូចធំជាដើម។ នៅតាមផ្សារ ភោជនីយដ្ឋាន ជាពិសេសមន្ទីរពេទ្យ ត្រូវមានម៉ាស និងមានទឹកអាល់កុល ឬជែលប្រើប្រាស់ឲ្យបានត្រឹមត្រូវ និងគ្រប់គ្រាន់ ដើម្បីទប់ស្កាត់ការការឆ្លងរោគ»។
នៅថ្ងៃទី៧ មិថុនានេះ ក្រសួងសុខាភិបាកម្ពុជាបានប្រកាសពីការរកឃើញ ករណីវិជ្ជមាន ថ្មីមួយទៀតនៅកម្ពុជា ដែលធ្វើឲ្យចំនួនអ្នកកើតជំងឺកូវីដ-១៩កើនដល់១២៦នាក់ ប៉ុន្តែមានតែ៣នាក់ប៉ុណ្ណោះ ដែលកំពុងសម្រាកព្យាបាល ១២៣នាក់បានជាសះស្បើយ។ ទាំងថ្នាក់ដឹកនាំ មន្ត្រីសុខាភិបាល បានព្រមានពីករណីរលកទី២នឹងអាចមានប្រសិនប្រជាពលរដ្ឋមិនបានយកចិត្តទុកដាក់ បន្តអនុវត្តវិធានការការពារ ដូចជាពាក់ម៉ាស មិនចេញក្រៅផ្ទះបើមិនចាំបាច់ ឬត្រូវឧស្សាហ៍លាងសម្អាតដៃ ជាដើមនោះ។
សម្តេចនាយករដ្ឋមន្ត្រីបានរំលឹកពលរដ្ឋថា «កុំធ្វេសប្រហែសឲ្យសោះ ឬគិតលេងៗថា មិនអីទេ ប្រទេសយើងមិនឆ្លងទេ នោះគឺកំពុងប្រថុយនឹងគ្រោះថ្នាក់ធំហើយ។ ជំងឺកូវីដ-១៩ ដ៏កាចសាហាវនេះ កំពុងឆ្លងរាតត្បាតនៅពាសពេញពិភពលោក ដែលមិនទាន់មានថ្នាំព្យាបាលនៅឡើយទេ។ ដូច្នេះគ្រប់គ្នាត្រូវប្រុងប្រយ័ត្នការពារសុខភាព»។ ចំណែកនាយកដ្ឋានប្រយុទ្ធជំងឺឆ្លងរបស់កម្ពុជាវិញ បានទទូចឲ្យពលរដ្ឋបន្តប្រុងប្រយ័ត្នជាប់ជានិច្ច ដោយធ្វើអនាម័យជាប្រចាំ នៅឃ្លាតឆ្ងាយពីគ្នា និងមិនគួរចេញក្រៅផ្ទះបើមិនចាំបាច់។ នាយកដ្ឋានដែលមានលោក លី សូវ៉ាន់ ជាប្រធាននោះ បានបញ្ជាក់ថា «ប្រទេសជិតខាងយើង និងពិភពលោកកំពុងបន្តរាតត្បាតជំងឺកូវីដ-១៩ ដ៏ខ្លាំងក្លានៅឡើយ។ យើងត្រូវបន្តអនុវត្តគម្លាតសង្គមបន្តទៀត ដូចជាពន្យាការរៀបអាពាហ៍ពិពាហ៍ ពិធីជប់លៀង ការចាក់ធុងបាសរាំ ដើម»៕ ដោយ ៖ អ. សួស្តី
ចែករំលែកព័តមាននេះ