រាជធានីភ្នំពេញ ៖ បុរសជនជាតិចិនម្នាក់ សម្ងំផលិតគ្រឿងញៀននៅក្នុងបន្ទប់ ត្រូវបានកម្លាំងមានសមត្ថកិច្ច របស់មន្ទីរប្រឆាំងគ្រឿងញៀននៃក្រសួងមហាផ្ទៃ សហការជាមួយកម្លាំងអធិការដ្ឋាននគរបាលខណ្ឌបឹងកេងកង ធ្វើការចាប់ឃាត់ខ្លួនពីបទផលិតកែច្នៃដោយខុសច្បាប់នូវសារធាតុញៀន ។ ប្រតិបត្តការបង្ក្រាបនេះដែរ…
រាជធានីភ្នំពេញ ៖ បុរសជនជាតិចិនម្នាក់ សម្ងំផលិតគ្រឿងញៀននៅក្នុងបន្ទប់ ត្រូវបានកម្លាំងមានសមត្ថកិច្ច របស់មន្ទីរប្រឆាំងគ្រឿងញៀននៃក្រសួងមហាផ្ទៃ សហការជាមួយកម្លាំងអធិការដ្ឋាននគរបាលខណ្ឌបឹងកេងកង ធ្វើការចាប់ឃាត់ខ្លួនពីបទផលិតកែច្នៃដោយខុសច្បាប់នូវសារធាតុញៀន ។
ប្រតិបត្តការបង្ក្រាបនេះដែរ បានធ្វើឡើង កាលពីវេលាម៉ោង៩ និង១៥នាទីព្រឹក ថ្ងៃទី៦ មិថុនា ឆ្នាំ២០២០ នៅចំណុចបន្ទប់លេខB ២០១ ជាន់ទី២ អគារខុនដូ សោភា ផ្លូវលេខ ៣៥២ ក្នុងសង្កាត់បឹងកេងកងទី១ ខណ្ឌបឹងករងកង ។
តាមប្រភពព័ត៌មានបានប្រាប់ឱ្យដឹងថា ដោយកម្លាំងនគរបាលមន្ទីរប្រឆាំងគ្រឿងញៀន (ក១០) នៃក្រសួងមហាផ្ទៃ និងអាជ្ញាធរប្រយុទ្ធប្រឆាំងគ្រឿងញៀន បានសហជាមួយនគរបាលកំលាំងផែ្នកប្រឆាំងគ្រឿងញៀន នៃអធិការដ្ឋាននគរបាលខណ្ឌបឹងកេងកង រាជធានីភ្នំពេញ ដឹកនាំដោយលោកឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀន និងលោកឧត្តមសេនីយ៍ទោ ហ៊ួត ចាន់យ៉ារ៉ាន់ ស្នងការរងទទួលផែនគ្រឿងញៀន នៃស្នងការដ្ឋាននគរបាលរាជធានីភ្នំពេញ លោកឧត្តមសេនីយ៍ទោ សារី បុត្រសត្យា នាយករងមន្ទីរប្រឆាំងគ្រឿងញៀន និងលោកវរសេនីយ៍ឯក តឹក សូនី នាយការិយាល័យ (ក១០) ដោយមានការសម្របសម្រួលពីលោក គុជ គឹមឡុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ និងលោក ផាន់ ពិសិដ្ឋ ក្រឡាបញ្ចីចូលរួម បានចុះឆែកឆេរ និងត្រួតពិនិត្យបន្ទប់លេខB២០១ ជាន់ទី២ ក្នុងអាគារខុនដូរ សោភា ផ្លូវលេខ៣៥២ ក្រុមទី៦២ ភូមិ៨ សង្កាត់បឹងកេងកងទី១ ខណ្ឌបឹងកេងកង ខាងលើនេះ ។
ជាលទ្ធផលកម្លាំងរបស់លោកឃាត់ខ្លួនបានជនសង្ស័យឈ្មោះ ហ៊ី យីរី (HE YIRI) ភេទប្រុស អាយុ៥៦ឆ្នាំ ជនជាតិចិន មុខរបរមិនពិតប្រាកដ ។ ដកហូតវត្ថុតាងរួមមាន៖ ១- MDMA គ្រាប់១ថង់តូច ២-ថ្នាំគ្រាប់ (WY) ១ថង់តូច ៣-មេតំហ្វេមីន (ICE) ១ថង់តូច ៤-ហេរ៉ូអ៊ីនម្ស៉ៅ១ថង់តូច ៥-ក្រាមកេតាមីនក្នុងកែវចំនួន១ ៦-សារធាតុរាវ មេតំហ្វេតាមីនចំនួន១ដប ៧-CLONAZOLAMចំនួន១ថង់តូច ៨- MDP2P ចំនួន០២ថង់។
៩- METHY LAMINE HCL ចំនួន១ថង់ ១០- អាស៊ីតស៊ុលផ្លរិច ចំនួន១ដប ១១- ETHYL ACETATE ចំនួន១ដប ១២- ACETONE ចំនួន១៥ដប ១៣- METHANOL ចំនួន១៦ដប ១៤- TOLUENE ចំនួន៩ដប ១៥- MAGNESIUM SULFATE ANHYDROUS ចំនួន១០ដប ១៦- SODIUM CYANOBROHYDRIDE ចំនួន៤ដប ១៧- អាស៊ីត ចំនួន២ធុង ១៨- ឧបករណ៍សម្ភារៈសារធាតុគីមី សារធាតុគីមីផ្សំមួយចំនួនធំ រួមជាមួយម៉ាស៊ីនសម្រាប់ផលិតកែច្នៃមួយចំនួន ។
បច្ចុប្បន្នជនសង្ស័យខាងលើ ត្រូវបានបញ្ចូនទៅមន្ទីរប្រឆាំងគ្រឿងញៀន (ក១០) នៃក្រសួងមហាផៃ្ទ ដើម្បីគ្រប់គ្រង និងចាត់ការបន្តតាមនីតិវិធី វត្ថុតាងខាងលើបញ្ចូនទៅអាជ្ញាធរប្រយុទ្ធប្រឆាំងគ្រឿងញៀន ។ ចំណែកវត្ថុតាងមួយចំនួនដែលនៅសេសសល់ ត្រូវបានរក្សាទុកនៅក្នុងបន្ទប់ខាងលើ ដោយបិទឃ្លុំបេជាបណ្តោះអាសន្ន ៕ (កែសម្រួលដោយ ៖ បុប្ផា)
ចែករំលែកព័តមាននេះ