ប្រទេសវៀតណាម ៖ តាមប្រភពព័ត៌មាន The Star បានឱ្យដឹងថា ឧបករណ៍ធ្វើតេស្តកូវីដ១៩ ដែលត្រូវបានបង្កើតឡើងដោយអ្នកស្រាវជ្រាវនៃសាកលវិទ្យាល័យវិទ្យាសាស្ត្រ និងបច្ចេកវិទ្យាហាណូយ ត្រូវបានផ្តល់វិញ្ញាបនប័ត្រអនុញ្ញាតឱ្យលក់នៅក្នុងទីផ្សារអឺរ៉ុប។…
ប្រទេសវៀតណាម ៖ តាមប្រភពព័ត៌មាន The Star បានឱ្យដឹងថា ឧបករណ៍ធ្វើតេស្តកូវីដ១៩ ដែលត្រូវបានបង្កើតឡើងដោយអ្នកស្រាវជ្រាវនៃសាកលវិទ្យាល័យវិទ្យាសាស្ត្រ និងបច្ចេកវិទ្យាហាណូយ ត្រូវបានផ្តល់វិញ្ញាបនប័ត្រអនុញ្ញាតឱ្យលក់នៅក្នុងទីផ្សារអឺរ៉ុប។
យោងតាមសាកលវិទ្យាល័យហាណូយ បានឱ្យដឹងថា ឧបករណ៍តេស្តនេះ គឺជាឧបករណ៍ដំបូងគេមួយនៅលើពិភពលោក ដែលប្រើប្រាស់បច្ចេកវិទ្យា RT-LAMP ដើម្បីរកវីរុស SARS-CoV-2 ដែលបណ្តាលឱ្យមានជំងឺកូវីដ១៩។
ដឹកនាំដោយវេជ្ជបណ្ឌិត Le Quang Hao សាស្ត្រាចារ្យសាលាជីវវិទ្យាវិទ្យាសាស្ត្រ និងបច្ចេកវិទ្យាចំណីអាហាររបស់សាកលវិទ្យាល័យ និងវេជ្ជបណ្ឌិត Nguyen Le Thu Ha មកពីក្រុមហ៊ុនវិទ្យាសាស្ត្រ និងបច្ចេកវិទ្យាអន្តរជាតិ Innogenex International Science and Technology ស្រាវជ្រាវបានរកឃើញបច្ចេកវិទ្យានេះ ដែលអាចប្រើប្រាស់រកវត្តមានរបស់វីរុសណូវែលកូរ៉ូណាបាន។
លទ្ធផលតេស្តអាចត្រូវបានគេមើលឃើញដោយភ្នែកទទេ ដោយសារការផ្លាស់ប្តូរពណ៌នៃសារធាតុគីមីដែលចង្អុលបង្ហាញ។ បច្ចេកវិទ្យា RT-LAMP អាចបង្កើតលទ្ធផលក្នុងរយៈពេល ៣០នាទី ខណៈពេលដែលឧបករណ៍សាកល្បង RT-PCR ដែលត្រូវបានបង្កើតឡើងដោយអ្នកស្រាវជ្រាវជនជាតិវៀតណាមផ្សេងទៀត ត្រូវការរយៈពេលប្រហែល ១២០នាទី។ តេស្តនេះមិនមានការច្រលំជាមួយនឹងវត្តមានរបស់វីរុសផ្សេងៗដូចជា MERS-CoV, HKU4, HKU1, OC43 ឬ 229E ដែលបង្កឱ្យមានជំងឺផ្សេងៗឡើយ។
លោកវេជ្ជបណ្ឌិត Hoa បាននិយាយថា នៅក្នុងក្របខ័ណ្ឌនៃការសិក្សារបស់ក្រសួងសុខាភិបាលប្រទេសវៀតណាម ក្រុមរបស់លោក និងក្រុមហ៊ុនភាគហ៊ុនសៅថៃឌុង បានផលិតនូវផលិតផលជីវសាស្ត្រចំនួនពីរប្រភេទនៃ RT-LAMP រកកូវីដ១៩។
ឧបករណ៍សាកល្បងជំនាន់ទី១ ត្រូវបានអនុញ្ញាតិដោយរដ្ឋមន្ត្រីក្រសួងសុខាភិបាលសម្រាប់ការធ្វើចរាចរបណ្តោះអាសន្ន។ ដូច្នេះវាអាចត្រូវបានប្រើសម្រាប់ធ្វើតេស្តនៅវិទ្យាស្ថានអនាម័យ និងរោគរាតត្បាត។ ឧបករណ៍ធ្វើតេស្តដំណើរការគ្រប់ករណីទាំងអស់និងបង្កើតលទ្ធផលពិតប្រាកដ។
លោកវេជ្ជបណ្ឌិតហូបានមានប្រសាសន៍ថា ជំនាន់ទី២ ត្រូវបានបង្កើតឡើង ដោយមានការថយចុះនូវវត្ថុធាតុដើមនាំចូល និងប្រើប្រាស់ប្រហាក់ប្រហែលក្នុងស្រុក។ លោកបានបន្ថែមថា ឧបករណ៍ជំនាន់ទី២ បានទទួលវិញ្ញាបនប័ត្រ CE-IVD ដែលអនុញ្ញាតឱ្យចែកចាយទូទាំងទ្វីបអឺរ៉ុប នៅថ្ងៃទី២៥ ឧសភា៕ ដកស្រង់ចេញពីវេបសាយ ៖ thestar (កែសម្រួលដោយ ៖ បុប្ផា)
ចែករំលែកព័តមាននេះ