ប្រទេសចិន ៖ តាមប្រភពព័ត៌មាន CNN បានឱ្យដឹងថា ប្រទេសចិនបានចេញការព្រមានថ្មីមួយទៅកាន់ពលរដ្ឋរបស់ខ្លួន ប្រឆាំងនឹងការធ្វើដំណើរទៅកាន់ប្រទេសអូស្ត្រាលី កាលពីថ្ងៃសុក្រ ដោយលើកឡើងពីការរើសអើងជាតិសាសន៍ប្រឆាំងនឹងប្រជាជនចិន និងអាស៊ីនៅទីនោះ។
សេចក្តីថ្លែងការណ៍របស់ក្រសួងវប្បធម៌ និងទេសចរណ៍ចិនបានសរសេរថា៖ «ថ្មីៗនេះដោយសារតែផលប៉ះពាល់នៃការឆ្លងរាតត្បាតជំងឺកូវីដ១៩ ការរើសអើងជាតិសាសន៍ និងអំពើហិង្សាប្រឆាំងនឹងជនជាតិចិន និងអាស៊ី នៅក្នុងប្រទេសអូស្ត្រាលី បានកើនឡើងគួរឱ្យកត់សម្គាល់។ ក្រសួងវប្បធម៌ និងទេសចរណ៍ ក្រើនរំលឹកភ្ញៀវទេសចរចិន ឱ្យបង្កើនការយល់ដឹងអំពីសុវត្ថិភាពរបស់ពួកគេ និងកុំធ្វើដំណើរទៅអូស្ត្រាលី»។
ទូរទស្សន៍ ABC របស់អូស្ត្រាលី បាននិយាយថា រដ្ឋមន្ត្រីក្រសួងទេសចរណ៍របស់ប្រទេសខ្លួន លោក Simon Birmingham បានច្រានចោលការព្រមាននេះ។
ABC បានដកស្រង់សម្តីរបស់ លោករដ្ឋមន្ត្រី Birmingham ដោយនិយាយថា៖ «អូស្ត្រាលីគឺជាប្រទេសមានវប្បធម៌ចម្រុះ និង សម្បូរអ្នកមកពីក្រៅស្រុក។ សហគមន៍អូស្ត្រាលីចិន គឺជាអ្នកចូលរួមចំណែកដ៏សំខាន់និងមានតម្លៃចំពោះភាពជោគជ័យរបស់ប្រទេស»៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ