រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា មានការការភ្ញាក់ផ្អើលមួយបានកើតឡើង បន្ទាប់ពីបុរសម្នាក់បានប្រទះឃើញសត្វក្រពើ២ក្បាលនៅក្នុងស្រះទឹកវត្តទួលសុភាឃួន ដែលគេសង្ស័យថា មានជនមិនស្គាល់អត្តសញ្ញាយកក្រពើនោះទៅលែងចោល ប៉ុន្តែពុំដឹងថា មានបំណងអ្វីនោះឡើយ។ ហេតុការណ៍នោះបង្កឲ្យមានការភ្ញាក់ផ្អើលរយៈពេលជិត២អាទិត្យកន្លងមកហើយ គឺនៅក្នុងថ្ងៃទី២៥ ខែឧសភា ឆ្នាំ២០២០ នៅក្នុងវត្តទួលសុភាឃួន ស្ថិតនៅក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ លុះរហូតដល់ល្ងាចថ្ងៃទី៦ ខែមិថុនានេះ នៅមិនទាន់ស្ទូចយកក្រពើនោះចេញបាននៅឡើយទេ។
បើតាមអ្នកភូមិបាននិយាយថា តាំងពីរាប់សិបឆ្នាំកន្លងមកហើយ នៅក្នុងស្រះទឹកវត្តទួលសុភាឃួននេះ ពុំដែលមានសត្វក្រពើនោះទេ ទើបតែពេលនេះស្រាប់តែប្រទះឃើញគួរឲ្យភ្ញាក់ផ្អើលបែបនេះ ដែលគេសង្ស័យថា មានជនមិនស្គាល់មុខយកទៅលែងចោល នៅពេលស្ងាត់ណាមួយ។ ប៉ុន្តែពុំដឹងថា ជននោះមានគោលបំណងអ្វីមួយឡើយ ទើបបានជាយកសត្វក្រពើដែលជាសត្វកាចសាហាវទៅលែងចោលនៅស្រះទឹកក្នុងវត្តខាងលើ បង្កការភ័យខ្លាចដល់ព្រះសង្ឃ និងពុទ្ធបរិស័ទចំណុះជើងវត្តផងដែរ។
អ្នកភូមិនិយាយថា ពេលនេះក្រពើនៅតូចៗមិនទាន់ធំនៅឡើយ ហើយពួកគាត់កំពុងមានការព្រួយបារម្ភថា បើចាប់មិនបានពេលនេះទេ នៅពេលណាដែលក្រពើ២ក្បាលនោះកាន់តែធំទៅៗនោះ និងបង្កគ្រោះដល់ជីវិតមនុស្សជាក់ជាមិនខានឡើយ ។ ហើយក៏សំណូមពរដល់អាជ្ញាធរជួយចាត់វិធានការលើរឿងនេះផង។
ប្រភពដដែលបន្តទៀតថា ក្រពើនោះ១ក្បាលទំហំប៉ុនកំភួនដៃមនុស្សចាស់ និង១ក្បាលទៀតទំហំប៉ុនភ្លៅមនុស្សចាស់ ហើយតែងតែហែលទឹកបណ្ដែតបង្ហាញខ្លួនឲ្យឃើញនៅលើស្លឹកឈូកជាញឹកញាប់នៅថ្ងៃរសៀលជារៀងរាល់ថ្ងៃ រយៈពេលជិត២សប្ដាហ៍កន្លងមកហើយ។ ដោយនៅមុនពេលមានការភ្ញាក់ផ្អើល គឺមានបុរសម្នាក់ឈ្មោះធី ដែលជាកូនសិស្សលោកបានប្រទះឃើញមុនគេ ខណៈពេលគាត់កំពុងចងអង្រឹងដេកនៅក្បែរមាត់ស្រះទឹកខាងលើ។
ប្រភពដដែលបន្តថា ពេលឃើញដំបូង គាត់ឃើញក្រពើនោះតូច ហើយភ្លាមៗនោះក៏មិនបានចាប់អារម្មណ៍ថាជាក្រពើដែរ ដោយស្មានថា ជាសត្វត្រកួតទេ ប៉ុន្តែបន្ទាប់ពីពិនិត្យមើលឱ្យច្បាស់ និងឃើញអាធំ១ក្បាលទៀតបណ្ដែតបង្ហាញខ្លួន ទើបស្គាល់ច្បាស់ថា ជាសត្វក្រពើ រួចបុរសរូបនេះបានទូលប្រាប់ព្រះសង្ឃ និងអ្នកនៅក្នុងវត្ត បង្កឲ្យមានការភ្ញាក់ផ្អើលកើតឡើងតែម្ដង។
ប្រភពខាងលើបន្ថែមទៀតថា ក្រោយពីប្រទះឃើញមានសត្វក្រពើនៅក្នុងស្រះទឹកដែលមិនធ្លាប់មានពីមុនមកបែបនេះ កូនសិស្សលោក និងអ្នកភូមិ៥ទៅ៦នាក់បាននាំគ្នាស្ទួចក្នុងបំណងយកសត្វក្រពើនោះចេញទៅដាក់នៅកន្លែងផ្សេង ដោយទិញមាន់ពីផ្សារមកធ្វើជានុយ ប៉ុន្តែរយៈពេលជិត២អាទិត្យមកហើយ រហូតមកដល់ល្ងាចថ្ងៃទី៦ ខែមិថុនានេះ នៅមិនទាន់ចាប់បាន១ក្បាលនៅឡើយទេ។
នៅពេលនោះក្រពើបានស៊ីនុយដែរ ប៉ុន្តវ័ធអត់បានព្រោះដាច់ខ្សែរហូត ហើយក្រពើ១ក្បាលធំបានស៊ីនុយដោយទាំងផ្លែសន្ទូចអស់៤ទៅ៥ផ្លែទៅហើយ។ តែទោះជាបែបណា កូនសិស្សលោក រួមនឹងអ្នកភូមិ នៅតែព្យាយាមស្ទូចបន្តទៀតដដែល តែពុំដឹងថា តើពេលណា ទើបស្ទូចចាប់ក្រពើបានឡើយ? (កែសម្រួលដោយ ៖ បុប្ផា)
ចែករំលែកព័តមាននេះ