រាជធានីភ្នំពេញ ៖ កីឡាវាយកូនគោលនៅកម្ពុជាបច្ចុប្បន្ន គេឃើញអ្នកដែលនិយមលេងភាគច្រើនជាថ្នាក់ដឹកនាំប្រទេស ជាឧកញ៉ា ជាអ្នកជំនួញធំៗ និងភ្ញៀវបរទេសប៉ុណ្ណោះ មិនដែលឃើញប្រជាជនសាមញ្ញលេងកីឡាប្រភេទនេះឡើយ ។ មូលហេតុដែលប្រជាជនសាមញ្ញមិនសូវចាប់អារម្មណ៍លេងដោយសារសេវាចូលលេងកម្សាន្តមានតម្លៃខ្ពស់ និងសម្ភារបម្រើឱ្យការលេងក៏មានតម្លៃថ្លៃដែលគ្រាន់តែដងវាយមួយមានតម្លៃរាប់រយរាប់ពាន់ដុល្លារឯណោះ និងមានអ្នកខ្លះមិនទាន់ចេះពីរបៀបលេងឱ្យបានត្រឹមត្រូវតាមលក្ខណៈបច្ចេកទេសនៅឡើយ ទើបកីឡាវាយកូនគោលរបស់កម្ពុជាយើងហាក់នៅឆ្ងាយពីអារម្មណ៍មហាជន ។
ផ្ទុយពីការអះអាងខាងលើ លោក ជា បូរ៉ា រដ្ឋលេខាធិការក្រសួងទេសចរណ៍ និងជាអគ្គលេខាធិការសហព័ន្ធកីឡាវាយកូនគោលកម្ពុជាបានប្រាប់កោះសន្តិភាពថា កីឡាវាយកូនគោលនៅកម្ពុជាបច្ចុប្បន្នកំពុងតែមានការពេញនិយមបើទោះជាកីឡាប្រភេទនេះត្រូវបានមហាជនភាគច្រើនលើកឡើងថា មិនសូវពេញនិយមដោយសារសម្ភារឧបករណ៍សម្រាប់លេងរាងថ្លៃជាងសម្ភារឧបករណ៍កីឡាដទៃទៀតក៏ដោយ ។
លោកពន្យល់ថា សម្ភារឧបករណ៍សម្រាប់លេងវាមិនមែនសុទ្ធតែថ្លៃទាំងអស់នោះទេ គឺមាន
តាមប្រភេទរបស់វា ប្រភេទថ្លៃក៏មាន ថោកក៏មាន មិនខុសពីសម្ភារកីឡាដទៃទៀតនោះទេ ។
លោកបញ្ជាក់ថា កីឡាវាយកូនគោលគឺលេងបានគ្រប់វ័យគ្រប់ភេទ ប៉ុន្តែសម្រាប់ស្រុកខ្មែរស្ត្រីមិនទាន់មានច្រើនទេ ភាគច្រើនគឺបុរសតែម្ដងដែលជាថ្នាក់ដឹកនាំជាន់ខ្ពស់និងមន្ត្រីរាជការដែលមានយសសក្តិ និងទ្រព្យសម្បត្តិដែលពួកគាត់លេងដើម្បីសុខភាពនិងកម្សាន្តប៉ុណ្ណោះ ។
ជាក់ស្ដែង កីឡាវាយកូនគោលបច្ចុប្បន្ននៅតែមានសកម្មភាពហ្វឹកហាត់ឬលេងដូចធម្មតាទោះបីជាមានបញ្ហាជំងឺឆ្លងកូវីដ-១៩ក៏ដោយព្រោះលក្ខខណ្ឌនៃការលេងកីឡានេះ កីឡាករម្ខាងនិងកីឡាករម្ខាងទៀតមានគម្លាតដាច់ពីគ្នាល្អណាស់មិនដូចកីឡាផ្សេងទៀតនោះទេ ធ្វើឱ្យកីឡាប្រភេទនេះនៅតែពេញនិយមដដែល ។ ជាពិសេសនៅរៀងរាល់ថ្ងៃសៅរ៍ និងថ្ងៃអាទិត្យ នៅតាមទីលាននីមួយៗគេឃើញកីឡានេះនៅតែមានសកម្មភាពធម្មតា មិនមានការផ្អាកសកម្មភាពដូចកីឡាដទៃទៀតទេ។
ថ្លែងនៅក្នុងពិធីបើកវគ្គបំប៉នស្តីពីទំនាក់ទំនងការផ្សព្វផ្សាយ និងអ្នកយកព័ត៌មានផ្នែកកីឡាអាជីពដែលបានប្រព្រឹត្តទៅរយៈពេល២ថ្ងៃ នៅឯទីស្នាក់ការគណៈកម្មាធិការជាតិអូឡាំពិកកម្ពុជា លោក ឯក ស៊ុនច័ន្ទ អតីតអគ្គលេខាធិការសហព័ន្ធកីឡាវាយកូនគោលកម្ពុជា បានគូស
បញ្ជាក់ថា កីឡាវាយកូនគោលគឺជាការប្រើដំបងវាយកូនបាល់ពីទីតាំងមួយឱ្យដល់រន្ធតូចមួយដែលមានចម្ងាយមួយជាកំណត់ពីទីតាំងវាយដំបូង ។ អ្នកដែលវាយកូនបាល់ឱ្យចូលរន្ធដោយប្រើចំនួនដំបងតិចជាងគេជាអ្នកឈ្នះ ។
លក្ខណៈពិសេសរបស់កីឡាវាយកូនគោលគឺលេងរៀងៗខ្លួន ឬលេងម្នាក់ឯងក៏បាន មិនទាមទារលេងប្រញាប់ និងផ្តល់ពេលឱ្យដើរលេងតាមសម្រួលរយៈពេល៤ ឬ៥ម៉ោង ដោយលេងបណ្តើរជជែកគ្នាបណ្តើរ ។ តាមរយៈកីឡាប្រភេទនេះគេអាចស្វែងយល់នូវអត្តចរិតរបស់ដៃគូបានយ៉ាងច្បាស់ ជាពិសេសដៃគូជំនួញ និងទាមទារទាំងកម្លាំងកាយ កម្លាំងប្រាជ្ញា ទាំងការវាយឆ្ងាយ ឬជិត និងភាពម៉ត់ចត់ទៀតផង ។
លោកបន្តថា កីឡាវាយកូនគោលនៅកម្ពុជាចាប់ផ្តើមកើតមាននៅឆ្នាំ១៩៩៦ ជាមួយនឹងការបើកដំណើរការទីលាន Cambodia Golf & Country Club ។ ទីលាននេះកាលពីដំបូងជាកន្លែងសម្រាប់បម្រើដល់ជនបរទេស ជាពិសេសជនជាតិជប៉ុន ក្រោយមកមានមន្ត្រីជាន់ខ្ពស់យើងតែងអញ្ជើញមកចូលរួមលេងជាប្រចាំ ។
លុះនៅឆ្នាំ២០០៧ ទើបយើងបង្កើតបានជាសហព័ន្ធកីឡាវាយកូនគោលកម្ពុជា ដោយមានតួនាទីជាអ្នកជំរុញ និងអភិវឌ្ឍ តែមិនមានតួនាទីគ្រប់គ្រងនៅឡើយទេ ។ ស្ថានភាពអ្នកដែលអាចលេងកីឡានេះបានមានប្រមាណ៥០០នាក់ ក្នុងនោះមានជនជាតិបរទេសប្រហែល៥០ភាគរយ ។
សេវាកីឡាវាយកូនគោលនេះនៅថ្លៃនៅឡើយ បើធៀបទៅនឹងជីវភាពប្រជាជនសាមញ្ញ ទើបមិនសូវមានអ្នកចូលលេងកម្សាន្តមានតែមន្ត្រីជាន់ខ្ពស់ អ្នកមាន ឬអ្នករកស៊ីធំដុំប៉ុណ្ណោះដែលចូលលេង ធ្វើឱ្យកីឡាមួយនេះមិនទាន់អាចឈានដល់កម្រិតដូចបរទេសនៅឡើយ ព្រោះពួកគេមានការជឿនលឿនមុនយើងយូរមកហើយ ។ កីឡានេះ អាចថាជាកីឡាប្រភេទថ្មី មានអ្នកយល់ដឹងតិចតួច ការចំណាយសម្រាប់លេងក៏នៅថ្លៃ និងទីលាននៅមានតិចតួច ដោយសារការចំណាយលើការសាងសង់ទីលានខ្ពស់ ព្រោះត្រូវប្រើផ្ទៃដីរាប់ហិកតា ហើយខ្វះការប្រកួតប្រជែងទៀត ។ យើងមិនទាន់មានកីឡាករអាជីព មិនទាន់មានគ្រូបង្វឹក បើសិនជាជួលគ្រូមកពីក្រៅគឺត្រូវការចំណាយប្រាក់ខែខ្ពស់ណាស់ ។
លោកឯក ស៊ុនច័ន្ទ បានបញ្ជាក់ថា ទោះជាយើងមានបញ្ហាលំបាកដូចរៀបរាប់ខាងលើមែន តែយើងនៅមិនទាន់ចុះចាញ់ទេ នៅតែខិតខំធ្វើយ៉ាងណាឱ្យរីកលូតលាស់ជាងនេះ ព្រោះខាងអ្នករៀបចំមានផែនការចំពោះមុខជាបណ្តើរៗដូចជា រៀបចំទីស្នាក់ការ និងបណ្តុះបណ្តាលអ្នកដែលអាចធ្វើការងារនេះបានជាអាជីព ។
រៀបចំចងក្រង និងផ្សព្វផ្សាយក្បួនច្បាប់ជាភាសាជាតិ ដោយយោងទៅលើ R&A Golf Rules ។ រៀបចំការប្រកួតដើម្បីលើកទឹកចិត្តដល់អ្នកស្រឡាញ់កីឡានេះ និងបង្ហាត់ក្មេងៗជំទង់ឱ្យចាប់អាជីពកីឡានេះដូចកីឡាដទៃ ។ រួមគ្នាអភិវឌ្ឍន៍វិស័យកីឡាវាយកូនគោលឱ្យបម្រើសេដ្ឋកិច្ចជាតិ ដោយកសាងឱ្យបានកីឡាករអាជីព និងក្រុមជម្រើសជាតិដែលអាចចូលរួមលេងលើឆាកអន្តរជាតិឱ្យបានក្នុងរយៈពេល១០ឆ្នាំទៀត ៕ (កែសម្រួលដោយ ៖ បុប្ផា)
ចែករំលែកព័តមាននេះ