ប្រទេសចិន ៖ ក្មេងប្រុសជនជាតិចិនម្នាក់ ដែលពិការដៃម្ខាង កំពុងធ្វើឱ្យកក្រើកប្រព័ន្ធអ៊ីនធឺណិតចិន ជាមួយមានជំនាញលេងបាល់បោះដ៏អស្ចារ្យ ដោយបានទាក់ទាញចំណាប់អារម្មណ៍ដល់តារាបាល់បោះដ៏ល្បីល្បាញរបស់សហអាមេរិក Stephen Curry ដោយបាននិយាយកាលពីថ្ងៃព្រហស្បតិ៍ថា គេចង់ជួបជាមួយក្មេងប្រុសរូបនោះ។
Stephen Curry ដែលបច្ចុប្បន្នលេងឱ្យក្រុម Golden State Warriors បានសរសេរនៅលើបណ្តាញសង្គម Twitter របស់ខ្លួនថា «តើក្មេងនេះជានរណា? សូមជួយខ្ញុំស្វែងរកគេផង!»។
ការបង្ហោះនេះ ត្រូវបានទទួលការចែករំលែកជាច្រើន។ ជាក់ស្តែងក្នុងសប្តាហ៍នេះ ប្រព័ន្ធផ្សព្វផ្សាយរដ្ឋចិន បានធ្វើការចុះផ្សាយពីក្មេងប្រុសម្នាក់នោះ ដែលមានឈ្មោះថា Zhang Jiacheng អាយុ ១៣ឆ្នាំ ហើយវីដេអូដើមរបស់គេ មានអ្នកទស្សនាជិត ៩លានដងនៅប្រព័ន្ធអ៊ីនធឺណិតចិន និងកំពុងកើនឡើងចំនួនអ្នកទស្សនាថែមទៀត។
ទីភ្នាក់ងារសារព័ត៌មានចិន Xinhua បានចុះផ្សាយថា Zhang Jiacheng កើតនៅភាគខាងត្បូងខេត្តក្វាងទុង ហើយបានបាត់បង់ដៃស្តាំ ដោយសារគ្រោះថ្នាក់ចរាចរណ៍នៅអាយុត្រឹម៥ឆ្នាំ។
ប្រភពដដែលបានបន្តថា Zhang Jiacheng ក៏ធ្លាប់ត្រូវបានគេអញ្ជើញឱ្យទៅទស្សនាការប្រកួតនៅក្លិបបាល់បោះដ៏ល្បីរបស់ខេត្តក្វាងទុង Guangdong Southern Tigers ព្រមទាំងបានបញ្ចេញសមត្ថភាពខ្លះៗនៅទីនោះផងដែរ។ ហើយត្រូវបានអតីតកីឡាករបាល់បោះ Zhu Fangyu សរសើរមិនដាច់ពីមាត់ថា «នេះជាក្មេងអស្ចារ្យបំផុត ដែលខ្ញុំមិនធ្លាប់បានឃើញពីមុនមក ដែលលេងបាល់បោះ» ៕ (ដកស្រង់ចេញពី CNA)
VIDEO
ចែករំលែកព័តមាននេះ