រាជធានីភ្នំពេញ៖ រដ្ឋាភិបាលវៀតណាមបានសម្រេចអនុញ្ញាតឱ្យនិស្សិត សិក្ខាកាមយោធា និងសិក្ខាកាមនគរបាល ដែលត្រូវចូលមកបន្តការសិក្សានៅប្រទេសវៀតណាមប្រមាណ ជិត ៥០០នាក់ ឲ្យត្រឡប់ទៅរៀនបន្តនៅវៀតណាមបានហើយត្រូវចូលតាមច្រកទ្វារព្រំដែនអន្តរជាតិបាវិត (ខេត្តស្វាយរៀង) ម៉ុកបាយ (ខេត្តតៃនិញ) នៅថ្ងៃទី១០ ខែមិថុនា ឆ្នាំ២០២០ ។ នេះបើយោងតាមសេចក្តីជូនដំណឹងរបស់ស្ថានឯកអគ្គរាជទូតកម្ពុជា នៅវៀតណាម ចុះថ្ងៃទី០៥ ខែមិថុនានេះ។
ការអនុញ្ញាតិរបស់វៀតណាមត្រូវបានធ្វើឡើងបន្ទាប់ពីមានសំណើររបស់ស្ថានទូតកម្ពុជាចុះថ្ងៃទី ២៩ មេសាកន្លងទៅ ក៏ដូចជាសំណើរចុះថ្ងៃទី ០១ ខែមិថុនា របស់ក្រសួងអប់រំ និងបណ្តុះបណ្តាលវៀតណាម ស្នើសុំទៅនាយករដ្ឋមន្ត្រីវៀតណាម នាថ្ងៃទី ៤ មិថុនានេះ ។
ប្រភពដដែលបានបន្តថា «ពេលមកដល់វៀតណាម និស្សិត និងសិក្ខាកាមកម្ពុជាទាំងអស់ នឹងត្រូវដាក់ដោយឡែក ១៤ ថ្ងៃទៅតាមការរៀបចំរបស់អាជ្ញាធរខេត្តតៃនិញ» ។ ក្នុងនោះផងដែរ ចំពោះចំណាយផ្សេងៗនៅពេលដាក់ដាច់ដោយឡែក ១៤ ថ្ងៃនោះក្រសួងអប់រំ និងបណ្តុះបណ្តាលវៀតណាម បានស្នើសុំនាយករដ្ឋមន្ត្រីវៀតណាមពិនិត្យ និងសម្រេច «លើកលែងការចំណាយទាំងស្រុង ឬបញ្ចុះការចំណាយមួយផ្នែក» ។
សូមបញ្ជាក់ថា អាជ្ញាធរវៀតណាមបានសម្រេចបើកឲ្យដំណើរការឡើងវិញនូវសាលាមត្តេយ្យនិងសាលាបឋមសិក្សានៅប្រទេសវៀតណាម កាលពីថ្ងៃទីពាក់កណ្តាលខែឧសភា បន្ទាប់ពីការបិទមួយរយៈពេល ដោយសារតែមេរោគឆ្លងរាតត្បាតឆ្លងកូវីដ-១៩នៅវៀតណាមធូរស្បើយ ។ នៅវៀតណាមមានការឆ្លងកូវីដ១៩ ត្រឹមតែ ២៨៨ ករណីនិងគ្មានការស្លាប់នោះទេ ៕
ចែករំលែកព័តមាននេះ