រាជធានីភ្នំពេញ ៖ ជាងកាត់សក់ម្នាក់ត្រូវនគរបាលចាប់វាយខ្នោះ បន្ទាប់ពីលង់ស្នេហ៍យុវតីជាសិស្សសាលាមិនទាន់គ្រប់អាយុម្នាក់តាមរយៈហ្វេសប៊ុកហើយ ឈានទៅណាត់គ្នាផឹកស៊ី លុះស្រវឹងនាំគ្នាទៅរួមភេទក្នុងផ្ទះសំណាក់បានសម្រេចត្រូវបានម្តាយខាងស្រីប្តឹងចោទប្រកាន់ពីបទចាប់បំពានសេពសន្ថវៈ ។
ការឃាត់ខ្លួនបុរសជាជាងកាត់សក់ជាប់ចោទខាងលើនេះធ្វើឡើងកាលពីវេលាម៉ោង៩និង៣០នាទីព្រឹកថ្ងៃទី៤ ខែ មិថុនា ឆ្នាំ ២០២០ នៅចំណុចផ្ទះសំណាក់មួយកន្លែង ស្ថិតនៅផ្លូវលេខ២៨៥ សងា្កត់បឹងកក់១ ខណ្ឌទួលគោក។
បុរសជាប់ចោទដែលត្រូវឃាត់ខ្លួនឈ្មោះអ៊ុក តុលា អាយុ៣១ឆាំ្ន មុខរបរជាងកាត់សក់ ស្នាក់នៅផ្ទះជួលក្រុម៥ ភូមិចុងខ្សាច់ សងា្កត់ទួលសងែ្ក១ ខណ្ឌឬស្សីកែវ រាជធានីភ្នំពេញ ។ ចំណែកយុវតីជាសិស្សសាលាមានអាយុ១៧ឆាំ្ន ។
តាមប្រភពពីនគរបាលអោយដឹងថា បុរសជាប់ចោទរូបនោះត្រូវបានឪពុកម្តាយរបស់ក្មេងស្រីឃាត់ខ្លួន យកមកប្រគល់អោយសមត្ថកិច្ច ដោយចោទប្រកាន់ថា បុរសរូបនោះចាប់បំពានសេពសន្ថវៈមកលើកូនស្រីរបស់ពួកគាត់។
តាមប្រភពដដែលបានអោយដឹងថា កាលពីវេលាយប់ថ្ងៃទី៣ ខែមិថុនា ឆាំ្ន២០២០ ពួកគេទាំង២នាក់បានណាត់គ្នាផឹកនៅផ្ទះកាត់សក់របស់បុរសរូបនោះ រហូតដល់ដល់ស្រវឹង លុះនៅវេលាម៉ោងប្រមាណ១២យប់ ក៏បាននាំគ្នាទៅដេកផ្ទះសំណាក់មួយកន្លែង ។ បន្ទាប់ពីបាត់កូនស្រី ក្រុមគ្រួសារក៏បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលទួលសង្កែ១ លុះព្រឹកឡើងតាមរយៈប្រព័ន្ធជីភីអេសក៏បានតាមរកឃើញ និងឃាត់ខ្លួនបុរសនោះប្រគល់អោយនគរបាលប៉ុស្តិ៍បឹងកក់ទី១ ។
តាមប្រភពដដែលបានបន្តថា ក្រោយមក សមត្ថកិច្ចខណ្ឌទួលគោកក៏បានប្រគល់បុរសជាប់ចោទខាងលើអោយនគរបាលខណ្ឌឬស្សីកែវដើម្បីកសាងសំនុំរឿងចាត់ការតាមច្បាប់ ដោយចោទប្រកាន់បុរសនោះរួមភេទជាមួយក្មេងស្រីមិនទាន់គ្រប់អាយុ ។ លុះនៅវេលាម៉ោងប្រមាណ៥និង៥០នាទីល្ងាចថ្ងៃទី៤ មិថុនា សមត្ថកិច្ច ក៏បាននាំជនជាប់ចោទ និងក្មេងស្រីរងគ្រោះទៅបង្ហាញផ្ទះសំណាក់។
តាមប្រភពពីក្មេងស្រីបានអោយដឹងថា នៅយប់នោះ បន្ទាប់ពីផឹកស្រវឹងវង្វេងបាត់ស្មារតី ពុំបានដឹងខ្លួនថា គេដឹកចូលផ្ទះសំណាក់នោះទេ ស្រាប់តែដឹងខ្លួនវិញដោះអាវអស់ ។ លុះក្រោយមកតាមរយៈប្រព័ន្ធជីភីអេសម្តាយក៍បានតាមរកឃើញនៅផ្ទះសំណាក់ ហើយចាប់បាន ដោយបុរសម្នាក់នោះប្រកែកថាអត់បំពានទៀត។
ចំណែកបុរសជាប់ចោទបានអោយដឹងថា គាត់មិនបានបង្ខិតបង្ខំចាប់បំពាននោះទេ គឺពួកគាត់បានស្រលាញ់គ្នា ហើយនាំគ្នាទៅដេកផ្ទះសំណាក់ ។ បុរសជាប់ចោទរូបនោះបានអោយដឹងទៀតថា ពួកគាត់ទាំង២នាក់ បានស្រលាញ់គ្នារយៈពេលប្រមាណ១ខែមកហើយ តាមរយៈហ្វេសប៊ុក ។ នៅយប់នោះ បន្ទាប់ពីផឹករួច គាត់ក៏បានប្រាប់ថា ជួនទៅផ្ទះ តែនាងមិនទៅ ហើយថា ទៅក្រៅ ក៏បាននាំគ្នាទៅដេកផ្ទះសំណាក់តែម្តង ៕ (កែសម្រួលដោយ ៖ ធីតា)
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ