រាជធានីភ្នំពេញ ៖ ក្រោយពីការដាក់ចេញនូវគោលនយោបាយរបស់រាជរដ្ឋាភិបាលកម្ពុជា ក្រោមការដឹកនាំរបស់សម្ដេចតេជោ ហ៊ុន សែននាយករដ្ឋមន្ត្រី នៃព្រះរាជាណាចក្រកម្ពុជា តាមរយៈសាលារាជធានីភ្នំពេញ នៅពេលនេះ ប្រឡាយទឹកស្ទឹងមានជ័យបានប្រែក្លាយប្រឡាយស្ទឹងមានជ័យ ពីអាងស្ដុកទឹកស្អុយ ទៅជាប្រឡាយបេតុង យ៉ាងស្អាត គ្មានក្លិនស្អុយ និងអាចរំដោះទឹកចេញពីគ្រប់តំបន់ ជាពិសេសនឹងដោះស្រាយបញ្ហាទឹកជន់លិច នៅខណ្ឌមានជ័យ និងខណ្ឌសែនសុខ ខណៈដែលប្រជាពលរដ្ឋដែលរស់តាមមាត់ច្រាំងប្រឡាយស្ទឹងមានជ័យ ទទួលបានដីសម្រាប់សាងសង់ផ្ទះ និងជាកម្មសិទ្ធិស្របច្បាប់ នៅហ្នឹងកន្លែងតែម្តង តាមគោលនយោបាយ ឈ្នះ ឈ្នះ របស់សម្ដេចតេជោនាយករដ្ឋមន្ត្រី ។
សម្តេចតេជោ ហ៊ុន សែន នាយករដ្ឋមន្ត្រី ក៏បានអំពាវនាវដល់ប្អូនប្រជាពលរដ្ឋចូលរួមប្រើប្រាស់សមិត្ថផល ដែលបានកសាងនេះអោយបានគង់វង្ស នឹងរួមគ្នាធ្វើអនាម័យ ក្នុងការទុកដាក់សម្រាម អោយបានត្រឹមត្រូវ ដើម្បីរក្សាភាពស្អាតនៅតាមទីកន្លែរស់នៅ ។
សូមបញ្ជាក់ថា តាមផែនការរបស់រដ្ឋបាលរាជធានីភ្នំពេញ គ្រោងស្ថាបនាប្រឡាយស្ទឹងមានជ័យឲ្យរួច រាល់នាពេលឆាប់ៗនេះ ដើម្បីធានាការរំដោះទឹកស្អុយ ឲ្យបានលឿន ជៀសការជន់លិចរាជធានីភ្នំពេញ ពិសេសរំដោះទឹកជំនន់ទឹកភ្លៀង ចេញពីតំបន់ព្រលានយន្តហោះផ្នែកខាងត្បូង និងខាងកើត ផ្លូវ២០០៤ ផ្លូវ២០០២ និងតំបន់ប្រមូលទឹកស្ទឹងមានជ័យ ដោយបង្ហូរទំលាក់ទៅតាមប្រឡាយមេស្ទឹងមានជ័យ ឆ្ពោះទៅស្ថានីយបូមទឹកបឹងទំពុន ៕
ចែករំលែកព័តមាននេះ