ក្លិបមួយទៀតហើយ! ត្រូវ UEFA ដាក់ទណ្ឌកម្មមិនឱ្យលេងពានរង្វាន់កំពូលទ្វីបអឺរ៉ុប
ប្រទេសតួកគី ៖ ក្រុម Trabzonspor នៅលីគកំពូលតួកគី Süper Lig ត្រូវទទួលរងទណ្ឌកម្មពីសហព័ន្ធកីឡាបាល់ទាត់ទ្វីបអឺរ៉ុប UEFA ដោយបានហាមឃាត់រយៈពេលមួយឆ្នាំ…
ប្រទេសតួកគី ៖ ក្រុម Trabzonspor នៅលីគកំពូលតួកគី Süper Lig ត្រូវទទួលរងទណ្ឌកម្មពីសហព័ន្ធកីឡាបាល់ទាត់ទ្វីបអឺរ៉ុប UEFA ដោយបានហាមឃាត់រយៈពេលមួយឆ្នាំ មិនឱ្យលេងក្នុងពានរង្វាន់កំពូលប្រចាំទ្វីបអឺរ៉ុប Champions League និង Europa League បន្ទាប់ពីបានចាយលុយលើសកំណត់ក្នុងដោះដូរកីឡាករ រំលោភលើច្បាប់ Financial Fair Play (FFP) របស់ UEFA ។
រឿងរ៉ាវចាយលុយលើសចំនួនកំណត់របស់ក្លិប Trabzonspor បានកើតឡើងកាលពីឆ្នាំ ២០១៩ កន្លងមក។ ហើយការហាមឃាត់នេះ នឹងត្រូវអនុវត្តចាប់ពីរដូវកាលក្រោយតទៅ ដែលមានន័យថាស្ថិតក្នុងរយៈពេល ១ឆ្នាំ ក្លិប Trabzonspor នឹងត្រូវខកខានការប្រកួតប្រជែងក្របខណ្ឌ Champions League និង Europa League ចំនួន ២រដូវកាល គឺរដូវកាល ២០២០/២១ និង ២០២១/២២ ។
សូមជម្រាបជូនថា ច្បាប់ FFP ត្រូវបានណែនាំឱ្យប្រើប្រាស់ក្នុងឆ្នាំ ២០១១ ដែលវាត្រូវបានបង្កើតឡើង ដើម្បីបញ្ឈប់ក្លិបបាល់ទាត់ទាំងអស់ ពីការចំណាយលុយច្រើនជាងចំណូលដែលពួកគេរកបាន ។
រំលឹកជូនថាក្រុមអ៊ីតាលី AC Milan និងក្រុមអង់គ្លេស Manchester City ក៏ត្រូវបានUEFA ដាក់បម្រាមហាមឃាត់មិនឱ្យលេងក្នុងពានកំពូលប្រចាំទ្វីបអឺរ៉ុបទាំង២ បន្ទាប់ពីបានរំលោភលើច្បាប់ FFP របស់ UEFA មួយនេះ ។
ក្រុម Trabzonspor បច្ចុប្បន្នកំពុងឈរកំពូលតារាង Super Lig ដោយមាន ៥៣ពិន្ទុស្មើគ្នាជាមួយក្រុមលេខ២ İstanbul Başakşehir មុនពេលលីគត្រូវបានផ្អាកកាលពីខែមីនា។ ក្របខណ្ឌ Super Lig នឹងត្រឡប់មកកាន់ការប្រកួតប្រជែងរបស់ខ្លួនវិញនៅថ្ងៃទី១២ ខែមិថុនា ឆ្នាំ២០២០ ខាងមុខ ខណៈនៅសល់ ៨ប្រកួតទៀតដែលត្រូវលេង ដើម្បីបញ្ចប់លីគរដូវកាល ២០១៩/២០៕ (ដកស្រង់ចេញពី Goal.com)
ចែករំលែកព័តមាននេះ