ខេត្តព្រះវិហារ ៖ បើតាមការសង្កេតឃើញថ្មីៗនេះទីផ្សារក្នុងស្រុក និងទីផ្សារនាំចូលទៅប្រទេសថៃ ចំពោះរុក្ខជាតិផ្សិតមួយប្រភេទដែលគេស្គាល់ថា «ជាផ្សិតប៉ក់ ឬផ្សិតផូងផាំង» ហើយត្រូវបានប្រជាពលរដ្ឋខ្មែរកំពុងតែសម្រុកដឹកជញ្ជូនឆ្លងដែន ដើម្បីយកទៅលក់នៅក្នុងទឹកដីថៃយ៉ាងគគ្រឹកគគ្រេង ដោយទទួលបានតម្លៃថ្លៃគួរសម ។
តាមការលើកឡើងពីលោកស្រី គឹម ហេង ជាអ្នកប្រមូលទិញផ្សិតប៉ក់ ពីប្រជាជននៅស្រុករវៀង ខេត្តព្រះវិហារ យកទៅលក់ប្រទេសថៃ បាននិយាយថា ផ្សិតប្រភេទនេះ គឺភាគច្រើនវាដុះជាហ្វូងនៅលើដីល្បាយខ្សាច់ ក្នុងតំបន់ខ្ពង់រាប និងតំបន់ភ្នំ ។ ហើយកសិករ ក៏ដូចជា ប្រជាជនទូទៅបានដើរជីកយកមកលក់ ប៉ុន្តែនៅពេលដែលផ្សិតនេះ វាលូតលាស់ចេញមកលើដីទាំងអស់ខណៈពេលដែលមានភ្លៀងធ្លាក់នោះ គឺគេលែងបរិភោគផ្សិតនេះហើយ ។
អ្នកស្រីបន្ថែមថា ផ្សិតប៉ក់នេះ ជនជាតិថៃនិយមទិញយកទៅបរិភោគណាស់ ដោយមួយគីឡូក្រាមលក់នៅក្នុងតំបន់ខ្សែបន្ទាត់ព្រំដែន ចន្លោះពី២ម៉ឺនរៀលទៅ២២០០០រៀលឯណោះ ហើយឈ្មួញថៃប្រមូលទិញយកទាំងអស់ឱ្យតែមាន មិនដែលសល់នោះឡើយ។
ដោយឡែកអាជីវករ ដែលនាំផ្សិតប៉ក់ចូលទៅលក់ក្នុងទឹកដីថៃ បានលើកឡើងដែរថា ក្នុងមួយថ្ងៃៗអាជីវករម្នាក់អាចលក់ផ្សិតប្រភេទនេះ បានចន្លោះពី១,២តោនទៅ៣តោនជារៀងរាល់ថ្ងៃ ដោយបានតម្លៃជិត២០០បាត បានចំណេញច្រើនគួរសម សម្រាប់ផ្គត់ផ្គង់ជីវភាព ។
បច្ចុប្បន្នការនាំចូលនូវប្រភេទផ្សិតប៉ក់នេះ នៅតែបន្តយ៉ាងគគ្រឹកគគ្រេងពីខេត្តព្រះវិហារ តាមច្រកនានាទៅកាន់ទីផ្សារក្នុងប្រទេសថៃ តាមច្រកអន្តរជាតិជាំស្រងាំ និងច្រកអូរស្មាច់ ខេត្តឧត្តរមានជ័យ ។ (កែសម្រួលដោយ ៖ បុប្ផា)
ចែករំលែកព័តមាននេះ