រាជធានីភ្នំពេញ ៖ ជុំវិញបញ្ហានៃរថយន្តទំនើបថ្លៃកប់ពពកពីរគ្រឿងពាក់ស្លាកលេខ «នគរបាល 2-7715» នោះពេលនេះត្រូវបានឯកឧត្តម នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ ទទួលផែនចរាចរណ៍បានបញ្ជាក់បំភ្លឺជូនសាធារណជនថា រថយន្តទំនើបទាំងពីរគ្រឿង ម៉ាក Rolls-Royce និង Mercedes គឺជាស្លាកលេខក្លែងក្លាយ។
យោងតាមការបង្ហោះលើផេកស្នងការនគរបាលរាជធានីភ្នំពេញ នៅថ្ងៃទី៤ ខែមិថុនា ឆ្នាំ២០២០ បានស្រង់សម្តីឯកឧត្តម នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ ទទួលផែនចរាចរណ៍បានបញ្ជាក់បំភ្លឺជូនសាធារណជន និងអ្នកនិយមប្រើប្រាស់បណ្ដាញទំនាក់ទំនងសង្គមថា ផ្លាកលេខ «នគរបាល 2-7715» ដែលបំពាក់លើរថយន្ត Rolls-Royce និង Mercedes គឺជាផ្លាកលេខក្លែងក្លាយ។
នាយឧត្តមសេនីយ៍ ហ៊ឹម យ៉ាន បានបញ្ជាក់ទៀតថា ខណៈពេលនេះ សមត្ថកិច្ច កំពុងធ្វើការស្រាវជ្រាវលើករណីនេះ ដើម្បីចាត់ការតាមផ្លូវច្បាប់ ។ ដូច្នេះបើសិនជាប្រជាពលរដ្ឋបានឃើញ សូមរាយការណ៍មកសមត្ថកិច្ច ដែលនៅជិតខ្លួន ឬ សូមទូរសព្ទមកលេខ 117 ហៅចូលដោយឥតគិតថ្លៃ។
សូមរម្លឹកថា ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានប្រាប់កោះសន្តិភាពនៅព្រឹកថ្ងៃទី ០៤ មិថុនានេះ លោកនឹងបញ្ជារកម្លាំងចុះឆែករកអត្តសញ្ញាណម្ចាស់រថយន្តទំនើបថ្លៃកប់ពពកម៉ាក Rolls-Royce ដែលពាក់ស្លាកលេខ «នគរបាល ២- ៧៧១៥» ជាពិសេសលោកបានបញ្ជាក់ថាពុំមានស្លាកលេខនគរបាលបំពាក់លើរថយន្តទំនើបៗនោះទេ ៕
ចែករំលែកព័តមាននេះ