រាជធានីភ្នំពេញ ៖ សេចក្តីព្រាងច្បាប់ស្តីពីការប្រឆាំងហិរញ្ញប្បទាន ដល់ការរីករាលដាលអាវុធមហាប្រល័យមាន៨ជំពូក និង២៤មាត្រា ត្រូវបានរដ្ឋសភាជាតិសម្រេចអនុម័តជាឯកច្ឆ័ន្ទនៃចំនួនសមាជិករដ្ឋសភាទាំងមូល ។ សម្តេចក្រឡាហោម ស ខេង…
រាជធានីភ្នំពេញ ៖ សេចក្តីព្រាងច្បាប់ស្តីពីការប្រឆាំងហិរញ្ញប្បទាន ដល់ការរីករាលដាលអាវុធមហាប្រល័យមាន៨ជំពូក និង២៤មាត្រា ត្រូវបានរដ្ឋសភាជាតិសម្រេចអនុម័តជាឯកច្ឆ័ន្ទនៃចំនួនសមាជិករដ្ឋសភាទាំងមូល ។
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃដំណាងរាជរដ្ឋាភិបាលបានលើកឡើងក្នុងសម័យប្រជុំពេញអង្គរដ្ឋសភា នាព្រឹកថ្ងៃទី៤ ខែមិថុនា ឆ្នាំ២០២០ ក្រោមអធិបតីភាពសម្តេចហេង សំរិន ប្រធានរដ្ឋសភា ដោយមានសមាជិកសភាចូលរួម១២០ រូបថា ការធ្វើច្បាប់នេះដោយសារតែកម្ពុជា គឺជាសមាជិកនៃក្រុមប្រទេសអាស៊ីប៉ាស៊ីហ្វិក ស្តីពីការសម្អាតប្រាក់ ដូច្នេះយើងមានកាតព្វកិច្ច ដើម្បីអនុវត្តនៃគោលការណ៍ និងវិធានការដែលអង្គការនេះបានដាក់ចេញ ។
សម្តេចបញ្ជាក់ថា ៖«កម្ពុជាយើងមិនទាន់បំពេញសម្រាប់លក្ខខណ្ឌទាំងឡាយដែលតម្រូវដោយអង្គការនេះ ហើយដូចខ្ញុំបញ្ជាក់ថា ពេលយើងបានខិតខំប្រឹងប្រែង ប៉ុន្តែគេវាតម្លៃយើងនៅខ្វះខាតដោយបញ្ជូលទៅក្នុងបញ្ជីប្រផេះដែលនេះជាបញ្ហា ដូច្នេះយើងជាសមាជិកនៃអង្គការនេះ ត្រូវតែខិតខំ ដើម្បីបំពេញលក្ខខណ្ឌទាំងឡាយឲ្យសមស្រប ដើម្បីផលប្រយោជន៍របស់កម្ពុជាយើង» ។
សម្តេចបន្តថា ក្រុមការងារក្រសួងក៏ដូចជា ក្រសួងពាក់ព័ន្ធបានខិតខំចាក់ចែងសេចក្តីព្រាងច្បាប់នេះឲ្យគ្រប់លក្ខខណ្ឌគ្រប់ជ្រុងជ្រោយដោយបានជំនួយពីអ្នកជំនាញរបស់ប្រទេសអូស្ត្រាលីផងដែរ ។ សម្តេចសង្កត់ធ្ងន់ថា«ច្បាប់នេះបានឆ្លើយតបភាពបន្ទាន់ និងចាប់បាច់ ។ ហើយសេចក្តីព្រាងច្បាប់នេះរៀបចំឡើងហើយត្រូវបានគណៈរដ្ឋមន្ត្រីអនុម័ត កាលពីថ្ងៃទី១៥ ខែឧសភា ២០២០ ដើម្បីបញ្ជូលមករដ្ឋសភាអនុម័ត» ។
លោក ហ៊ុន ណេង ប្រធានគណៈកម្មការមហាផ្ទៃ ការពារជាតិ និងមុខងារសាធារណៈបានលើកឡើងថាកម្ពុជាបានចូលជាសមាជិកនៃក្រុមប្រទេសអាស៊ីប៉ាស៊ីហ្វិកស្តីពីការសម្អាតប្រាក់ នៅថ្ងៃទី១៥ ខែមិថុនាឆ្នាំ២០០៤ ដែលត្រូវតម្រូវឲ្យកម្ពុជាត្រូវអនុវត្តតាមស្តង់ដាអន្តរ ជាតិស្តីពីការប្រឆាំងការសម្អាត់ប្រាក់ ហិរញ្ញប្បទានភេរវកម្ម និងការរីករាលដាយភាយអាវុធមហាប្រល័យរបស់ក្រុមការងារហិរញ្ញវត្ថុ ។
ជាមួយគ្នានោះដែរ លោកហ៊ុន ណេង ក៏បានលើកឡើងថាចំពោះអ្នកដែលល្មើសនឹងច្បាប់នេះត្រូវទទួលទោសជាប់ពន្ធនាគារពី២ ដល់៥ ឆ្នាំ និងពិន័យជា ប្រាក់ពី២០លានរៀល ដល់៥០លានរៀល៕
ចែករំលែកព័តមាននេះ