មនុស្សដែលមិនមានភាពឆ្លាតវៃផ្នែកផ្លូវអារម្មណ៍ភាគច្រើនគិតតែចំណុចខ្លាំងរបស់ខ្លួនដែលអាចនាំយកផលប្រយោជន៍ដល់ពួកគេបាន ។ ជាលទ្ធផល ពួកគេផ្តាច់ខ្លួនចេញពីបរិស្ថាន និងមនុស្សជុំវិញខ្លួន ដែលអាចបង្កជាបញ្ហាផ្សេងៗទៀតដែលរួមមានការបរាជ័យក្នុងការងារ និងការខាតបង់ក្នុងអាជីវកម្មជាដើម ។
អ្នកដែលមានភាពវៃឆ្លាតផ្នែកនេះពិតប្រាកដដឹងពីសារៈសំខាន់នៃការយល់ដឹងពីអារម្មណ៍របស់ខ្លួនហើយ ក៏ដឹងពីសារៈសំខាន់នៃការសិក្សាពីអារម្មណ៍របស់អ្នកដទៃ និងការដែលបរិស្ថានជះឥទ្ធិពលដល់អារម្មណ៍ទាំងនេះដែរ ។ ព្រោះការមានភាពឆ្លាតវៃផ្នែកផ្លូវអារម្មណ៍មិនមែនគ្រាន់តែផ្តោតលើអារម្មណ៍របស់ខ្ញុំ និងវិធីដែលខ្ញុំប្រើជាមួយអ្នកដទៃទេ ។ជាទូទៅមនុស្សត្រូវការចំណុចបីដើម្បីអាចឆ្លាតវៃក្នុងផ្នែកនេះបាន ៖
១. ការយល់ដឹងពីខ្លួនឯង
ចំណុចនេះត្រូវឲ្យបុគ្គលព្យាយាមយល់ដឹងបន្ថែមពីចំណុចខ្លាំង និងខ្សោយរបស់ខ្លួន ជាពិសេសគឺការទទួលស្គាល់កំហុសឆ្គង និងចំណុចខ្វះខាតរបស់ខ្លួន ។ កំហុសឆ្គងមួយដែលមនុស្សភាគច្រើនប្រព្រឹត្តគឺការប្រាប់ពីអ្វីដែលអ្នកដទៃចង់ស្តាប់ និងចៀសវាងការប្រាប់ពីការពិត ។ មនុស្សត្រូវទទួលស្គាល់ចំណុចខ្វះខាតរបស់ខ្លួនជាមុនសិនទើបអាចដោះស្រាយវាបាន ។
២. ការយល់ដឹងពីមនុស្សជុំវិញខ្លួន
ក្រៅពីការទទួលស្គាល់ខាងលើហើយ អ្នកដែលមានភាពឆ្លាតវៃផ្នែកផ្លូវអារម្មណ៍តាមដាន និងវិភាគពីផលប៉ះពាល់ដែលចំណុចខ្វះខាតរបស់ខ្លួនបានបង្កឲ្យអ្នកដទៃក្នុងការងារ ឬកន្លែងអាជីវកម្ម ។ អ្នកអាចសង្កេតមើលដោយខ្លួនឯងពីការឆ្លើយតបរបស់មនុស្ស ឬជជែកពិភាក្សាសួរពីយោបល់របស់ពួកគេជាដើម ។ការធ្វើដូច្នេះអាចជួយឲ្យអ្នកដឹងថាការវាយតម្លៃលើខ្លួនឯងរបស់អ្នកខាងលើពិតជាត្រឹមត្រូវឬទេ ហើយថាអ្នកនៅមានចំណុចខ្វះខាតអ្វីទៀតទេដែលអ្នកមិនបានគិតឃើញ ។
៣. ការយល់ដឹងពីបរិស្ថានជុំវិញខ្លួន
មនុស្សដែលមានភាពឆ្លាតវៃផ្នែកផ្លូវអារម្មណ៍ដឹងថា បរិស្ថានដែលមនុស្សស្ថិតក្នុងអាចប៉ះពាល់ដល់មនុស្សបាន ។ ជាមួយគ្នានេះដែរ ការអភិវឌ្ឍន៍ខ្លួន ឬការបោះបង់ទម្លាប់មិនល្អដែលអាចប៉ះពាល់ដល់អ្នកដទៃត្រូវការការចូលរួមពីបរិស្ថាន និងមនុស្សជុំវិញខ្លួនដែរ ។
ប្រសិនបើអ្នកឧស្សាហ៍ឆេវឆាវ តើមានអ្វីក្នុងបរិស្ថានជុំវិញអ្នកដែលជំរុញឲ្យអ្នកមានអារម្មណ៍នេះទេ? ក្រៅពីផ្លាស់ប្តូរខ្លួនឯងហើយ អ្នកត្រូវគិតគូរពីការផ្លាស់ប្តូរបរិស្ថានជុំវិញខ្លួនអ្នកដែរ ៕
ចែករំលែកព័តមាននេះ