សហរដ្ឋអាមេរិក ៖ តាមប្រភពព័ត៌មាន CNN បានឱ្យដឹងថា មរណភាពរបស់បុរសជនជាតិស្បែកខ្មៅ ដែលត្រូវបានប៉ូលិសជនជាតិស្បែក.សចាប់ជាន់.ក ដោយប្រើជង្គង់ផ្ទប់ទៅនឹងដី កាលពីថ្ងៃមុន គឺដោយសារតែការគាំងទៅលើប្រព័ន្ធបេះដូង និងសួត។ នេះគឺយោងទៅតាមលទ្ធផលនៃការធ្វើកោសល្យវិច័យចុងក្រោយ ដែលចេញដោយអ្នកពិនិត្យវេជ្ជសាស្ត្រ Hennepin County។
របាយការណ៍ពីវេជ្ជបណ្ឌិត Andrew Baker និយាយថា ក.របស់ Floyd ត្រូវបានគាបជាប់នៅពេលជង្គង់របស់អតីតមន្ត្រី Derek Chauvin សង្កត់លើអស់រយៈពេលជាង៨នាទី ប៉ុន្តែនេះមិនបានសន្និដ្ឋានថា វាជាមូលហេតុផ្ទាល់នៃការបាត់បង់ជីវិតរបស់គាត់នោះទេ។
របាយការណ៍ថ្មីបានបង្ហាញថា Floyd មានស្នាមជាំ និងមានស្នាមជាច្រើននៅលើក្បាលមុខមាត់ ស្មា និង ជើង ប៉ុន្តែគេមិនបានរកឃើញភស្តុតាងណាមួយដែលបញ្ជាក់ថា ស្នាមរបួសទាំងអស់នេះ គឺជាមូលហេតុដែលធ្វើឱ្យគេបាត់បង់ជីវិតនោះទេ។
ការធ្វើកោសល្យវិច័យបាននិយាយថា Floyd មានជំងឺបេះដូង និងប្រវត្តិនៃជំងឺលើសឈាម។ របាយការណ៍គីមីវិទ្យាបឋម បានរកឃើញ កម្រិតថ្នាំ Fentanyl និង Methamphetamine ដែលជាសុទ្ធតែជាថ្នាំញៀន ស្ថិតនៅក្នុងកម្រិតមធ្យម។
តែការធ្វើកោសល្យវិច័យដោយឯករាជ្យដែលធ្វើឡើងដោយក្រុមគ្រួសារ Floyd មិនបានប្រាប់ពីសារធាតុទាំងនេះទេ។ ការធ្វើកោសល្យវិច័យដោយក្រុមគ្រួសាររបស់ Floyd បាននិយាយថា Floyd បានបាត់បង់ជីវិតដោយសារការសង្កត់របស់ប៉ូលិស។
ការធ្វើកោសល្យវិច័យរបស់រដ្ឋ ក៏បានបង្ហាញផងដែរថា ថ្មីៗនេះ Floyd បានធ្វើតេស្តវិជ្ជមានមេរោគកូវីដ១៩ ទោះបីជានេះមិនមានការបង្ហាញថា វាគឺជាកត្តានៃការបាត់បង់ជីវិតរបស់គាត់ក៏ដោយ៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ