រាជធានីភ្នំពេញ ៖ ខណៈដែលសង្វៀនប្រដាល់នៅតែបន្តប្រកួតបិទទ្វារ ប្រធានសហព័ន្ធកីឡាប្រដាល់គុនខ្មែរលោក តែម ម៉ឺន បានប្រកាសយ៉ាងមុតមាំថា នឹងបន្តព្រមានចំពោះសង្វៀន និងកីឡាករប្រដាល់ដែលធ្វើការប្រកួតមិនអស់ដៃ ដោយសារតែសំអាងថា នោះជាការប្រដាល់បិទទ្វារគ្មានអ្នកទស្សនាផ្ទាល់ជាដើម ។ បន្ថែមពីលើការប្រជុំដដែលជាដដែល លោកនឹងមានវិធានការចំពោះកីឡាករ និងមន្ត្រីពាក់ព័ន្ធលើករណីនេះផងដែរ។
លោក តែម ម៉ឺន និយាយថា តាំងពីដំណាក់កាលកូវីដ-១៩ធ្វើការវាយលុក បណ្ដាសង្វៀនប្រដាល់ទាំងអស់នៅតែមិនទាន់អនុញ្ញាតឱ្យបើកការប្រកួតដោយបើកទ្វារដើម្បីឱ្យអ្នកគាំទ្រអាច
ចូលទស្សនានោះទេ បើទោះជាក្នុងពេលនេះ ស្ថិតក្នុងសភាពស្ងប់ស្ងាត់ជាងមុនដែលមិនសូវរងផលប៉ះពាល់ក្ដី ។ លោកថា សង្វៀនមួយចំនួនក៏ពិបាកក្នុងការគ្រប់គ្រងនៅពេលកីឡាករប្រកួតគ្នាមិនបានល្អ ដែលអាចនិយាយបានថា ពួកគេប្រកួតគ្នាដើម្បីគ្រាន់តែបង្គ្រប់កិច្ចប៉ុណ្ណោះ ។
លោកទទួលស្គាល់ថា ការប្រកួតដែលគ្មានអ្នកទស្សនាធ្វើឱ្យពិបាកដល់អ្នកប្រដាល់ប្រកួតឱ្យអស់ពីសមត្ថភាពដោយសារតែខ្វះភាពកញ្ជ្រោលតែមិនអាចដោយសារតែហេតុផលនេះ ហើយព្រមលែងដៃមិនប្រឹងប្រកួតនោះទេ ដោយលោកចាត់ទុកថា នោះគឺជាហេតុផលដែលមិនមែនជាអ្នកប្រដាល់នោះផង ។ លោកថា អ្នកប្រដាល់ទោះត្រូវបើកប្រកួតនៅក្នុងកាលៈទេសៈណាក៏ដោយ ក៏មិនអាចប្រកួតលេងៗមិនយកចិត្តទុកដាក់ផងដែរ។
លោកចាត់ទុកថា នោះគឺជាបញ្ហាដែលធ្វើឱ្យវិស័យប្រដាល់រងការរិះគន់ ជាពិសេសចំពោះអ្នកប្រដាល់ដែលខ្វះឆន្ទៈក្នុងនាមជាអ្នកប្រដាល់។
លោកនៅតែចាត់ទុកថា នេះមិនមែនជាការទទួលខុសត្រូវតែម្យ៉ាងរបស់ម្ចាស់សង្វៀននោះ
ទេ ដោយកំហុសក៏រឹតតែមិនមែនជាការទទួលខុសត្រូវរបស់គណៈកម្មការប្រដាល់ ឬអាជ្ញាកណ្ដាលទៅទៀត បន្ទាប់ពីលោកក៏សម្គាល់ឃើញថា គូប្រដាល់ដែលមានបញ្ហាទាំងអស់នោះ គឺលោកអាជ្ញាកណ្ដាល និងគណៈកម្មការរៀបចំប្រឹងអូសប្រឹងតម្រូវឱ្យប្រកួត ខ្លាំងៗណាស់ ប៉ុន្តែមកពីកីឡាករមិនព្រមចង់ប្រកួតតែម្ដង ។
លោកបានតម្រូវឱ្យគណៈកម្មការពាក់ព័ន្ធបើកការប្រជុំលើករណីនេះម្ដងជាពីរដងរួចមកហើយ ដើម្បីព្រមានចំពោះអ្នកប្រដាល់ដែលមានបញ្ហានេះ ដោយលោកបញ្ជាក់ថា កីឡាករដែលមិនកែទម្លាប់នេះ គឺនឹងដកសិទ្ធិមិនឱ្យឡើងរេញ ដោយមិនចេះតែយោគយល់រឿងកូវីដបានទេ ។ ក្នុងនោះលោកក៏អះអាងថា ក្រោយការព្រមានមិនត្រឹមតែកីឡាករដែលជាប់ឈ្មោះក្នុងបញ្ជីខ្មៅប៉ុណ្ណោះទេ សូម្បីតែកីឡាករផ្សេងក៏មានការប្ដូរទម្លាប់ផងដែរ បើទោះជានៅទទួលស្គាល់ថា ការប្រកួតក្នុងរយៈពេលនេះ ក្រៅពីប្រកួតយកជើងឯក គឺកីឡាករម្ខាងៗនៅប្រកួតលាក់ដៃ។
មិនខុសពីការលើកឡើង គេឃើញនៅគ្រប់សង្វៀន ទាំងអ្នកឈ្នះ និងអ្នកចាញ់ហាក់មិនសូវប្រកួតគ្នាអស់ពីសមត្ថភាព និងអស់ដៃទេដោយកីឡាករភាគច្រើនសុខចិត្តបោះបង់ការប្រកួត ដោយគ្រាន់តែចាញ់ប្រៀបតិចតួច ឬត្រូវរបួសតិចតួចនោះផង ។ ដូច្នេះហើយទើបការប្រដាល់នាពេលចុងក្រោយ សូម្បីតែទស្សនាការ Live ក៏មិនសូវចាប់អារម្មណ៍ ។ ក្នុងនោះសូម្បីតែការរៀបចំដាក់គូខ្លាំងៗឱ្យឡើងប្រកួត ក៏ត្រូវគេសម្គាល់ថា មិនសូវទាក់ទាញចំណាប់អារម្មណ៍នោះដែរ ដោយសារតែអ្នករៀបចំយល់ថា ការប្រកួតនៅក្នុងដំណាក់កាលនេះ ទោះជាអ្នកណាមកប្រកួតក៏មិនល្អជាងនេះដែរ ។
លោក ញាណ សុធី អ្នករៀបចំការប្រកួតនៅសង្វៀនទូរទស្សន៍អាស៊ីអាគ្នេយ៍ បានអះអាងថា រាល់កីឡាករដែលប្រកួតមិនអស់ដៃទាំងអស់លោកមិនទាន់មានវិធានការមិនផ្ដល់តម្លៃខ្លួនដល់អ្នកណាម្នាក់នៅឡើយទេ ដោយសារតែលោកយល់ថា ដំណាក់កាលនេះ អ្នកប្រដាល់ក៏ញញើតញញើមក្នុងការប្រកួតគ្នា ជាពិសេសក្នុងពេលកីឡាករទាំងនោះមានរបួសបន្តិចបន្តួចកើតឡើង ។
លោកបន្តថា ការព្រមានគឺបានត្រឹមតែព្រមាន ប៉ុន្តែឆន្ទៈពិតប្រាកដ គឺអាស្រ័យលើកីឡាករខ្លួនឯង ។ យ៉ាងណាក៏ដោយលោកចាត់ទុកថា ការព្រមានរបស់សហព័ន្ធ និងមន្ត្រីគណៈកម្មការប្រដាល់ចំពោះកីឡាករ គឺជារឿងមួយប្រសើរសម្រាប់គ្រប់បណ្ដាសង្វៀន អាចមានកីឡាករវាយល្អនៅលើសង្វៀនរបស់ខ្លួន៕ (កែសម្រួលដោយ ៖ បុប្ផា)
ចែករំលែកព័តមាននេះ