រាជធានីភ្នំពេញ ៖ ក្រសួងទេសចរណ៍បានចេញសេចក្តីជូនដំណឹងដល់រដ្ឋបាលរាជធានី- ខេត្ត ធ្វើការត្រួតពិនិត្យ និងណែនាំដល់មូលដ្ឋានអាជីវកម្មខារ៉ាអូខេ រង្គសាល ឌីស្កូតែក និងបៀរហ្គាឌិន ឲ្យអនុវត្តឲ្យបានត្រឹមត្រូវ តាមវិធានការនានារបស់រាជរដ្ឋាភិបាល ក្នុងការបង្ការទប់ស្កាត់ការរីករាលដាលនៃជំងឺកូវីដ-១៩។
យោងតាមសេចក្តីប្រកាសរបស់ក្រសួងចេញថ្ងៃទី៣ ខែមិថុនា ឆ្នាំ២០២០នេះ បានបញ្ជាក់ឲ្យថ្នាក់ដឹកនាំពាក់ព័ន្ធ អនុវត្តនូវវិធានការទាំងឡាយរបស់រាជរដ្ឋាភិបាល ដើម្បីទប់ទល់ការរីករាលដាលនៃជំងឺកូវីដ-១៩ ពិសេសចំពោះ មូលដ្ឋានអាជីវកម្ម KTV ក្លឹបកម្សាន្ត (ខារ៉ាអូខេ រង្គសាល ឌីស្កូតែក) និងបៀរហ្គាឌិន នៅតែត្រូវបន្តអនុវត្តឱ្យបាន ម៉ឺងម៉ាត់ ខ្ជាប់ខ្ជួនជាប្រចាំ រហូតដល់មានការជូនដំណឹងជាថ្មី ស្តីពីការបន្ធូរបន្ថយ ឬកែសម្រួលវិធានការនៅពេល ខាងមុខ។
ក្រសួងបានសង្កត់ធ្ងន់ថា «នៅពេលបច្ចុប្បន្ននេះ មានរបាយការណ៍ថា នៅមានមូលដ្ឋានអាជីវកម្ម KTV ក្លឹបកម្សាន្ត (ខារ៉ាអូខេ រង្គសាល ឌីស្កូតែក) និងបៀរហ្គាឌិនខ្លះ នៅតាមរាជធានីភ្នំពេញ ខេត្តមួយចំនួន នៅតែបន្តសកម្មភាព អាជីវកម្ម ដោយល្មើសនឹងវិធានការរបស់រាជរដ្ឋាភិបាល»។
អាស្រ័យហេតុនេះ ក្រសួងទេសចរណ៍សូមរំឭកដល់ អភិបាលនៃគណៈអភិបាលរាជធានី ខេត្ត ត្រូវធ្វើការត្រួតពិនិត្យ និងអនុវត្តវិធានការចំពោះ មូលដ្ឋានអាជីវកម្ម KTV ក្លឹបកម្សាន្ត (ខារ៉ាអូខេ រង្គសាល ឌីស្កូតែក) និងបៀរហ្គាឌិន ឱ្យបានត្រឹមត្រូវតាមការណែនាំរបស់រាជ រដ្ឋាភិបាល៕ ដោយ ៖ ស្រី គំនិត
ចែករំលែកព័តមាននេះ