រាជធានីភ្នំពេញ ៖ មានប្រជាពលរដ្ឋក្រីក្រ ចំនួន២នាក់ បានធ្វើដំណើរដោយម៉ូតូ ក្នុងទិសដៅពីខេត្ត ចូលមករាជធានីភ្នំពេញ ដោយមិនមានពាក់មួកសុវត្ថិភាព ត្រូវបានកម្លាំងសមត្ថកិច្ច នៃអធិការដ្ឋាននគរបាលខណ្ឌច្បារអំពៅ ចាប់ផាកពិន័យ ៦ម៉ឺនរៀល ប៉ុន្តែប្រជាពលរដ្ឋ មានតែ៦ពាន់រៀលគត់ នៅក្នុងខ្លួន ។
ប៉ូលិសចាប់ផាកពិន័យបុរសខាងលើ នៅក្នុងការអនុវត្តរឹតបន្តឹងច្បាប់ចរាចរណ៍ផ្លូវគោក នៅខណ្ឌច្បារអំពៅ យប់ថ្ងៃទី០២ ខែមិថុនា ឆ្នាំ២០២០ នៅចំណុច មុខស្ថានីយ៍ប្រេងតូតាល់ ផ្លូវជាតិលេខ១ ភូមិដើមអំពិល សង្កាត់ច្បារអំពៅ១ ។
ដោយក្តីអាណិត និងការយោគយល់ នៅស្ថានភាពជាក់ស្តែង ព្រោះមានថវិកាតែ ៦,០០០រៀល ឧត្តមសេនីយ៍ទោ បេង ដាណារ៉ា ស្នងការង បានចេញថវិកាផ្ទាល់ខ្លួនចំនួន ៦០,០០០រៀល ជំនួសសម្រាប់ការផាកពិន័យ ដោយមិនមានពាក់មួកសុវត្ថិភាព ។
លោកស្នងការរង ក៏បានណែនាំដល់ប្រជាពលរដ្ឋឲ្យចូលរួមគោរពច្បាប់ចរាចរណ៍ ទាំងអស់គ្នា ក្នុងគោលបំណងការពារអាយុជីវិត ទ្រព្យសម្បត្តិរបស់អ្នក និងអ្នកដទៃ ។
ដោយក្តីរំភើបចំពោះការសណ្តោសប្រណៃនេះ ប្រជាពលរដ្ឋបានអរគុណយ៉ាងខ្លាំងដល់លោកស្នងការរង ដែលមានការយោគយល់ និងជួយចេញថវិកាជំនួសគាត់ សម្រាប់ការផាកពិន័យមួយនេះ ៕
ចែករំលែកព័តមាននេះ