មហន្តរាយធម្មជាតិបំផ្លាញផ្ទះ40ខ្នង ប្រល័យទាំងជីវិតគោក្របី
- កំពង់ឆ្នាំង
ខេត្តកំពង់ឆ្នាំង ៖ នាព្រឹកថ្ងៃទី២ ខែមិថុនា ឆ្នាំ២០២០ កងកម្លាំងប្រដាប់អាវុធមាន នគរបាល កងរាជអាវុធហត្ថ និងយោធា រួមទាំងអាជ្ញាធរមូលដ្ឋានផង…
ខេត្តកំពង់ឆ្នាំង ៖ នាព្រឹកថ្ងៃទី២ ខែមិថុនា ឆ្នាំ២០២០ កងកម្លាំងប្រដាប់អាវុធមាន នគរបាល កងរាជអាវុធហត្ថ និងយោធា រួមទាំងអាជ្ញាធរមូលដ្ឋានផង…
ខេត្តកំពង់ឆ្នាំង ៖ នាព្រឹកថ្ងៃទី២ ខែមិថុនា ឆ្នាំ២០២០ កងកម្លាំងប្រដាប់អាវុធមាន នគរបាល កងរាជអាវុធហត្ថ និងយោធា រួមទាំងអាជ្ញាធរមូលដ្ឋានផង បានចុះទៅជួយជួសជុលផ្ទះជូនប្រជាពលរដ្ឋដែលរងការប៉ះពាល់ដោយខ្យល់កន្ត្រាក់ បណ្ដាលឱ្យខ្លះរលំ និងខ្លះរបើកដំបូល នៅស្រុកសាមគ្គីមានជ័យ ដែលរងគ្រោះចំនួន៤០ខ្នង កាលពីថ្ងៃទី១ ខែមិថុនា ឆ្នាំ២០២០កន្លងទៅ។
លោក អៀរ ប៊ុនធឿន ស្នងការរងនគរបាលខេត្ត បានឲ្យដឹងថា នាព្រឹកថ្ងៃទី២ ខែមិថុនា កងកម្លាំងប្រដាប់អាវុធជាង១០០នាក់ក្នុងនោះមានយោធា នគរបាល និងកងរាជអាវុធហត្ថខេត្ត ដោយមានការចូលរួមពីប្រជាការពារ និងអាជ្ញាធរមូលដ្ឋានផង បានបែងចែកគ្នាជាក្រុមចុះជួយលើក និងជួសជុលផ្ទះជូនប្រជាពលរដ្ឋដែលរងគ្រោះដោយសារខ្យល់កន្ត្រាក់បណ្ដាលឲ្យរបើកដំបូល ជញ្ជាំង និងរលំទាំងស្រុងនៅឃុំចំនួន២ ក្នុងស្រុកសាមគ្គីមានជ័យ ។ ការចុះជួយនេះ មានខ្លះជួសប្រក់ដំបូល បាំងជញ្ជាំង ប៉ុន្តែខ្លះទៀតដែលរលំទាំងស្រុង គឺបានត្រឹមជួយរើគរទុកម្តុំសម្រាប់ម្ចាស់ផ្ទះមានលទ្ធភាពធ្វើនៅថ្ងៃក្រោយ ។
ដោយឡែក តាមការបញ្ជាក់របស់គណៈកម្មការគ្រប់គ្រងគ្រោះមហន្តរាយខេត្ត ឲ្យដឹងថា កាលពីរសៀលថ្ងៃទី១ ខែមិថុនា ឆ្នាំ២០២០ ផ្ទះប្រជាពលរដ្ឋដែលរងគ្រោះដោយសារខ្យល់កន្ត្រាក់ សរុបចំនួន៤០ខ្នង ក្នុងនោះបាក់រលំរាបដល់ដី៥ខ្នង របើកដំបូល ជញ្ជាំង ចំនួន៣៥ខ្នង និងបណ្ដាលឲ្យគោ៣ក្បាលងាប់ដោយសាររន្ទះបាញ់ ។ គ្រោះធម្មជាតិនេះបានកើតឡើងនៅឃុំចំនួន២ គឺឃុំពាមនិងឃុំស្វាយ ស្រុកសាមគ្គីមានជ័យ ។
សូមរំឭកថា ចាប់់ពីរដូវវស្សាមកដល់ ពេលមានភ្លៀងធ្លាក់តែងមានខ្យល់កន្ត្រាក់បោកបក់បង្កគ្រោះមហន្តរាយ បណ្ដាលឲ្យរលំផ្ទះ របើកដំបូលជាបន្តបន្ទាប់ គ្រាន់តែតិចតួចត្រឹមតែ១ឬ២ខ្នងប៉ុណ្ណោះ ។ ជាមួយគ្នានេះ គោក្របីរបស់ប្រជាពលរដ្ឋក៏ត្រូវរន្ទះបាញ់បណ្តាលឱ្យងាប់ជាច្រើនក្បាលជាបន្តបន្ទាប់ ។ ដោយឡែក នៅថ្ងៃទី១ ខែមិថុនា គ្រោះមហន្តរាយដោយខ្យល់កន្ត្រាក់នេះ អាចចាត់ទុកថាជាចំនួនច្រើនជាងថ្ងៃណាៗទាំងអស់ ចាប់តាំងពីដើមរដូវវស្សាឆ្នាំ២០២០នេះមក៕ (កែសម្រួលដោយ ៖ បុប្ផា)
ចែករំលែកព័តមាននេះ