អតីតភរិយារបស់មហាសេដ្ឋីជនជាតិចិនម្នាក់បានក្លាយជាមហាសេដ្ឋីម្នាក់ទៀតប្រចាំអាស៊ី បន្ទាប់ពីទទួលបានភាគហ៊ុនក្រុមហ៊ុនរបស់ស្វាមីដែលមានតម្លៃប្រមាណ ៣.៣ប៊ីលានដុល្លារជាថ្លៃកាត់ចំណងអាពាហ៍ពិពាហ៍ ។
អ្នកស្រី យាន់ លីពីង (Yuan Liping) ដែលជាជនជាតិចិនកាត់កាណាដាបានក្លាយជាមហាសេដ្ឋីបន្ទាប់ពីកាត់ផ្តាច់ចំណងអាពាហ៍ពិពាហ៍ជាមួយលោក ឌូ វៃមីន (Du Weimin) ដែលជាស្តេចវ៉ាក់សាំងក្នុងប្រទេសចិន ។ លោក ឌូ មានទ្រព្យសម្បត្តិប្រមាណ ៦.៧ប៊ីលានដុល្លារ និងបានកាត់ទ្រព្យជិតពាក់កណ្តាលឲ្យទៅអតីតភរិយារបស់ខ្លួន ។
លោកជាអគ្គនាយករបស់ក្រុមហ៊ុន Shenzhen Kangtai Biological Products និងជាគ្រប់គ្រង ៥១.២៦% នៃភាគហ៊ុនទាំងអស់របស់ក្រុមហ៊ុន មុនពេលប្រគល់សិទ្ធិគ្រប់គ្រងភាគហ៊ុនចំនួន ២៣.៩៩% ទៅភរិយាខ្លួន ។
យោងទៅតាមសេចក្តីប្រកាសរបស់ក្រុមហ៊ុនបានឲ្យដឹងថា អ្នកស្រី យាន់ មិនបានព្យាយាមគ្រប់គ្រងក្រុមហ៊ុនទេ និងបានផ្ទេរសិទ្ធិសម្រេចទាំងអស់ទៅលោកឌូផងដែរ ។ ប៉ុន្តែអ្នកស្រីធ្លាប់ជានាយកម្នាក់ក្នុងក្រុមហ៊ុន Kangtai រវាងខែឧសភាឆ្នាំ ២០១១ ដល់ខែសីហាឆ្នាំ ២០១៨ ។ បច្ចុប្បន្ន អ្នកស្រីជាអនុប្រធានគ្រប់គ្រងក្រុមហ៊ុន Beijing Minhai Biotechnology ដែលស្ថិតក្រោមការគ្រប់គ្រងរបស់ Kangtai ដែរ ។
លោក ឌូ ជាមហាសេដ្ឋីដែលកសាងទ្រព្យសម្បត្តិដោយបាតដៃទទេ និងទទួលបានភាពជោគជ័យក្នុងផ្នែកផលិតវ៉ាក់សាំងសម្រាប់ជំងឺថ្លើមប្រភេទ B ក្នុងប្រទេសចិន ។ លោកធំធាត់ឡើងក្នុងគ្រួសារក្រីក្រ និងបានចាប់ផ្តើមចូលរៀនផ្នែកសុខាភិបាលនៅឆ្នាំ ១៩៨៤ ។ ការងារដំបូងរបស់លោកគឺជាអ្នកត្រួតពិនិត្យម្នាក់ មុននឹងក្លាយជាអ្នកលក់វ៉ាក់សាំង ។ នៅឆ្នាំ ១៩៩៥ លោកត្រូវបានឡើងតំណែងជាប្រធានផ្នែកលក់សម្រាប់ក្រុមហ៊ុនមួយ ។
លោកបានក្លាយជាអគ្គនាយករបស់ក្រុមហ៊ុន Kangtai នៅឆ្នាំ ២០០៩ ។
ការលែងលះគ្នាខាងលើស្ថិតក្នុងចំណោមការលែងលះដែលបង្កឲ្យមានការចែកទ្រព្យធំជាងគេក្នុងប្រវត្តិសាស្ត្រ ៕
ចែករំលែកព័តមាននេះ