រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា រថយន្តឃ្លុបដឹកទំនិញមួយគ្រឿងបានបើកបោះពួយក្នុងល្បឿនលឿន ក៏ជ្រុលឡើងចិញ្ចើមផ្លូវ រួចបុករះរថយន្ត២គ្រឿងជាបន្តបន្ទាប់ដែលកំពុងចតស្ងៀម បណ្តាលឱ្យខ្ទេចមុខខ្លួនឯង និងជាប់អ្នកបើកបរក្នុងរថយន្តរងរបួសបាក់ជើងម្ខាងផងដែរ បង្កឱ្យមានការភ្ញាក់ផ្អើលកាលពីម៉ោង៩និង៤៥នាទីព្រឹក ថ្ងៃទី៣ ខែមិថុនា ឆ្នាំ២០២០ នៅតាមផ្លូវជាតិលេខ៥ ស្ថិតក្នុងភូមិសាមគ្គី សង្កាត់ឬស្សកែវ ខណ្ឌឬស្សីកែវ ។
សេចក្តីរាយការណ៍បន្តថា រថយន្តដែលជួបគ្រោះខាងលើនោះម៉ាក ហ៊ីយ៉ាន់ដាយ ឃ្លុបពណ៌សពាក់ស្លាកលេខកណ្តាល 2A 1859 បើកបរដោយបុរសម្នាក់មិនស្គាល់អត្តសញ្ញាណ បានរងរបួសបាក់ជើងងម្ខាង ហើយត្រូវបញ្ជូនទៅសង្គ្រោះនៅមន្ទីរពេទ្យ។ ចំណែករថយន្តដែលឈប់ចតចោលរងគ្រោះទាំង២គ្រឿង គឺមួយគ្រឿងម៉ាកសាំយ៉ុង ពណ៌ស ពាក់ស្លាកលេខភ្នំពេញ 2AA 3496 ជាប្រភេទរថយន្តទេសចរណ៍ខូចខាតកក្រពឹតទ្វារខាងឆ្វេង២ និងមួយគ្រឿងទៀតម៉ាកហ៊ីយ៉ាន់ដាយ ពណ៌ស ពាក់ស្លាកលេខកោះកុង 2A 0706 ត្រូវរថយន្តបង្កបុកពីក្រោយ រួចរុញទៅប៉ះរ៉ឺម៉កម៉ូតូរងការខូចខាត។
តាមប្រភពព័ត៌មានបានឲ្យដឹងថា នៅមុនកើតហេតុ រថយន្តបង្កគ្រោះថ្នាក់បានធ្វើដំណើរ តាមផ្លូវជាតិលេខ៥ ពីត្បូងទៅជើងក្នុងល្បឿនយ៉ាងលឿន លុះមកដល់កន្លែងកើតហេតុ មិនដឹងមូលហេតុអ្វីនោះទេ ស្រាប់តែរថយន្តនោះរ៉េចង្កូតទៅស្តាំដៃ រួចបុករះរថយន្ត២គ្រឿងដែលកំពុងតែឈប់ចតនោះ ។
តាមសាក្សីបានអោយដឹងថា មុនដំបូងគេឃើញ រថយន្តបង្កបានបុករថយន្តទេសចរណ៍ បន្ទាប់មកក៏ទៅបុកពីក្រោយរថយន្តហ៊ីយ៉ាន់ដាយ ពេញទំហឹងទៀត បណ្តាលឱ្យរថយន្តបង្កនោះ ខ្ទេចស្រុញក្បាល ហើយគាបជាប់អ្នកបើកបរតែម្តង បណ្តាលឱ្យរងរបួសធ្ងន់។ ភ្លាមៗអ្នកដំណើរ ព្រមទាំងអ្នកជិតខាងក៏ដូចជាសមត្ថកិច្ច និងអាជ្ញាធរ បាននាំគ្នាជួយគាស់យកជនរងគ្រោះចេញ រួចបញ្ជូនទៅកាន់មន្ទីរពេទ្យ ដើម្បីសង្គ្រោះ ។
ទាក់ទិននឹងគ្រោះថ្នាក់នោះ គេពុំដឹងថា បណ្តាលមកពីមូលហេតុអ្វីនោះទេ? តែសមត្ថកិច្ចមានការសង្ស័យថា អ្នកបើកបរងងុយដេក រួចងោកមួយភាំង ទើបបណ្តាលឱ្យមានគ្រោះថ្នាក់បែបនេះតែម្តង។ បច្ចុប្បន្ននេះ រថយន្តទាំង៣គ្រឿង ត្រូវបាននគរបាលបញ្ជូនទៅកាន់ការិយាល័យចរាចរណ៍ផ្លូវគោក ដើម្បីដោះស្រាយសងការខូចខាតនៅពេលក្រោយ៕ (កែសម្រួលដោយ ៖ បុប្ផា)
ចែករំលែកព័តមាននេះ