ទីក្រុងហាណូយ ៖ ប្រទេសវៀតណាម ប្រកាសឲ្យប្រុងប្រយ័ត្នចំពោះវីរុសថ្មីមួយ Div1 ដែលអាចនឹងបង្កគ្រោះថ្នាក់ដល់ឧស្សាហកម្មចិញ្ចឹមបង្គា នេះបើតាមសារព័ត៌មាន New Straits Times Press ចុះផ្សាយកាលពីថ្ងៃទី០១ មិថុនា ២០២០នេះ ។
ដោយមើលឃើញពីបញ្ហានេះ ក្រសួងកសិកម្ម និងអភិវឌ្ឍន៍ជនបទវៀតណាម (MARD) បានអំពាវនាវឲ្យមានការត្រួតពិនិត្យ ឲ្យបានម៉ឺងម៉ាត់ និងចាត់វិធានការត្រួតពិនិត្យតាមព្រំដែនពិសេសលើការចរាចរណ៏អាហារសមុទ្រ ។
ក្រសួងកសិកម្ម បានស្នើដល់គណៈកម្មាធិការថ្នាក់ជាតិប្រឆាំងការរត់ពន្ធទំនិញក្លែងក្លាយ នៅខេត្តភាគខាងជើងប្រទេសវៀតណាម បង្កើនការត្រួតពិនិត្យ បង្គា,បង្កង និងប្រភេទវារីវប្បកម្ម (ត្រី,កង្កែប,អន្ទង់ ជាដើម) ដែលនាំចូលមកពីប្រទេសចិន ដើម្បីទប់ស្កាត់ការរីករាលដាល នៃមេរោគនេះ ដល់ប្រទេសវៀតណាម ។
បើតាម អនុរដ្ឋមន្ត្រីក្រសួងកសិកម្ម និងអភិវឌ្ឍន៍ជនបទលោក ហ្វុង ឌុកទៀន អោយដឹងថា វីរុសដែលគេស្គាល់ថា Virus Decapod iridescent1 (វីរុស Div1) បានបង្កការខាតបង់យ៉ាងច្រើន ដល់កសិដ្ឋានចិញ្ចឹមបង្កង ក្នុងប្រទេសចិន នាប៉ុន្មានឆ្នាំថ្មីៗនេះ ។
យោងតាមសារព័ត៌មាន South China Morning Post បានផ្សាយថា វីរុស Div1 ត្រូវបានរកឃើញជាលើកដំបូង ក្នុងឆ្នាំ២០១៤ ក្នុងសំណាកបង្កងក្រហម នៅខេត្តហ្វូជៀន ក្នុងសំណាកបង្កងពណ៌ស នៅខេត្តចឺជាំង និងបង្គាទឹកសាបយក្ស នៅតំបន់ផ្សេងទៀត នៃប្រទេសចិន ។ វីរុសនេះរាតត្បាតជាថ្មីនៅខែកុម្ភៈ ឆ្នាំ២០២០នេះ នៅខេត្តក្វាងទុង ដែលឆ្លងដល់កសិដ្ឋានចិញ្ចឹមបង្គា ។ អត្រាឆ្លងនិងភាពសាហាវនៃវីរុសគឺគួរអោយខ្លាចណាស់ ព្រោះថា វីរុសDiv1នេះ បង្ករោគរយៈពេលតែ២ ទៅ៣ថ្ងៃដំបូងប៉ុណ្ណោះ បង្គានៅក្នុងស្រះ ត្រូវងាប់ទាំងអស់ ។
ទោះយ៉ាងណា បច្ចុប្បន្ននេះ មិនមានព័ត៌មានណាមួយ អំពីការឆ្លងវីរុស Div1 នៅក្នុងប្រទេសវៀតណាម នៅឡើយទេ ។
ដើម្បីទប់ស្កាត់វីរុស កុំអោយឆ្លងចូលប្រទេសវៀតណាម ក្រសួងកសិកម្មបានស្នើសុំគណៈកម្មាធិការជាតិ គ្រប់គ្រងនៅតាមបណ្តាខេត្តភាគខាងជើងដែលមានព្រំប្រទល់ជាប់ប្រទេសចិន ត្រូវធ្វើការជាមួយភ្នាក់ងារសន្តិសុខ និងមន្ត្រីកសិកម្ម ដើម្បីទប់ស្កាត់ការរត់ពន្ធ កូនបង្កង,បង្គា និងប្រភេទវារីវប្បកម្ម គ្រប់ប្រភេទ ដែលនាំចូល ៕
ចែករំលែកព័តមាននេះ