ខេត្តព្រះសីហនុ ៖ តាមសេចក្ដីរាយការណ៍បានអោយដឹងថា សមត្ថកិច្ចបានបង្ក្រាបករណីប៉ុនប៉ងចាប់ជំរិតទារប្រាក់ និងអំពើលួចមានស្ថានទម្ងន់ទោស កាលពីថ្ងៃទី២៩ ឧសភា ២០២០ វេលាម៉ោង២និង៣០រសៀល ។ កម្លាំងជំនាញផែនការងារនគរបាលព្រហ្មទណ្ឌ បានជិះល្បាតតាមដងផ្លូវដែលងាយកើតមានបទល្មើស ។
ពេលទៅដល់ចំណុចម្តុំខាងមុខមជ្ឈមណ្ឌលពាណិជ្ជកម្មក្រុងព្រះសីហនុ (ហៅផ្សារចិន) ស្ថិតនៅភូមិ១ សង្កាត់៤ ក្រុង-ខេត្តព្រះសីហនុ ក៍ប្រទះឃើញរថយន្ត១គ្រឿងម៉ាក TOYOTO PRIUS ពណ៌ទឹកប្រាក់ និងយកដីមកលាបបិទស្លាកលេខរថយន្តគួរឲ្យសង្ស័យ ទើបកម្លាំងល្បាតបានជិះម៉ូតូតាមពីក្រោយ លុះដល់ចំណុចផ្លូវអូរ៣ ស្ថិតនៅភូមិ៥ សង្កាត់៤ ក្រុង-ខេត្តព្រះសីហនុ ជនសង្ស័យបានដឹងខ្លួន ក៍បន្ថែមល្បឿនរថយន្តដើម្បីរត់គេច ។
ភ្លាមនោះសមត្ថកិច្ចក៏បានសម្រេចចិត្តស្ទាក់រថយន្ត និងឃាត់ខ្លួនជនសង្ស័យចំនួន៤នាក់ (ជនជាតិខ្មែរ១នាក់និងជនជាតិចិន៣នាក់) រួចបន្តធ្វើការឆែកឆេររថយន្តឃើញមានកូនកាំបិតស្នៀត១ដើម ស្នាប់ដៃ១ សោខ្នោះចំនួន២ និងទូរស័ព្ទដៃ៤គ្រឿង រួចបញ្ជូនជនសង្ស័យទាំង៤នាក់ មកសាកសួរនៅស្នងការដ្ឋាននគរបាលខេត្តព្រះសីហនុ ។
ជនសង្ស័យចំនួន៤នាក់ដែលត្រូវឃាត់ខ្លួន ១-ឈ្មោះ ជា លក្ខណៈបញ្ញា ភេទប្រុស អាយុ២០ឆ្នាំ ជនជាតិខ្មែរ មុខរបរគ្មានការងារធ្វើ មានទីលំនៅសង្កាត់ច្បារអំពៅ២ ខណ្ឌច្បារអំពៅ២ រាជធានីភ្នំពេញ ។ ២-ឈ្មោះ YUE MING WEI ភេទប្រុស អាយុ៣១ឆ្នាំ ជនជាតិចិន មុខរបរឈ្មួញកណ្តាល គ្មានលិខិតឆ្លងដែនជាប់ខ្លួន ស្នាក់នៅភូមិ១ សង្កាត់៤ ក្រុង-ខេត្តព្រះសីហនុ ។ ៣-ឈ្មោះ LIU JIE ភេទប្រុស អាយុ៣១ឆ្នាំ ជនជាតិចិន មុខរបរអ្នកគ្រប់គ្រងកាស៊ីណូ ហ៊ួយហ័រ គ្មានលិខិតឆ្លងដែនជាប់ខ្លួន ស្នាក់នៅភូមិ១ សង្កាត់៤ ក្រុង-ខេត្តព្រះសីហនុ ។ ៤-ឈ្មោះ ZENG WEI XING ភេទប្រុស អាយុ៣៣ឆ្នាំ ជនជាតិចិន មុខរបរមិនពិតប្រាកដ គ្មានលិខិតឆ្លងដែនជាប់ខ្លួន ស្នាក់នៅភូមិ១ សង្កាត់៤ ក្រុង-ខេត្តព្រះសីហនុ ។
វត្ថុតាងដែលបានរឹបអូសមាន កាំបិតស្នៀត១ដើម ស្នាប់ដៃ១ កូនសោខ្នោះ១ ទូរស័ព្ទដៃចំនួន៤គ្រឿង រថយន្ត១គ្រឿងម៉ាក TOYOTO PRIUS ពណ៌ទឹកប្រាក់ ពាក់ស្លាកលេខភ្នំពេញ២BF-២៧៤៩ ។ បន្ទាប់ពីសួរនាំរួច ជនសង្ស័យទាំង៤នាក់បានសារភាពថា ពួកខ្លួនមានបំណងចាប់ស្រីជនជាតិចិនម្នាក់ឈ្មោះ Niu Niu ជាបុគ្គលិកហាងម៉ាស្សាឈ្មោះ ជីងហាវ នៅម្តុំផ្លូវកែងតុលាការចាស់ ស្ថិតក្នុងភូមិ៣ សង្កាត់៤ ក្រុង-ខេត្តព្រះសីហនុ ដើម្បីជំរិតទារប្រាក់ តែត្រូវសមត្ថកិច្ចឃាត់ខ្លួនទាន់ពេលវេលា ។
ក្នុងចំណោមជនសង្ស័យទាំង៤នាក់ខាងលើ មានជនសង្ស័យចំនួន២នាក់ (១-ឈ្មោះ ជា លក្ខណៈបញ្ញា និងឈ្មោះ ZENG WEI XING បានសារភាពថា ពួកខ្លួនបានចូលរួមក្នុងករណីប្លន់ នៅថ្ងៃទី១០ មីនា ២០២០ វេលាម៉ោង២១និង៤៧នាទី នៅចំណុចហាងឈ្មោះ ជៀហុង ស្ថិតក្នុងភូមិ៥ សង្កាត់៤ ក្រុង-ខេត្តព្រះសីហនុ ជាមួយបក្ខពួកជនជាតិចិន៤នាក់ទៀត ។ បច្ចុប្បន្នជនសង្ស័យ ត្រូវបានកម្លាំងជំនាញកសាងសំណុំរឿងតាមនីតិវិធី បញ្ជូនទៅសាលាដំបូងខេត្តព្រះសីហនុ ៕ (កែសម្រួលដោយ ៖ បុប្ផា)
ចែករំលែកព័តមាននេះ