រាជធានីភ្នំពេញ ៖ សង្វៀនទូរទស្សន៍CNCសហការជាមួយសហព័ន្ធកីឡាប្រដាល់គុនខ្មែរ នឹងរៀបចំឱ្យមានព្រឹត្តិការណ៍ប្រកួតប្រដាល់ថ្មីមួយទៀតដែលមានឈ្មោះថា«អាឡិចហ្សង់ដែនដីប្រយុទ្ធគុនខ្មែរ»។ នេះបើយោងតាមសន្និសីទសារព័ត៌មានមួយដែលបានធ្វើឡើងនៅសង្វៀនទូរទស្សន៍CNCកាលពីព្រឹកថ្ងៃទី១ មិថុនា ឆ្នាំ២០២០។
លោក ម៉ុល រ៉ាស៊ី ប្រធានផ្នែកលក់ទូរទស្សន៍CNCបានឱ្យដឹងថា វិស័យកីឡាប្រដាល់គុនខ្មែរសព្វថ្ងៃកំពុងតែមានការរីកចម្រើននិងល្បីល្បាញទូទាំងព្រះរាជាណាចក្រកម្ពុជា និងនៅលើពិភពលោក ។ ជាមួយគ្នានេះដែរ CNC ក៏ជាផ្នែកមួយបានចូលរួមជួយជំរុញនិងលើកមុខមាត់ប្រដាល់គុនខ្មែររបស់យើងនេះដែរ ។ ដូច្នេះហើយដើម្បីឱ្យមរតកដូនតារបស់យើងកាន់តែបង្កើននូវភាពល្បីល្បាញថែមទៀត CNCបាននាំមកនូវកម្មវិធីប្រដាល់ថ្មីមួយទៀតគឺ«អាឡិចហ្សង់ដែនដីប្រយុទ្ធគុនខ្មែរ»។
កម្មវិធីនេះនឹងដំណើរការប្រកួតជាផ្លូវការចាប់ពីសប្ដាហ៍នេះតទៅនៅសង្វៀនឬស្សីកែវរៀងរាល់ថ្ងៃអាទិត្យវេលាម៉ោង១៤និង៣០នាទីក្រោមការជួយឧបត្ថម្ភពីក្រុមហ៊ុនស្រាAlexand ហើយសហព័ន្ធកីឡាប្រដាល់គុនខ្មែរជាអ្នកផ្ដល់កីឡាករនិងមន្ត្រីបច្ចេកទេស ។ កម្មវិធីនេះត្រូវបានសម្រិតសម្រាំងយកកីឡាករចំនួន១០រូបរៀងរាល់ការប្រកួតដោយក្នុងនោះមានចំនួន២គូគឺគូប្រកួតទី៣និងទី៥ទទួលបានតម្លៃខ្លួនជាលក្ខណៈអន្តរជាតិ។
ដោយឡែក គូប្រកួតទី៥អ្នកឈ្នះទទួលបានប្រាក់រង្វាន់លើកទឹកចិត្តបន្ថែមរហូតដល់ទៅ២លានរៀលឯណោះ។
លោក ជ័យ ឧត្តម ប្រធានផ្នែកលក់របស់ក្រុមហ៊ុនស្រាAlexandបានឱ្យដឹងផងដែរថាគោលបំណងសំខាន់ដែលក្រុមហ៊ុនចូលរួមជួយឧបត្ថម្ភការប្រកួតកីឡាប្រដាល់នាពេលនេះគឺជាការរួមចំណែកលើកស្ទួយវិស័យកីឡាប្រដាល់គុនខ្មែរឱ្យកាន់តែមានការរីកចម្រើនខ្លាំងឡើងថែមទៀត ។ មិនតែប៉ុណ្ណោះក៏ដើម្បីចូលរួមលើកស្ទួយជីវភាពប្រចាំថ្ងៃរបស់កីឡាករប្រដាល់គុនខ្មែរឱ្យកាន់តែមានជីវភាពធូរធារថែមមួយកម្រិតទៀត ។ ជាមួយគ្នានេះលោកក៏បានផ្ដាំផ្ញើរទៅដល់កីឡាករនិងគណៈកម្មការបច្ចេកទេសទាំងអស់ត្រូវយកចិត្តទុកដាក់ឱ្យបានខ្ពស់ក្នុងការការពារនិងបង្ការពីការឆ្លងជំងឺកូវីដ-១៩។
លោកឧត្តមសេនីយ៍ ងិន ភិរម្យ អនុប្រធានសហព័ន្ធកីឡាប្រដាល់គុនខ្មែរបានផ្ដាំផ្ញើរទៅដល់មន្ត្រីបច្ចេកទេស ចៅក្រម អាជ្ញាកណ្ដាលទាំងអស់ ត្រូវអនុវត្តឱ្យបានម៉ឺងម៉ាត់នូវរាល់ការកាត់ក្ដីត្រូវឱ្យមានភាពយុត្តិធម៌មិនលំអៀង។លោកបន្តថា សព្វថ្ងៃនេះមេរោគកូវីដ-១៩កំពុងតែរាតត្បាតយ៉ាងខ្លាំងនៅលើពិភពលោកក្នុងនោះរួមទាំងកម្ពុជាយើងផងដែរ ។ ប៉ុន្តែមួយរយៈមកនេះយើងព្យាបាលជាសះស្បើយបាន១០០% ប៉ុន្តែយើងនៅតែមានការប្រុងប្រយ័ត្នខ្ពស់កុំឱ្យរលកនៃការឆ្លងលើកទី២កើតឡើងម្ដងទៀត ។
អ្វីដែលធ្វើឱ្យយើងអាចដំណើរការប្រកួតឡើងវិញបាននាពេលនេះដោយសារតែមានការអនុញ្ញាតដ៏ខ្ពង់ខ្ពស់ពីសំណាក់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ នៅថ្ងៃទី៧ ឧសភា ឆ្នាំ២០២០ លោកបានមានប្រសាសន៍លើកឡើងអំពីវិស័យប្រដាល់គុនខ្មែរឱ្យមានការប្រកួតឡើងវិញ ប៉ុន្តែក្នុងលក្ខណៈប្រកួតបិទទ្វារបានន័យថាមិនឱ្យមានអ្នកចូលទស្សនាផ្ទាល់នោះទេ ។
ក្នុងនាមរូបលោកតំណាងឱ្យសហព័ន្ធកីឡាប្រដាល់គុនខ្មែរទាំងមូល លោកបានថ្លែងអំណរគុណដល់ស្ថានីយទូរទស្សន៍ CNC ដែលចាប់ដៃគូជាមួយក្រុមហ៊ុនស្រាAlexandរៀបចំឱ្យមានព្រឹត្តិការណ៍នៃការប្រកួតនេះឡើង ធ្វើឱ្យកីឡាករប្រដាល់មានសកម្មភាពប្រកួតឡើងវិញអាចរកប្រាក់កម្រៃដើម្បីផ្គត់ផ្គង់ជីវភាពគ្រួសារប្រចាំថ្ងៃបាន ។ លោកសង្ឃឹមថា គណៈកម្មការបច្ចេកទេស ចៅក្រម អាជ្ញាកណ្ដាលទាំងអស់នឹងខិតខំអនុវត្តការប្រកួតឱ្យបានរលូនចាប់ពីពេលនេះទៅ ៕ (កែសម្រួលដោយ ៖ បុប្ផា)
ចែករំលែកព័តមាននេះ