ប្រទេសចិន ៖ តាមប្រភពព័ត៌មាន Medium បានឱ្យដឹងថា ឪពុកម្តាយជនជាតិចិននាពេលនេះ បានជ្រើសរើសយកវិធីមើលថែកូនមួយចំនួនពីស្ត្រីម្នាក់នៅក្នុងទីក្រុងសានតុង នៃខេត្តប៊ិនចូវដែលបានធ្វើឱ្យកូនៗរបស់នាងភ័យខ្លាចនឹងការលេងទូរស័ព្ទ។
ពេលកូនប្រុសកំពុងដេក ស្ត្រីជាម្តាយបានយកម្សៅពណ៌ខ្មៅ ដែលប្រើប្រាស់សម្រាប់ផាត់មុខរបស់ស្រីៗ ទៅលាបនៅជុំវិញភ្នែករបស់កូនប្រុសនាង។ ក្រោយពេលភ្ញាក់ពីដេក កូនប្រុសម្នាក់នោះដែលចូលចិត្តលេងទូរស័ព្ទបានដើរទៅកាន់មុខកញ្ចក់ឆ្លុះមុខ ហើយក៏ស្រែកយំភ្លាមៗតែម្តង។
ឪពុកក្មេងបានប្រាប់គាត់ថា ភ្នែកខ្មៅៗដូចខ្លាឃ្មុំផេនដានេះ គឺជាលទ្ធផលនៃការលេងទូរស័ព្ទច្រើនពេក។ ដោយសារតែភ័យខ្លាំងពេក ក្មេងប្រុសនោះក៏ស្រែកខ្លាំងៗថា នឹងឈប់លេងជារៀងរហូត។ គេបានស្រែកថា៖ «ខ្ញុំនឹងមិនលេងទៀតទេ។ ខ្ញុំពិតជាមិនលេងទៀតមែន»។
ស្ត្រីជាម្តាយ បានបន្តបង្ហោះវីដេអូពីសកម្មភាពរបស់កូនប្រុសរបស់ខ្លួននៅលើបណ្តាញសង្គម។ គាត់បានប្រាប់អ្នកយកព័ត៌មានថា វិធីសាស្ត្រនេះ មានប្រសិទ្ធភាពណាស់ ហើយកូនប្រុសរបស់គាត់លែងលេងទូរស័ព្ទច្រើនទៀតហើយ៕ ដកស្រង់ចេញពីវេបសាយ ៖ medium (កែសម្រួលដោយ ៖ បុប្ផា)
ចែករំលែកព័តមាននេះ