រាជធានីភ្នំពេញ ៖ ជនសង្ស័យម្នាក់ បានប្រើល្បិចឆបោកស្ត្រីចំណាស់ម្នាក់កំពុងជិះកង់ដើររើសអេតចាយតាមផ្លូវស្ងាត់ ហើយមានកាបូបលុយព្យួរជាប់នឹងដៃកង់ ។ ពេលឃើញបែបនេះ ជនសង្ស័យបានជិះម៉ូតូទៅជិតរួចបានធ្វើជាសួរថា «មីងៗតើស្គាល់រោងចក្រផលិតសរសៃគុយទាវឬអត់ ?»…
រាជធានីភ្នំពេញ ៖ ជនសង្ស័យម្នាក់ បានប្រើល្បិចឆបោកស្ត្រីចំណាស់ម្នាក់កំពុងជិះកង់ដើររើសអេតចាយតាមផ្លូវស្ងាត់ ហើយមានកាបូបលុយព្យួរជាប់នឹងដៃកង់ ។ ពេលឃើញបែបនេះ ជនសង្ស័យបានជិះម៉ូតូទៅជិតរួចបានធ្វើជាសួរថា «មីងៗតើស្គាល់រោងចក្រផលិតសរសៃគុយទាវឬអត់ ?» ខណៈនោះ ស្ត្រីអ្នករើសអេតចាយ បានឆ្លើយឆ្លងជាមួយភ្លេចគិតការពារកាបូបលុយ ស្រាប់តែជននេះឆក់យកកាបូបពីដៃកង់របស់គាត់ រួចបានជិះម៉ូតូរត់គេចខ្លួន ប៉ុន្តែភ្លាមៗនោះ ស្ត្រីរងគ្រោះបានស្រែកឆោឡោ បង្កឲ្យមានការភ្ញាក់ផ្អើល ទើបកម្លាំងនគរបាលប៉ុស្តិ៍កន្ទោកកំពុងល្បាតជិតនោះ បានដេញចាប់ខ្លួនបានភ្លាមៗ ។
ហេតុការណ៍នេះ បានកើតឡើងកាលពីវេលាម៉ោង៤រសៀលថ្ងៃទី២៩ ខែឧសភា ឆ្នាំ២០២០ នៅត្រង់ចំណុចមុខរោងចក្រស័ង្កសី ស្ថិតនៅក្នុងភូមិព្រៃបឹង សង្កាត់កន្ទោក ខណ្ឌកំបូល រាជធានីភ្នំពេញ ។ជនសង្ស័យខាងលើឈ្មោះ ប៉ុក សុខរ៉ា ភេទប្រុស អាយុ២៣ឆ្នាំ ជាកម្មករសំណង់ ស្នាក់នៅផ្ទះជួលក្នុងភូមិព្រៃបឹង សង្កាត់កន្ទោក ។ ចំណែកស្ត្រីរងគ្រោះ ឈ្មោះ ទ្រី ជា អាយុ៥៨ឆ្នាំ ស្នាក់នៅផ្ទះជួលក្នុងភូមិនោះដែរ ហើយនៅក្នុងកាបូបយួរគាត់នោះមានលុយចំនួន១.៦០០ដុល្លារ ដែលសន្សំទុករាប់ឆ្នាំមកហើយ ។
នគរបាលបានប្រាប់ឲ្យដឹងថា នៅមុនពេលកើតហេតុ ស្ត្រីខាងលើបានជិះកង់ចេញពីផ្ទះជួល ដើររើសអេតចាយតាមផ្លូវដោយមានកាបូបលុយ១ព្យួរនៅជាប់នឹងដៃកង់របស់គាត់ផងដែរ ។ ខណៈនោះស្រាប់តែជនសង្ស័យជិះម៉ូតូ១គ្រឿងម៉ាកZoomer-X ពណ៌ខៀវពាក់ស្លាកលេខភ្នំពេញ 1FE-9942 ទៅឈប់ជិត រួចហើយប្រើល្បិចធ្វើជាសួររករោងចក្រផលិតសសៃគុយទាវ ហើយក៏ឆក់យកកាបូបលុយរបស់គាត់ ។ ភ្លាមនោះ គាត់ស្រែកខ្លាំងៗថា ចោរៗនិងរត់ដេញតាមក្រោយផង ទើបបង្កឲ្យមានការភ្ញាក់ផ្អើលឡើង ។ គាប់ជួនសំណាងល្អ ដោយ កម្លាំងនគរបាលប៉ុស្តិ៍កន្ទោកកំពុងល្បាតជិតនោះស្រាប់ ក៏ជួយដេញតាមចាប់ខ្លួនបានភ្លាមៗតែម្ដង ព្រមទាំងដកហូតយកបានកាបូបលុយប្រគល់ជូនគាត់វិញ ។
បន្ទាប់មក នាំជនសង្ស័យខាងលើ ទៅសាកសួរនិងកសាងសំណុំរឿងដើម្បីបញ្ជូនទៅសាលាដំបូងចាត់ការតាមច្បាប់ ។ មិនដឹងថាចោរម្នាក់នេះដឹងថាយាយរើសអេតចាយមានលុយច្រើនបែបនេះដាក់តាមខ្លួន ឬយ៉ាងណានោះទេ តែសម្រាប់មនុស្សទូទៅឬក៏ចោរឆក់ខ្លះទៀត ប្រហែលជាគ្មានចេតនា ឆក់កាបូបលុយគាត់នោះឡើយ ព្រោះគាត់ជាស្ត្រីក្រីក្រដើររើសអេតចាយ ៕
ចែករំលែកព័តមាននេះ