រាជធានីភ្នំពេញ ៖ កាលពីព្រឹកថ្ងៃទី១ ខែមិថុនា ឆ្នាំ២០២០ កម្លាំងនគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញ បានបញ្ជូនជនសង្ស័យចំនួន៣នាក់ទៅសាលាដំបូងរាជធានីភ្នំពេញ ពាក់ព័ន្ធនឹងករណីលួចមានស្ថានទម្ងន់ទោស(ប្លន់កាបូបប្រាក់) ។
ជនសង្ស័យទាំង៣នាក់នេះមាន ៖
១-ឈ្មោះ ភាង ភ័ណ្ឌ ភេទប្រុស អាយុ៤៥ឆ្នាំមុខរបរមិនពិតប្រាកដ ស្នាក់នៅផ្ទះជួលលេខ២៩ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ (ប្លន់ និងជួញដូរគ្រឿងញៀន)
២-ឈ្មោះ ជា រ៉ាន់ ភេទប្រុស អាយុ៤៥ឆ្នាំ មុខរបរមិនពិតប្រាកដ ស្នាក់នៅផ្ទះជួលលេខ២៩ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ (ប្លន់និងជួញដូរគ្រឿងញៀន) និង៣-ឈ្មោះ ហ៊ុយ សុខា ភេទប្រុស អាយុ៦៣ឆ្នាំ មុខរបរលក់ម្ហូបពិសេស ស្នាក់នៅភូមិសាឡូង សង្កាត់កំបូល ខណ្ឌកំបូល រាជធានីភ្នំពេញ (ប្លន់) ។
សម្ភារដែលរឹបអូសមាន ម៉ូតូ២គ្រឿង គឺហុងដាសេ១២៥ និងអ៊ែរប្លេ៊ត កាំភ្លើងខ្លីម៉ាកកា៥៩ចំនួន២ដើម បង់២ គ្រាប់៧គ្រាប់ គ្រឿងញៀន៤៧៨,៣២ក្រាម និងថ្នាំគ្រាប់រូបក្បាលខ្មោច ពណ៌កាប់ស្តាំងចំនួន២៥គ្រាប់ ។ លោកវរសេនីយ៍ឯក អេង សោភា នាយការិយា ល័យនគរបាលព្រហ្មទណ្ឌកម្រិតធ្ងន់រាជធានីភ្នំពេញ បានឲ្យដឹងថា កាលពីវេលាម៉ោងប្រមាណ៤និង៣០នាទីរសៀលថ្ងៃទី១៤ ខែឧសភា ឆ្នាំ២០២០ នៅមុខផ្ទះលេខ៣៩២ ផ្លូវលេខ៣៦៧ភូមិកណ្តាល សង្កាត់ច្បារអំពៅទី២ ខណ្ឌច្បារអំពៅ មានករណីចោរ៣នាក់ធ្វើសកម្មភាពភ្ជង់ប្លន់យកកាបូបប្រាក់ពីជនរងគ្រោះម្នាក់ឈ្មោះ ហេង លីជូ ភេទស្រី អាយុ៤៥ឆ្នាំ មុខរបរលក់មាស រួចគេចខ្លួនបាត់ទៅ ។
ក្រោយពីកើតមានអំពើប្លន់នេះ ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ក៏ដូចជាឧត្តមសេនីយ៍ទោ សុង លី ស្នងការរងទទួលផែនយុត្តិធម៌ បានដាក់បទបញ្ជាទៅការិយាល័យព្រហ្មទណ្ឌ ឲ្យបើកការស៊ើបអង្កេតនិងស្រាវជ្រាវស្វែងរកមុសញ្ញាចោរប្លន់មួយក្រុមនោះ ។
លុះមកដល់ថ្ងៃទី២៩ ខែឧសភា ឆ្នាំ២០២០កម្លាំងនគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញ សហការជាមួយនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ អធិការដ្ឋាននគរបាលខណ្ឌច្បារអំពៅ អធិការដ្ឋាននគរបាលខណ្ឌមានជ័យ និងអធិការដ្ឋាននគរបាលខណ្ឌកំបូល ក្រោមការសម្របសម្រួលពីលោក ប្លង់ សុផល ព្រះរាជអាជ្ញារងអមសាលាដំបូងរាជធានីភ្នំពេញ ឈានដល់ការឆែកឆេរនិងឃាត់ខ្លួនជនសង្ស័យចំនួន៥នាក់ ពាក់ព័ន្ធនឹងករណីប្លន់អ្នកលក់មាសនៅផ្សារច្បារអំពៅ ។ ប៉ុន្តែក្រោយការ សាកសួរគឺមានតែ៣នាក់ទេ ដែលរួមគ្នាធ្វើសកម្មភាពប្លន់ ឯ២នាក់ទៀតជាក្រុមជនពាក់ព័ន្ធនឹងគ្រឿងញៀនតែក៏ស្ថិតនៅក្នុងក្រុមនេះដែរ ។
លោក អេង សោភា បន្តថា ក្រោយពីត្រូវឃាត់ខ្លួន ជនសង្ស័យទាំង៣នាក់សារភាពប្រហាក់ប្រហែលគ្នាថា ពួកគេពិតជាបានធ្វើសកម្មភាពភ្ជង់ប្លន់កាបូបប្រាក់ពីជនរងគ្រោះប្រាកដមែន ប៉ុន្តែនៅពេលប្លន់បានកាបូបនោះហើយ នាំគ្នាយកទៅឆែកមើល គឺនៅក្នុងកាបូបគ្មានគ្រឿងអលង្ការមានតម្លៃទេ មានតែទូរស័ព្ទដៃ២គ្រឿងប៉ុណ្ណោះ ខុសពីអ្វីដែលពួកគេផ្តល់ព័ត៌មានឲ្យមិនច្បាស់ ។ ពេលនោះ ម្នាក់ៗហួសចិត្ត មិននឹកស្មាន
ថា ជនរងគ្រោះមានល្បិចខ្ពស់ ចេះដាក់គ្រឿងអលង្ការទៅក្នុងកាបូបផ្សេង ធ្វើឲ្យផែនការប្លន់របស់ពួកគេត្រូវបរាជ័យ ហើយទីបំផុតត្រូវសមត្ថកិច្ចចាប់ខ្លួនបាន ៕
ចែករំលែកព័តមាននេះ