ខេត្តបាត់ដំបង ៖ យ៉ាងហោចណាស់ លំនៅឋានជាង២០ខ្នងបានរងការខូចខាត និងមនុស្ស២នាក់បានរងរបួសធ្ងន់និងស្រាល ដោយសារខ្យល់កន្ត្រាក់វាយប្រហារ កាលពីវេលាម៉ោង៤រសៀលថ្ងៃទី០១ មិថុនា ឃុំចំនួន០២ ក្នុងស្រុកមោងឬស្សី។ នេះបើតាមសេចក្ដីរាយការណ៍ពីមន្ត្រីមូលដ្ឋាន។
អភិបាលរងស្រុកមោងឬស្សី លោក បឿន សុវណ្ណ បានឱ្យដឹងថា ភ្លៀងមិនខ្លាំងទេ តែបង្កឲ្យមានខ្យល់កន្ត្រាក់វាយប្រហារយ៉ាងខ្លាំងក្លា ធ្វើឲ្យខូខខាតលំនៅឋានរបស់ពលរដ្ឋអស់ចំនួន២៦ខ្នង និងរបួសមនុស្ស២នាក់ ។ លោកបានឱ្យដឹងទៀតថា នៅឃុំព្រៃស្វាយ ខូចខាតលំនៅឋាន២៤ខ្នង និងចំនួន០២ខ្នងទៀត នៅឃុំគារ។
ដោយឡែក ពលរដ្ឋដែលរងគ្រោះ បើតាមលោកបឿន សុវណ្ណ បានប្រាប់ថា ម្នាក់ឈ្មោះ អាន អុន ប្រុសអាយុ៥៧ឆ្នាំ របួសធ្ងន់កំពុងសម្រាកព្យាបាលនៅមន្ទីរពេទ្យបង្អែកខេត្ត និងម្នាក់ទៀតឈ្មោះ នួន ផុន ប្រុសអាយុ៥៣ឆ្នាំ របួសស្រាល។ ជនរងគ្រោះទាំង២នាក់ រស់នៅភូមិចាមរអា ឃុំព្រៃស្វាយ។ ជនរងគ្រោះទាំង២នាក់ត្រូវផ្ទះរលំសង្កត់លើ។ ប៉ុន្តែលោកអភិបាលរងរូបនេះក៏បានបញ្ជាក់ដែរថា វត្តចាមរអាក៏រងការខូចខាតផ្នែកខ្លះ ដោយសារខ្យល់កន្ត្រាក់នេះដែរ។
យ៉ាងណាក៏ដោយ បើតាមសេចក្ដីរាយការណ៍បានបញ្ជាក់ថា ពេលនេះ អាជ្ញាធរស្រុកនិងមន្ត្រីជំនាញកំពុងចុះទៅកាន់កន្លែងកើតហេតុ ដើម្បីពិនិត្យ និងធ្វើរបាយការណ៍ជួនថ្នាក់លើ ដើម្បីសុំជំនួយសង្គ្រោះបឋមពីសាខាកាកបាទក្រហមខេត្ត ជួយដល់គ្រួសាររងគ្រោះទាំងនោះហើយ៕
ចែករំលែកព័តមាននេះ