រាជធានីភ្នំពេញ៖ ពាក្យចាស់តែងតែពោលថា នៅពីក្រោយភាពជោគជ័យរបស់បុរសម្នាក់ គឺតែងតែមានស្ត្រីចូលរួមចំណែកយ៉ាងផុសផុល។ តួយ៉ាងលោកឧកញ៉ា លី ហួរ ដែលជាសហគ្រិនជោគជ័យមួយរូបនៅកម្ពុជា គឺមានប្រវតិតស៊ូយ៉ាងខ្លាំងក្លា និងចាប់ផ្តើមដើមទុនមុខជំនួញដំបូងត្រឹម…
រាជធានីភ្នំពេញ៖ ពាក្យចាស់តែងតែពោលថា នៅពីក្រោយភាពជោគជ័យរបស់បុរសម្នាក់ គឺតែងតែមានស្ត្រីចូលរួមចំណែកយ៉ាងផុសផុល។ តួយ៉ាងលោកឧកញ៉ា លី ហួរ ដែលជាសហគ្រិនជោគជ័យមួយរូបនៅកម្ពុជា គឺមានប្រវតិតស៊ូយ៉ាងខ្លាំងក្លា និងចាប់ផ្តើមដើមទុនមុខជំនួញដំបូងត្រឹម «ជ្រូកមួយក្បាល» និងបច្ចុប្បន្ន ជាប្រធានក្រុមហ៊ុន លី ហួរ គ្រុប ដែលមានក្រុមហ៊ុនបុត្រសម្ព័ន្ធចំនួន៨ និងត្រូវបានមហាជនចាត់ទុកជាសេដ្ឋីមួយរូបនៅកម្ពុជាពិតជាទទួលស្គាល់ថា ភាពជោគជ័យរបស់រូបលោកនាពេលបច្ចុប្បន្ននេះ គឺមានការរួមចំណែកយ៉ាងធំធេងពីលោកជំទាវ ព្រោះបើពុំមានការជួយជ្រោមជ្រែងពីក្រោយរបស់លោកជំទាវទេនោះ គឺពុំមានជោគជ័យក្នុងដៃលោកនាពេលនេះទេ ។
ថ្លែងប្រាប់សហការីនៃសារព័ត៌មានកោះសន្តិភាពពីការិយាល័យដ៏ស្រស់ស្អាតមួយកន្លែង លោកឧកញ៉ា លី ហួរ បានពោលបញ្ជាក់ជាមួយនឹងទឹកមុខមុតមាំលាយនឹងស្នាមញញឹម ថា «ប្រាកដណាស់ ចំណុចនេះពិតជាត្រឹមត្រូវ ជុំវិញពាក្យលើកឡើងថា នៅពីក្រោយភាពជោគជ័យរបស់បុរសម្នាក់ គឺតែងតែមានស្ត្រីចូលរួមចំណែកយ៉ាងសកម្ម ។ លោកជំទាវរបស់ខ្ញុំ គាត់បានជួយច្រើនណាស់។ ដើម្បីជោគជ័យទៅបាន បើសិននៅក្នុងគ្រួសារមួយ ហើយភរិយាមិនជួយជ្រោមជ្រែង ជួយលើកទឹកចិត្ត ហើយចេះតែបង្កបញ្ហារករឿងមិនឈប់ ប្រាកដណាស់វានឹងធ្វើឲ្យបុរសនឹងគ្មានស្មារតី គ្មានគំនិតអីនឹងទៅប្រកបរបររកស៊ី អញ្ចឹងវានឹងមិនអាចជោគជ័យទៅបានទេ»។
លោកឧកញ្ញ៉ា លី ហួរ ដែលមានស្រុកកំណើតនៅខេត្តកំពង់ចាមនិងបច្ចុប្បន្នមានកូនប្រុសស្រីចំនួន ៤ រួបបានមានប្រសាសន៍បន្ថែមថា «អ្វីដែលគេតែងតែពោលថា ការងារនឹងជោគ ជ័យទៅបានគឺមានភរិយាជាកម្លាំងចិត្តនិងជួយជម្រុញពីក្រោយគឺជាការពិត ។
ភាពជោគ ជ័យរបស់ខ្ញុំគឺមានការរួមចំណែកយ៉ាងធំធេងពីលោកជំទាវរបស់ខ្ញុំ ព្រោះលោកជំទាវគាត់ពិតជាលះបង់គ្រប់បែបយ៉ាងទាំងអស់ លើកតម្កើងគ្រប់យ៉ាងដើម្បីគ្រួសារ ហើយអ្វីៗទាំងអស់ដែលគាត់បានធ្វើ គឺដើម្បីកូនៗទាំងអស់។ គាត់លះបង់គ្រប់បែបយ៉ាងទាំងអស់ គាត់ធ្វើគ្រប់យ៉ាងដើម្បីតែគ្រួសារនិងកូនៗ ។ ហើយខ្ញុំពិតជាមានមោទនភាពដែលមានភរិយាល្អគ្រប់យ៉ាងរហូតដល់ខ្ញុំប្រសិទ្ធនាមឲ្យគាត់ថាជាឧត្តមភរិយា ហើយកូនៗក៏ដាក់ងារថា វីរមាតា ព្រោះគាត់ខិតខំណាស់ មិនដែលទំនេរដៃនោះទេទាំងការជួយខាងជំនួញ និងការគ្រប់គ្រងផ្ទះសម្បែងនិងមើលថែកូនៗ ដូច្នេះភរិយាខ្ញុំ គាត់តែងតែលើកទឹកចិត្តខ្ញុំគ្រប់បែបយ៉ាងនិងជួយខ្ញុំគ្រប់បែបយ៉ាងដើម្បីឲ្យខ្ញុំដើរទៅមុខ។ យើងមានកម្លាំងចិត្ត មានពេលវេលាក្នុងការគិតគូរអំពីអាជីវរកម្មផ្សេងៗដោយគ្មានការប្រឆាំង ការជំទាស់ ការបង្កហេតុនាំបង្អាក់ណាមួយពីភរិយា ពីក្រុមគ្រួសារ ទើបខ្ញុំទៅមុខនិងទទួលជោគជ័យទៅបាន» ។
នៅពេលសាកសួរបញ្ជាក់ថា ក្រៅពីការផ្តល់ជាកម្លាំងចិត្តដែលជួយឲ្យលោកឧកញ៉ាទទួលបានជោគជ័យដូចសព្វថ្ងៃ តើលោកជំទាវបានធ្វើអ្វីខ្លះទៀតសម្រាប់រូបលោកនិងគ្រួសារកូន លោកឧកញ៉ា ពោលឡើងដោយទឹកមុខពោរពេញដោយមោទនភាព «ការពិតទៅលោកជំទាវមានភារកិច្ចធំធេងណាស់ ក្នុងការជួយឲ្យខ្ញុំក្លាយជាសហគ្រិនជោគជ័យមួយរូបក្នុងថ្ងៃនេះ ។ គាត់បានជួយគ្រប់គ្រងក្រុមហ៊ុនមួយ ពេលខ្ញុំពន្យល់ណែនាំគាត់នូវមុខជំនួញនោះ គឺគាត់ពិតជាធ្វើបានជោគជ័យយ៉ាងល្អក្នុងមុខជំនួញហាងប្តូរប្រាក់ ហើយកន្លែងប្តូរប្រាក់ បើមិនពូកែគឺគ្រប់គ្រងមិនបានទេ។
ដូច្នេះនេះសបញ្ជាក់ឲ្យឃើញថាលោកជំទាវខ្ញុំគឺគាត់ពូកែណាស់ ទូរស័ព្ទ ៤ទៅ៥ គ្រឿងដែលគាត់ត្រូវប្រើប្រាស់ចាត់ចែងការងារ ក៏ប៉ុន្តែចំពោះកិច្ចការផ្សេងៗទៀតដែលខ្ញុំជាអ្នកគិតគូរផ្តួចផ្តើមធ្វើ លោកជំទាវមិនដែលជំទាស់ទេ តែមានតែការលើកទឹកចិត្ត ហើយក៏មិនចង់ឲ្យមានការបង្កើតអ្វីឲ្យច្រើនទៀតដែរ ដោយសារតែគាត់រវល់នឹងមុខជំនួញរបស់គាត់ ហើយលៃលកពេលវេលាជួយគ្រប់គ្រងមុខជំនួញផ្សេងទៀតសឹងមិនបាន អញ្ចឹងគាត់មិនចង់ឲ្យខ្ញុំហត់នឿយជាងនេះទៀតទេ ដោយសារតែគាត់ក៏រវល់នឹងមុខជំនួញរបស់គាត់ ហើយខ្ញុំក៏រវល់ដូចគ្នា ។
តែយ៉ាងណាមិញ គាត់តែងតែលើកទឹកចិត្តនិងជម្រុញចិត្តយើងជានិច្ច ដែលនេះជាកម្លាំងចិត្តដ៏ខ្លាំងក្លាធ្វើឲ្យរូបខ្ញុំមានកម្លាំងចិត្តបំពេញការងារនិងមុខជំនួញដោយសុវត្ថិភាព ដោយជោគជ័យបាន។ អញ្ចឹងសរុបមកវិញ ឧត្តមភរិយាគឺសំខាន់ណាស់សម្រាប់គ្រួសារនីមួយៗ» ។ សូមបញ្ជាក់ថា លោកឧកញ៉ា លី ហួរ បច្ចុប្បន្ននេះមានកូន ៤ នាក់ ដែលក្នុងនោះគឺមានប្រុស៣នាក់ ស្រីមួយនាក់។ លោកមានជីវប្រវត្តកំសត់និងឆ្លាប់បានឆ្លងកាត់នូវការធ្វើមុខជំនួញគ្រោះថ្នាក់ៗដល់ជីវិតជាច្រើន ។ លោកគឺជាកូនកសិករក្រីក្រម្នាក់ដែលមានដើមកំណើតនៅឃុំទ្រាន ស្រុកកំពង់សៀម ខេត្តកំពង់ចាម។
លោកឧកញ៉ា គឺជាកូនកំព្រាឪពុកតាំងតែពីអាយុ៩ឆ្នាំមកម្ល៉េះ។ ដូច្នេះគ្រប់យ៉ាងដែលមាននៅក្នុងដៃរបស់លោកឧកញ៉ា លី ហួរ នាពេលបច្ចុប្បន្ននេះគឺមិនមែនកើតឡើងត្រឹមមួយថ្ងៃនោះទេ តែទ្រព្យសម្បត្តិស្តុកស្តម្ភដែលមាននៅក្នុងដៃរបស់លោកនាពេលនេះគឺកើតចេញពីការតស៊ូក្នុងមុខជំនួញជាច្រើន រាប់ចាប់តាំងពីការដឹកអំពិលទុំទៅលក់នៅព្រំដែនវៀតណាម ការជួញដូរទំនិញពីព្រំដែនថៃ ធាក់កង់ដឹកស្ករត្នោតក្នុងចំងាយដីរាប់រយគីឡូម៉ែត្រ ជួញដូរក្រណាត់និងការកើតនូវគំនិតនៃការលក់ចល័តជាដើម ៕
ចែករំលែកព័តមាននេះ