ខេត្តមណ្ឌលគិរី ៖ បើតាមសេចក្តីរាយការណ៍បានឱ្យដឹងថា មានរថយន្តដឹកចេកខ្នាតធំមួយគ្រឿងបានក្រឡាប់ធ្លាក់ផ្លូវដោយខ្លួន បណ្តាលឲ្យអ្នកបើកបរ និងរួមដំណើរទាំង២នាក់គាបជាប់ក្នុងកាប៊ីនរថយន្ត ចំណែកអ្នករួមដំណើរម្នាក់ទៀតរងរបួសស្រាល បង្កឱ្យមានការភ្ញាក់ផ្អើលកាលពីម៉ោង១០និង៤០នាទីយប់ ថ្ងៃទី០១ ខែមិថុនា ឆ្នាំ២០២០ ស្ថិតនៅចំណុចគីឡូម៉ែត លេខ១០១ លើផ្លូវជាតិលេខ៧៦A ក្នុងភូមិពូហ្សាម ឃុំសែនមនោរម្យ ស្រុកអូររាំង ខេត្តមណ្ឌលគិរី ។
បើតាមសមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍ក្រឡាប់ដោយខ្លួនឯង ដែលបង្កឡើងដោយរថយន្ដ ប្រភេទ V1 ពាក់ផ្លាកលេខ កំពង់ចាម ៣A-៨៨៤៩ ដឹកចេកចេញពីក្រុមហ៊ុនវៀតណាម នៅស្រុកលំផាត់ ខេត្តរតនគិរី ដោយនៅក្នុងរថយន្ដមានគ្នាជិះចំនួន៣នាក់ គឺ ៖
១-ឈ្មោះថុន ថាន ភេទប្រុស អាយុ២៦ឆ្នាំ រស់នៅខេត្តព្រះសីហនុ ជាអ្នកបើកបរ រងរបួសស្រាល ហើយគាបជាប់នៅក្នុងកាប៊ីនរថយន្ដ។ ២-ឈ្មោះ ព្រីម ដេត ភេទប្រុស អាយុ២៧ឆ្នាំ ជនជាតិខ្មែរ រស់នៅភូមិដូនមា ឃុំស្ដៅកោង ស្រុកបាភ្នំ ខេត្តព្រៃវែង ជាអ្នករួមដំណើរ រងរបួសជើងខាងស្ដាំ និងដាច់រលាត់ចង្កេះ ដោយបានគាបជាប់ក្នុងកាប៊ីនរថយន្ដ និង៣-ឈ្មោះខៀវ សារឹទ្ធ ភេទប្រុស អាយុ៤២ឆ្នាំ ជនជាតិខ្មែរ រស់នៅខេត្តកំពង់ចាម ជាម្ចាស់រថយន្ដ គ្មានរងរបួស ។
សមត្ថកិច្ចបន្តថា ចំពោះមូលហេតុដែលបង្កឱ្យមានគ្រោះថ្នាក់នេះ ដោយសារតែអ្នកបើកបរមិនសូវស្គាល់ស្ថានភាពផ្លូវច្បាស់ ខណៈដែលមានចំណោតច្រើន រួមទាំងបើកលឿនផងនោះ ទើបបណ្តាលឱ្យជួបគ្រោះថ្នាក់បែបនេះតែម្តង។
សមត្ថកិច្ចបន្តថា ក្នុងប្រតិបត្តិការជួយសង្គ្រោះនេះផងដែរ កម្លាំងអធិការដ្ឋាននគរបាលស្រុកអូររាំង និងប្រជាពលរដ្ឋ បានជួយសង្គ្រោះជនរងគ្រោះដែលគាបជាប់នឹងកាប៊ីនរថយន្ដបានដោយជោគជ័យ នៅវេលាម៉ោង២ទៀបភ្លឺឈានចូលថ្ងៃទី២ ខែខែមិថុនា ឆ្នាំ២០២០ នេះ៕ (កែសម្រួលដោយ ៖ បុប្ផា)
ចែករំលែកព័តមាននេះ