រាជធានីភ្នំពេញ ៖ បន្ទាប់ពីភ្លៀងបានធ្លាក់១មេធំកាលពីវេលាម៉ោងប្រហែលជិត១យប់រំលងអាធ្រាត្រឈានចូលថ្ងៃទី២ ខែមិថុនា ឆ្នាំ២០២០ ធ្វើឱ្យទឹកជន់លិចភូមិឋាន រួមទាំងរោងចក្រមួយចំនួននៅក្នុងភូមិសាស្ត្រសង្កាត់ចោមចៅទី៣ ខណ្ឌពោធិ៍សែនជ័យ រហូតធ្វើឲ្យកម្មករកម្មការិនីរោងចក្រខ្លះមិនអាចចេញទៅធ្វើការងារបានឡើយ ។…
រាជធានីភ្នំពេញ ៖ បន្ទាប់ពីភ្លៀងបានធ្លាក់១មេធំកាលពីវេលាម៉ោងប្រហែលជិត១យប់រំលងអាធ្រាត្រឈានចូលថ្ងៃទី២ ខែមិថុនា ឆ្នាំ២០២០ ធ្វើឱ្យទឹកជន់លិចភូមិឋាន រួមទាំងរោងចក្រមួយចំនួននៅក្នុងភូមិសាស្ត្រសង្កាត់ចោមចៅទី៣ ខណ្ឌពោធិ៍សែនជ័យ រហូតធ្វើឲ្យកម្មករកម្មការិនីរោងចក្រខ្លះមិនអាចចេញទៅធ្វើការងារបានឡើយ ។ រហូតដល់វេលាព្រឹកថ្ងៃដដែល រោងចក្រមួយចំនួននោះត្រូវបានបិទទ្វារជាបណ្ដោះអាសន្នចំនួន១ថ្ងៃ ដោយខ្លាចមានការឆ្លងចរន្តអគ្គីសនីបណ្ដាលឲ្យឆក់កម្មករកម្មការិនី ឬដោយប្រការណាមួយ ព្រោះទឹកបានហូរចូលលិចដល់ម៉ាសុីនសង្វាក់ផលិតកម្មតែម្ដង។
កម្មករបាននាំគ្នាធ្វើដំណើរពីផ្ទះទៅកាន់រោងចក្រដើម្បីចូលធ្វើការដូចរៀងរាល់ថ្ងៃ ប៉ុន្តែពេលទៅដល់ បន្ទាប់ពីបានឃើញស្ថានភាពបែបនេះអត់ហ៊ានចូលទៅកាន់កន្លែងធ្វើការឡើយ ហើយបានត្រឹមតែនាំគ្នាជ្រួលច្រាលនៅមុខរោងចក្រតែប៉ុណ្ណោះ ហើយអ្នកខ្លះបានអង្គុយនៅលើតុនៅក្នុងរោងបាយ និងខ្លះទៀតក៏បានត្រឡប់ទៅផ្ទះវិញភ្លាមៗដែរ ។ ម្យ៉ាងទៀត ភ្លៀងមួយមេធំនេះបានធ្វើឲ្យតំបន់ខ្លះដែលមិនធ្លាប់លិចទឹកពីមុនផង ស្រាប់តែពេលនេះត្រូវទឹកជន់លិច ហើយមូលហេតុគឺបណ្ដាលមកពីកន្លែងខ្លះចាក់ដីលុបប្រឡាយហើយដាក់ជំនួសមកវិញដោយលូតូចៗធ្វើឲ្យទឹកស្ទះហូរមិនទាន់ឬហូរយឺត។
ជាក់ស្ដែង រោងចក្រកាត់ដេរសម្លៀកបំពាក់ចំនួន៣រួមមាន ១-រោងចក្រកាត់ដេរ ហ៊ែនសាំ អិលធីឌី១(HANDSOME LTD-1), ២-រោងចក្រកាត់ដេរសម្លៀកបំពាក់សុីដាប់បែលយូខេអេជហ្គាមេន ខេមបូឌា លីមីធីត និង៣-រោងចក្រកាត់ដេរសម្លៀកបំពាក់ហ៊ូលូហ្គាមេន ខូ អិលធីឌី ដែលរោងចក្រទាំង៣នេះមានទីតាំងស្ថិតនៅក្នុងភូមិព្រៃទា និងភូមិត្រពាំងពោធិ៍ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។ កម្មករមិនអាចធ្វើការបានទេ ព្រោះទឹកបានហូរជន់លិចដល់ម៉ាសុីសង្វាក់ផលិតកម្មអស់ទៅហើយ រីឯថៅកែក៏មិនអនុញ្ញាតឲ្យកម្មករចូលធ្វើការដែរ ព្រោះខ្លាចឆ្លងចរន្តអគ្គិសនីបណ្ដាលឲ្យឆក់ ឬមានគ្រោះថ្នាក់ណាមួយកើតឡើងដល់កម្មករ នេះបើតាមការអះអាងពីសន្តិសុខដែលយាមនៅទីនោះ ។ មិនតែប៉ុណ្ណោះក៏នៅមានរោងចក្រមួយចំនួនទៀត រួមទាំងលំនៅដ្ឋានប្រជាពលរដ្ឋជាច្រើន និងផ្លូវថ្នល់ផងនៅតំបន់នោះ និងបណ្ដាសង្កាត់មួយចំនួនទៀតក្នុងខណ្ឌពោធិ៍សែនជ័យ ក៏ត្រូវបានទឹកជន់លិចដូចគ្នាផងដែរ។
កម្មករបាននិយាយថា ពួកគាត់បានធ្វើការនៅរោងចក្រទាំងនេះច្រើនឆ្នាំមកហើយមិនដែលជួបប្រទះទឹកជន់លិច ក្រោយពេលភ្លៀងធ្លាក់ខ្លាំងបែបនេះទេ ។ កន្លងមកទោះបីជាលិចក៏អាចនៅធ្វើការបានដែរ ព្រោះតែក្រោយពេលភ្លៀងធ្លាក់រួចលិចមិនយូរប៉ុន្មានទេនិងស្រកទៅវិញហើយ ។ ដោយឡែកនៅឆ្នាំនេះស្រាប់តែទឹកជន់លិចទាំងផ្លូវ ហើយហូរចូលទៅក្នុងរោងចក្រលិចកន្លែងធ្វើការនិងម៉ាសុីសង្វាក់ផលិតកម្មបែបនេះ។ដូច្នេះជាបឋមនោះពួកគាត់មិនហ៊ានចូលទៅធ្វើការឡើយមានតែត្រឡប់ទៅផ្ទះវិញសិនទេ ព្រោះខ្លាច មានការឆ្លងចរន្តអគ្គិសនី បណ្តាលឱ្យឆក់ ឬអាចមានគ្រោះថ្នាក់ណាមួយកើតឡើង ទាល់តែទឹកស្រកអស់ឬខាងរោងចក្រដាក់ម៉ាសុីនបូមចេញអស់ ទើបហ៊ានចូលទៅធ្វើជាធម្មតាដូចរាល់ថ្ងៃបានជាបន្តទៀត។
ចំណែកអ្នកភូមិនៅតំបន់នោះបាននិយាយថា យប់មិញភ្លៀងខ្លាំង និងរយៈពេលយូរទើបរាំង ម្យ៉ាងដោយសារតែការអភិវឌ្ឍន៍មានការចាក់ដីលុបត្រពាំងស្រះនិងថ្លុកគ្រប់កន្លែង ជាពិេសសកន្លែងខ្លះចាក់ដីលុបប្រឡាយហើយដាក់ជំនួសមកវិញដោយប្រព័ន្ធលូតូចៗផងនោះ ទើបធ្វើឲ្យទឹកដក់ជន់លិចគ្រប់ផ្លូវថ្នល់និងផ្ទះសម្បែងជាច្រើន ហើយអ្វីដែលជាការកត់សម្គាល់ថែមទៀតនោះគឺនៅកន្លែងមួយចំនួនដែលមិនធ្លាប់លិចពីមុនរាប់ឆ្នាំមកហើយនោះ ពេលនេះបែរត្រូវបានទឹកលិចដែរហើយ ព្រោះតែមូលហេតុខាងលើនោះ រីឯកន្លែងដែលធ្លាប់ទឹកលិចក៏កាន់តែលិចខ្លាំងឡើងថែមទៀត។
លោកវ៉ា សាវឿន ចៅសង្កាត់ចោមចៅទី៣បានប្រាប់ឲ្យដឹងថា អាជ្ញាធរបានរៀបចំកាយប្រឡាយនិងដាក់ប្រព័ន្ធលូធំៗរួចអស់ហើយមិនមានលូតូចទេ ប៉ុន្តែដោយសារតែភ្លៀងខ្លាំងម្យ៉ាងទឹកបុកគ្រប់ទីកន្លែង ទើបលិច ហើយទឹកច្រើនទើបមានការហូរយឺតយ៉ាវ ហើយពិតជាមានរោងចក្រមួយចំនួនត្រូវទឹកជន់លិចមែន តែលោកមិនបានដឹងថាត្រូវផ្អាកឬបិទបណ្ដោះអាសន្ននោះទេ ។ ប៉ុន្តែតាមការដែលលោកចុះត្រួតពិនិត្យមើលជាក់ស្ដែងរហូតដល់វេលាម៉ោង៩ព្រឹកថ្ងៃទី២ ខែមិថុនា ផ្លូវមួយចំនួនដែលត្រូវទឹកលិចបានស្រកទៅវិញខ្លះៗហើយ ចំណែករោងចក្រមួយចំនួនក៏បានដាក់ម៉ាសុីនបូមទឹកចេញបណ្ដើរៗហើយដែរ។
លោកចៅសង្កាត់ចោមចៅទី៣បានបន្តថា រីឯការជន់លិចនេះគឺមានមូលហេតុផ្សេងៗដូចជារោងចក្រខ្លះបានសាងសង់រយៈពេលជាង២០ឆ្នាំមកហើយ និងដោយសារតែការអភិវឌ្ឍន៍លើវិស័យហេដ្ឋារចនាសម្ព័ន្ធផ្លូវខ្លះបានស្ថាបនា២ទៅ៣ដងមកហើយ ដូច្នេះធ្វើឲ្យរោងចក្រទាបជាងផ្លូវទើបពេលភ្លៀងធ្លាក់ខ្លាំងត្រូវទឹកជន់លិច ហើយបើទោះជាបែបណា អាជ្ញាធរសង្កាត់និងខណ្ឌបានខ្វល់ខ្វាយខ្លាំងណាស់លើបញ្ហានេះ ហើយតែងបានចុះមើលនិងមានវិធានការគ្រប់ពេលវេលា មិនព្រងើយកន្តើយឡើយ៕ (កែសម្រួលដោយ ៖ ធីតា)
ចែករំលែកព័តមាននេះ