ពង្រឹងកម្លាំងការពារសន្តិសុខនៅច្រកទ្វារព្រំដែនប៉ោយប៉ែត
- បន្ទាយមានជ័យ
ខេត្តបន្ទាយមានជ័យ ៖ អាជ្ញាធរ និងសមត្ថកិច្ចចម្រុះខេត្តបន្ទាយមានជ័យ ដឹកនាំដោយលោកង៉ោ ម៉េងជ្រួន អភិបាលរងខេត្ត លោក គឹម វណ្ណៈ…
ខេត្តបន្ទាយមានជ័យ ៖ អាជ្ញាធរ និងសមត្ថកិច្ចចម្រុះខេត្តបន្ទាយមានជ័យ ដឹកនាំដោយលោកង៉ោ ម៉េងជ្រួន អភិបាលរងខេត្ត លោក គឹម វណ្ណៈ…
ខេត្តបន្ទាយមានជ័យ ៖ អាជ្ញាធរ និងសមត្ថកិច្ចចម្រុះខេត្តបន្ទាយមានជ័យ ដឹកនាំដោយលោកង៉ោ ម៉េង
ជ្រួន អភិបាលរងខេត្ត លោក គឹម វណ្ណៈ អភិបាលរងខេត្ត លោក គាត ហ៊ុល អភិបាលក្រុងប៉ោយប៉ែត រួមទាំងមេបញ្ជាការអាវុធហត្ថ លោកស្នងការរងខេត្តនៅព្រឹកថ្ងៃទី១ មិថុនា ២០២០ បានដឹកនាំកម្លាំងពង្រឹងសន្តិសុខការពារសណ្តាប់ធ្នាប់យ៉ាងតឹងរឹងជាលើកទី២ នៅក្រុងប៉ោយប៉ែត ពិសេសនៅចំណុចមាត់ច្រកទ្វារអន្តរជាតិប៉ោយប៉ែត ដើម្បីទប់ស្កាត់ការប៉ុនប៉ងធ្វើបាតុកម្ម ពីក្រុមណាមួយដែលប្រកាសកន្លងមក ។
ផ្លូវវាងពីទឹកដីកាស៊ីណូ ឆ្ពោះទៅមាត់ច្រកទ្វារអន្តរជាតិ គេឃើញសមត្ថកិច្ចបានដាក់បារ៉ាស់ត្រួតពិនិត្យមិនឲ្យអ្នកគ្មានភារកិច្ចណាម្នាក់ឆ្លងកាត់ឡើយ ។ ទោះជាបែបនេះក្តី នៅថ្ងៃទី១ មិថុនា មិនមានបាតុភាពណាមួយកើតឡើងទេ។ ដោយឡែកលើដងផ្លូវជាតិលេខ៥ មុខការិយាល័យគយនិងរដ្ឋាករប៉ោយប៉ែត សមត្ថកិច្ចក៏បានដាក់បារ៉ាស់ត្រួតពិនិត្យអ្នកឆ្លងកាត់ចេញចូលច្រកទ្វារអន្តរជាតិដូចគ្នា ។ នៅតាមដើមផ្លូវបត់ចូលតភ្ជាប់ពីផ្លូវជាតិលេខ៥ ក្នុងសង្កាត់ប៉ោយប៉ែត អាជ្ញាធរបានដាក់ពង្រាយកម្លាំងតាមគោលដៅនីមួយៗ មានទាំងខែលការពារ ទប់ទល់ទៀតផង ។
សមត្ថកិច្ចអាវុធហត្ថខេត្តនិងក្រុងប៉ោយប៉ែត ក៏បានចុះល្បាតតាមដងផ្លូវជាច្រើននាក់ ។ អំឡុងពេលសមត្ថកិច្ចពង្រឹងសន្តិសុខនេះ មនុស្សមួយចំនួនដែលគ្មានភារកិច្ច ហើយនាំគ្នាផ្តិតយករូបភាពឬឡាយក៏ត្រូវសមត្ថកិច្ចហាមឃាត់ មិនឲ្យធ្វើការថតរូបភាពឬឡាយ(Live) តាមបណ្តាញសង្គមនោះទេ ។ ស្ថានភាពនៅមាត់ច្រកទ្វារអន្តរជាតិប៉ោយប៉ែត ស្ងប់ស្ងាត់តាំងពីព្រឹកព្រលឹម រហូតម៉ោង១រសៀលថ្ងៃដដែល ទើបរថយន្តដឹកទំនិញរបស់ថៃ ហ៊ានធ្វើចរាចរចូលមកកម្ពុជាឡើងវិញ ។
ឈ្មួញខ្មែរដែលរកស៊ីទិញលក់ត្រីដឹកមកពីថៃ បានសម្តែងកាព្រួយបារម្ភថា ត្រីពួកគាត់អាចនឹងខូច ប្រសិនបើមិនអាចឆ្លងព្រំដែនចូលមកកម្ពុជាថ្ងៃនេះ ។ ថ្វីត្បិតនៅរសៀលថ្ងៃដដែល រថយន្តថៃអាចធ្វើចរាចរចេញចូលកម្ពុជាបាន តែការរឹតបន្តឹងសន្តិសុខ និងការពារសណ្តាប់ធ្នាប់របស់អាជ្ញាធរ និងសមត្ថកិច្ចកម្ពុជានៅតែបន្តធ្វើយ៉ាងតឹងរឹងតាមគោលដៅនីមួយៗដដែល ។
ក្នុងថ្ងៃដដែលនេះ សមត្ថកិច្ចកម្ពុជាថៃដែលភាគីកម្ពុជា ដឹកនាំដោយលោក ង៉ោ ម៉េងជ្រួន លោក គឹម វណ្ណៈ អភិបាលរងខេត្ត លោក គាត ហ៊ុល អភិបាលក្រុងប៉ោយប៉ែត អមដោយមន្ត្រីនិងសមត្ថកិច្ចពាក់ព័ន្ធជាច្រើននាក់ ។ ភាគីថៃដឹកនាំដោយលោក វរៈ ផាន់ស៊ុវ៉ាន់នុត អភិបាលខេត្តស្រះកែវ និងមន្ត្រីសមត្ថកិច្ចពាក់ព័ន្ធជាច្រើននាក់បានជួបចាប់ដៃគ្នាលើស្ពានមិត្តភាពកម្ពុជា-ថៃនៃច្រកទ្វារអន្តរជាតិប៉ោយប៉ែតខ្លងលឹក ២លើក ដោយកាលពីវេលាព្រឹកពិភាក្សាគ្នាពង្រឹងកិច្ចសហប្រតិបត្តការធ្វើយ៉ាងណាឲ្យស្ពានព្រំដែនខាងលើធ្វើចរាចរ ដឹកទំនិញឆ្លងកាត់ជាប្រក្រតី និងរសៀលនេះភាគីកម្ពុជាស្នើសុំទៅភាគីថៃ ៖
ទី១-ឲ្យពលរដ្ឋកម្ពុជាចេញ-ចូលទៅប្រកបអាជីវកម្មនៅក្នុងស្រុកអារញ្ញ ពិសេសផ្សាររុងក្លឿដូចដើម ។
ទី២-ឲ្យកម្មករអូសរទេះចេញ-ចូលនិងមានកន្លែងធ្វើចត្តាឡីស័កត្រឹមត្រូវ ព្រោះយោងទៅលើស្ថានភាពកូវីដ១៩ នៅស្រុកអារញ្ញថៃ និងក្រុងប៉ោយប៉ែតកម្ពុជា ពេលនេះគ្មានអ្នកឆ្លងមេរោគកូវីដថ្មីទៀតឡើយ និងសំណើផ្សេងៗមួយចំនួនទៀត ។
មុននេះសមាគមសេដ្ឋកិច្ចក្រៅប្រព័ន្ធបានធ្វើលិខិតស្នើសុំទៅរដ្ឋបាលសាលាខេត្តបន្ទាយមានជ័យ គ្រោងអ្នកចូលរួមធ្វើបាតុកម្មដែលមានមនុស្សចូលរួមប្រមាណ១.៥០០នាក់ មានអាជីករនិងកម្មករអូសរទេះ អ្នករត់ម៉ូតូឌុប និងរត់កង់បី ដើម្បីទាមទារសុំឱ្យភាគីថៃបើកច្រកទ្វារព្រំដែនថៃ-កម្ពុជា ឱ្យអាជីវករបានចូលលក់ដូរ និងកម្មករអូសរទេះចេញចូលផ្សាររុងក្លឿប្រទេសថៃ ដូចធម្មតាឡើងវិញ និងព្រមានថា បើភាគីថៃមិនបើកទេ ធ្វើបាតុកម្មបិតរថយន្តដឹកទំនិញថៃមិនឱ្យចូលមកកម្ពុជាដូចគ្នា ។
អភិបាលខេត្តបន្ទាយមានជ័យឯកឧត្តម អ៊ុំ រាត្រី បានបញ្ជាក់ថា ការបិទច្រកទ្វារព្រំដែនកម្ពុជា-ថៃនេះគឺភាគីថៃបិទដើម្បីបង្ការនិងទប់ស្កាត់ការរាតត្បាតដោយកូវីដ១៩ ហើយត្រូវបានប្រកាសដាក់ប្រទេសក្នុងគ្រាអាសន្នបន្ត១ខែទៀតរហូតដល់ខែមិថុនា ឆ្នាំ២០២០ ៕
ចែករំលែកព័តមាននេះ