ខេត្តកំពង់ឆ្នាំង ៖ សម្ដេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីព្រះបរមរាជវាំង បានមានប្រសាសន៍ផ្ដាំផ្ញើដល់បងប្អូនប្រជាពលរដ្ឋត្រូវយកចិត្តទុកដាក់ធ្វើស្រូវវស្សាក្នុងឆ្នាំនេះឱ្យបានច្រើនដើម្បី ផ្គត់ផ្គង់ ជីវភាពគ្រួសារនិងនាំចេញទៅក្រៅ…
ខេត្តកំពង់ឆ្នាំង ៖ សម្ដេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីព្រះបរមរាជវាំង បានមានប្រសាសន៍ផ្ដាំផ្ញើដល់បងប្អូនប្រជាពលរដ្ឋត្រូវយកចិត្តទុកដាក់ធ្វើស្រូវវស្សាក្នុងឆ្នាំនេះឱ្យបានច្រើនដើម្បី ផ្គត់ផ្គង់ ជីវភាពគ្រួសារនិងនាំចេញទៅក្រៅ ។ សម្តេចបានមានប្រសាសន៍បែបនេះនៅក្នុងឱកាសអញ្ជើញជាអធិបតីភាពក្នុងពិធីចែកពូជស្រូវសែនក្រអូបចំនួន១០តោន ជូនប្រជាកសិករក្នុងស្រុកបរិបូណ៌កាលពីព្រឹកថ្ងៃទី៣០ ខែឧសភា ឆ្នាំ២០២០ នៅឃុំអញ្ចាញរូង ស្រុកបរិបូណ៌ ។
សម្ដេចបានបន្តថា ស្រូវពូជដែលបានចែកជូនបងប្អូននាពេលនេះគឺឈ្មោះស្រូវពូជសែនក្រអូប សម្រាប់ឲ្យបងប្អូនយកទៅធ្វើការដាំដុះ ដើម្បីសម្រាប់ទទួលទានផង និងបន្តទុកពូជឆ្នាំក្រោយៗទៀត។ ជាមួយនឹងការដាំដុះនេះដែរ សម្ដេចក៏បានផ្តាំផ្ញើឲ្យបងប្អូនយកចិត្តទុកដាក់ថែរក្សាដាក់ជី ដាក់ទឹកគ្រប់គ្រងឲ្យបានល្អដើម្បីបានទិន្នផលខ្ពស់។
ជាងនេះទៅទៀត សម្ដេចចៅហ្វាវាំង គង់ សំអុល នៅបានផ្ដាំផ្ញើដល់បងប្អូនប្រជាពលរដ្ឋត្រូវយកចិត្តទុកដាក់ថែរក្សាអនាម័យ ដោយលាងដៃនឹងសាប៊ូ ឬអាល់កុលឲ្យបានញឹកញាប់ ដើម្បីចៀសវាងការឆ្លងជម្ងឺ កូវីដ១៩ ។
តាមការបញ្ជាក់របស់លោក ហិន ហ៊ុនប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង បានឲ្យដឹងថា ពូជស្រូវសែនក្រអូបដែលបានចែកជូនប្រជាកសិករចំនួន១០តោននៅស្រុកបរិបូណ៌នាពេលនេះគឺមានចំនួន៧ឃុំ គឺឃុំអញ្ចាញរូង ឃុំចក ឃុំពេជ្រចង្វា ឃុំផ្សារ ឃុំពពេល និងឃុំពន្លៃ ដែលមានប្រជាពលរដ្ឋចំនួន២៨០គ្រួសារ ដោយក្នុងមួយគ្រួសារទទួលបានស្រូវពូជ២៥គីឡូក្រាម ។ បន្ថែមពីលើការចែកស្រូវពូជ នេះដែរ សម្ដេចចៅហ្វាវាំង គង់សំអុល ក៏បានចែកជូន ក្នុងមួយគ្រួសារសារុង១ និងថវិកា២ម៉ឺនរៀលផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ