ចិន ៖ បុគ្គលិកនៅក្រុមហ៊ុនចិនមួយ ត្រូវបានបង្ខំឲ្យលេបដង្កូវនៅរស់ ដែលជាការដាក់ទណ្ឌកម្ម បន្ទាប់ពីមិនសម្រេចគោលដៅ ក្នុងការលក់របស់ពួកគេ ។
រូបភាពវីដេអូ ត្រូវបានបុគ្គលិកម្នាក់ ថតបង្ហោះក្នុងប្រព័ន្ធផ្សព្វផ្សាយសង្គមចិន បានបង្ហាញពីបុគ្គលិកស្រីម្នាក់ កាន់សត្វដង្កូវនៅរស់ ដាក់លើបាតដៃរបស់នាង ខណៈដែលបុគ្គលិកម្នាក់ទៀតស្រែកបង្ខំឲ្យយកវាមកដាក់ក្នុងមាត់របស់នាង លេបចូល និងផឹកទឹក ពិតជាគួរអោយខ្ពើមរអើមណាស់ ។
អ្នកស្រែកបញ្ជារូបនោះ បានប្រាប់អ្នកយកព័ត៌មានថា ការដាក់ទណ្ឌកម្មផ្សេងទៀត រួមមានការបរិភោគត្រីស្រះនៅរស់ ឬសម្អាតបង្គន់ក្នុងការិយាល័យ ។
អ្នកគ្រប់គ្រងម្នាក់ បាននិយាយថា ការដាក់ទណ្ឌកម្មដ៏សាហាវនេះ គឺជាផ្នែកមួយ នៃគោលការណ៍វិន័យថ្មីរបស់ក្រុមហ៊ុន ដែលបុគ្គលិកទាំងអស់បានយល់ព្រមផងដែរ ។
វីដេអូនេះ ត្រូវបានគេរាយការណ៍ថា បានថតបង្ហោះកាលពីថ្ងៃចន្ទ ទី២៥ ឧសភា ២០២០ នៅឯក្រុមហ៊ុនរចនា(interior design)មួយ នៅទីក្រុងប៊ីជី ក្នុងខេត្តគ័ងចូវ ភាគនិរតីនៃប្រទេសចិន ។
ការពិន័យដ៏ឃោរឃៅនេះ ត្រូវបានអ្នកលេងនៅលើបណ្តាញសង្គមចិន នាំគ្នារិះគន់ថា ក្រុមហ៊ុនអាចជ្រើសរើសត្រូវពិន័យ៥០០យ័ន(ជាង៧០ដុល្លារ) និងទិញអាហារពេលព្រឹកសម្រាប់បុគ្គលិកក្រុមហ៊ុនទាំងមូល វាសមជាង ប៉ុន្តែបែរជាទទួលបានការផាកពិន័យ ឲ្យបរិភោគពពួកសត្វដង្កូវរស់ ជំនួសទៅវិញ ។
បុគ្គលិកដែលបានធ្វើឲ្យបែកធ្លាយវីដេអូនោះ បាននិយាយថា រូបគេបានទូរស័ព្ទទៅប្តឹងមន្ត្រីប៉ូលីស បន្ទាប់ពីទទួលបានការគំរាមកំហែងពីថៅកែក្រុមហ៊ុន ចំពោះការបង្ហោះវីឌីអូពិន័យនេះ ។
មន្ត្រីប៉ូលិស និងអាជ្ញាធរមូលដ្ឋាន បាននិយាយថា ពួកគេកំពុងធ្វើការស៊ើបអង្កេតចំពោះករណីនេះ ហើយនឹងត្រូវផ្សព្វផ្សាយព័ត៌មានលម្អិតនៅពេលលទ្ធផលនៃការស៊ើបអង្កេតបានបញ្ចប់ ៕
សូមទស្សនាវីដេអូ មានដូចខាងក្រោមនេះ៖
ចែករំលែកព័តមាននេះ