កម្សត់ណាស់! គ្រួសារមួយរស់នៅដាច់ស្រយាល ប្រពន្ធក៏ឈឺ ខ្ទមស្ទើរតែរលំ
- ស្ទឹងត្រែង
ខេត្តស្ទឹងត្រែង ៖ លោក ភួង ភេ អាយុ៤០ឆ្នាំ ជាកសិករក្រីក្រ រស់នៅភូមិកោះហិប ឃុំអូរស្វាយ ស្រុកបូរីអូរស្វាយសែនជ័យខេត្តស្ទឹងត្រែង…
ខេត្តស្ទឹងត្រែង ៖ លោក ភួង ភេ អាយុ៤០ឆ្នាំ ជាកសិករក្រីក្រ រស់នៅភូមិកោះហិប ឃុំអូរស្វាយ ស្រុកបូរីអូរស្វាយសែនជ័យខេត្តស្ទឹងត្រែង កំពុងជួបប្រទះនូវការខ្វះខាតផ្នែកជីវភាពយ៉ាងខ្លាំង ខណៈប្រពន្ធមានជំងឺមហារីកស្បូនឈឺដេកនៅលើកន្ទេលគ្មានប្រាក់ព្យាបាល ថែមទាំងត្រូវមើលថែកូនតូចៗចំនួន៦នាក់ក្នុងបន្ទុកក្រីក្រផងនោះ បានដង្ហើយសុំក្តីសណ្តោសពីសប្បុរសជនជិតឆ្ងាយ មេត្តាជួយទៅតាមសទ្ធា ព្រោះនេះជាជីវិតដែលកើតក្នុងត្រកូលកសិករក្រីក្រតោកយ៉ាក ព្រមទាំងមានជំងឺ ហើយបច្ចុប្បន្នកំពុងរស់នៅក្នុងខ្ទមដំបូលស្ទើរតែប្រក់មេឃ គ្មានជញ្ជាំង និងទ្រេតមួយចំហៀងទៀតនោះ។
លោក ស៊ី មី មេភូមិកោះហិបបានបញ្ជាក់ថា តាមការពិនិត្យជាក់ស្តែង គ្រួសារមួយនេះពិតជាទីទាល់ក្រមែនហើយថ្ងៃនេះចៃដន្យបានព្រះសង្ឃនិមន្តមកលេងក៏បានជួយឧបត្ថម្ភជាបច្ច័យខ្លះៗដើម្បីបានដោះស្រាយជីវភាពមួយគ្រា ។ លោកមេភូមិបន្តថា កន្លងមកអាជ្ញាធរបានជួយគ្រប់ជំហានរួចមកហើយ ដូចជា ធ្វើប័ណ្ណក្រីក្រ និងទទួលបានជំនួយមនុស្សធម៌ពីកាកបាទក្រហមដែរ តែពុំគ្រប់គ្រាន់សម្រាប់ទ្រទ្រង់ជីវភាពនោះទេ។
លោកមេភូមិបានបន្ថែមថា ក្នុងរយៈពេលប៉ុន្មានខែចុងក្រោយនេះ គ្រួសារខាងលើមិនបានទៅធ្វើការអ្វីក្រៅពីនៅមើលថែប្រពន្ធឈឺនោះទេ ស្រែក៏មិនបានធ្វើ ចំការក៏ធ្វើមិនកើត ចំណែកកូននៅក្នុងបន្ទុកតូចៗទៀត ទើបគ្មានការងារធ្វើ ក៏ជួបនូវគ្រោះទុរគតបែបនេះ។
លោក សេក ម៉ៅ មេឃុំ អូរស្វាយស្រុកបូរីអូរស្វាយសែនជ័យបានបញ្ជាក់ថា នៅលើកោះហិបនេះមានប្រជាពលេដ្ឋរស់នៅជាង១០០គ្រួសារ ជាកោះមួយស្ថិតនៅដាច់ស្រយាលពីគេឯង ដូចនេះការទំនាក់ទំនងគ្នានៅមានកម្រិត ទើបបងប្អូនប្រជាពលរដ្ឋខ្លះជួបបញ្ហាប្រឈមទទួលការដោះស្រាយមិនបានទាន់ពេលវេលា។
សូមបញ្ជាក់ថា ប្រជាពលរដ្ឋជាង១០០គ្រួសាររស់នៅលើកោះហិបនេះភាគច្រើនមានជីវភាពខ្សត់
ខ្សោយ ព្រោះពួកគាត់ភាគច្រើនមានមុខរបរពឹងផ្អែកទៅលើការធ្វើនេសាទនិងធ្វើស្រែចំការបន្តិចបន្តួចប៉ុណ្ណោះ ៕
ចែករំលែកព័តមាននេះ