ខេត្តស្ទឹងត្រែង ៖ គ្រាប់ត្នោតចំនួន១០ម៉ឺនគ្រាប់ ត្រូវបានដាំតាមសងខាងផ្លូវខ្សែក្រវាត់ព្រំដែនកម្ពុជា-ឡាវ ចាប់ពីចំណុចបង្គោលព្រំដែនលេខ0៤៦ទៅបង្គោលព្រំដែនលេខ០៧៨ និងបន្តមកកាន់ទីរួមស្រុកសៀមប៉ាង ។ ការដាំនេះមានការចូលរួមពីមន្ត្រីរាជការនៃមន្ទីរ អង្គភាព ជុំវិញខេត្ត…
ខេត្តស្ទឹងត្រែង ៖ គ្រាប់ត្នោតចំនួន១០ម៉ឺនគ្រាប់ ត្រូវបានដាំតាមសងខាងផ្លូវខ្សែក្រវាត់ព្រំដែនកម្ពុជា-ឡាវ ចាប់ពីចំណុចបង្គោលព្រំដែនលេខ0៤៦ទៅបង្គោលព្រំដែនលេខ០៧៨ និងបន្ត
មកកាន់ទីរួមស្រុកសៀមប៉ាង ។ ការដាំនេះមានការចូលរួមពីមន្ត្រីរាជការនៃមន្ទីរ អង្គភាព ជុំវិញខេត្ត និងប្រជាពលរដ្ឋរស់នៅតាមខ្សែបន្ទាត់ព្រំដែន ។
លោក ព្រំ ចាន់ថា ប្រធានមន្ទីរអភិវឌ្ឍន៍ជនបទខេត្ត បានឲ្យដឹងថា ការដាំដើមត្នោតនេះមានការចង្អុលបង្ហាញពីឯកឧត្តម ម៉ុម សារឿន អភិបាលខេត្ត និងផ្តួចផ្តើមគំនិតដោយមន្ទីរអភិវឌ្ឍន៍ជនបទខេត្ត ដោយសហការជាមួយរដ្ឋបាលខេត្ត មន្ទីរអង្គភាពនានាជុំវិញខេត្ត និងកងកម្លាំងប្រដាប់អាវុធទាំង៣ប្រភេទ ។
លោកប្រធានមន្ទីរបញ្ជាក់ថា គ្រាប់ត្នោតដាំតាមសងខាងផ្លូវក្រវាត់ព្រំដែនកម្ពុជា-ឡាវ មានចំនួន៣លើក ដែលលើកទី១ដាំ៣ម៉ឺនគ្រាប់ លើកទី២ចំនួន៥ម៉ឺនគ្រាប់ និងលើកទី៣ចំនួន១០ម៉ឺនគ្រាប់ ។
ថ្លែងនៅក្នុងពិធីដាំកូនត្នោតនេះ ឯកឧត្តម ម៉ុម សារឿន បញ្ជាក់ថា ដើមត្នោតជារុក្ខជាតិដែលផ្តល់នូវប្រយោជន៍ច្រើនយ៉ាងដល់ប្រជាជាតិខ្មែរតាំងពីសម័យបុរាណកាល និងតំណាងអត្តសញ្ញាណជាតិ ដួងព្រលឹងជាតិ ដែលប្រជាជនខ្មែរសម្គាល់នូវទេសភាពទឹកដីរបស់ខ្លួន តាំងពីបុរាណកាលរហូតមកដល់បច្ចុប្បន្ន ។
ឯកឧត្តមអភិបាលខេត្ត មានប្រសាសន៍ទៀតថា សកម្មភាពដាំដើមត្នោតនាថ្ងៃនេះ គឺជាសកម្មភាពប្រវត្តិសាស្ត្ររបស់ខេត្ត ក្នុងការបង្ហាញពីវប្បធម៌ដ៏ផូផង់របស់ជាតិ ការថែរក្សាអត្ត សញ្ញាណជាតិ ដួងព្រលឹងជាតិ ការពារ អធិបតេយ្យភាពជាតិ និងបំផុសផ្នត់គំនិតដល់អ្នកជំនាន់ក្រោយឲ្យស្រឡាញ់នូវអ្វីដែលជាអត្តសញ្ញាណជាតិនិងដួងព្រលឹងជាតិរបស់ខ្លួន ៕ (កែសម្រួលដោយ ៖ បុប្ផា)
ចែករំលែកព័តមាននេះ