កីឡាករនៅ Bundesliga ចូលរួមរកយុត្តិធម៌ចំពោះការបាត់បង់ជីវិតបុរសស្បែកខ្មៅនៅសហអាមេរិក
ប្រទេសអាល្លឺម៉ង់ ៖ កីឡាករ Marcus Thuram, Achraf Hakimi និង Jadon Sancho…
ប្រទេសអាល្លឺម៉ង់ ៖ កីឡាករ Marcus Thuram, Achraf Hakimi និង Jadon Sancho…
ប្រទេសអាល្លឺម៉ង់ ៖ កីឡាករ Marcus Thuram, Achraf Hakimi និង Jadon Sancho បានបង្ហាញការគាំទ្ររបស់ពួកគេ ក្នុងការប្រយុទ្ធប្រឆាំងនឹងភាពសាហាវឃោរឃៅ និងការរើសអើងជាតិសាសន៍ ចំពេលផ្ទុះការតវ៉ាជាបន្តបន្ទាប់ ក្នុងទីក្រុងជាច្រើននៅសហរដ្ឋអាមេរិក។
ការតវ៉ានៅសហរដ្ឋអាមេរិកបានផ្ទុះឡើងខ្លាំង នៅប៉ុន្មានថ្ងៃថ្មីៗនេះ បន្ទាប់ពីមរណភាពរបស់បុរសជនជាតិស្បែកខ្មៅលោក George Floyd នៅពេលដែលគេ ត្រូវមន្ត្រីប៉ូលិសរដ្ឋ Minneapolis សហរដ្ឋអាមេរិកចំនួន ៤នាក់ឃាត់ខ្លួន ។ លោកបានបាត់បង់ជីវិតនៅនឹងកន្លែងកើតហេតុ ក្រោយប៉ូលិសម្នាក់បានព្យាយាមយកជង្គង់សង្កត់កជាប់ រហូតសន្លប់បាត់បង់ស្មារតី ក្រោយមកក៏បានបាត់បង់ជីវិតភ្លាមៗតែម្តង ។
នៅក្នុងការប្រកួតនៅក្របខណ្ឌ Bundesliga គេសង្កេតឃើញកីឡាករ ៣រូបបានបង្ហាញសកម្មភាពគាំទ្រចំពោះការតវ៉ា និងការសោកស្តាយជុំវិញការបាត់បង់ជីវិតរបស់លោក George Floyd ដែលត្រូវបានពិភពលោកចាត់ទុកថាជា ទង្វើរើសអើងជាតិសាសន៍លើជនជាតិស្បែកខ្មៅ។
ជាក់ស្តែងក្នុងការប្រកួតដែលក្រុម Borussia Dortmund យកឈ្នះលើក្រុមម្ចាស់ផ្ទះ Paderborn កីឡាករក្រុមភ្ញៀវគឺខ្សែបម្រើស្លាប Jadon Sancho និងខ្សែបម្រើប្រយុទ្ធ Achraf Hakimi បានលើកអាវបង្ហាញពាក្យថា «Justice for George Floyd» ក្នុងន័យដើម្បីរកយុត្តិធម៌ចំពោះបុរសជនជាតិស្បែកខ្មៅដែលបានស្លាប់ បន្ទាប់ពីពួកគេរកគ្រាប់បាល់បញ្ចូលទី។
មិនខុសគ្នាពីកីឡាករ២នាក់ខាងលើ ដោយឡែកខ្សែប្រយុទ្ធ Marcus Thuram របស់ក្រុម Borussia Mönchengladbach ក៏បានលុតជង្គង់ឧទ្ទិសដល់វិញ្ញាណក្ខន្ធលោក George Floyd ក្រោយរូបគេរកគ្រាប់បាល់ ក្នុងការប្រកួតទល់នឹងក្រុម Union Berlin ផងដែរ។
សូមបញ្ជាក់ថា បច្ចុប្បន្នសកម្មភាពបាតុកម្មតវ៉ានៅសហរដ្ឋអាមេរិកកំពុងបន្ត ដែលឈានរហូតដល់មានការប្រើប្រាស់អំពើហិង្សា និងមានការចាប់ខ្លួន ព្រមទាំងមានការដុតបំផ្លាញកន្លែងសំខាន់ៗមួយចំនួនផងដែរ ពីក្រុមអ្នកតវ៉ា ៕ (ដកស្រង់ចេញពី Goal.com)
ចែករំលែកព័តមាននេះ