រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ក្មេងស្រីវ័យ១៥ឆ្នាំម្នាក់ត្រូវកម្លាំងនគរបាលប៉ុស្តិ៍ចោមចៅទី៣ ចាប់ខ្លួនភ្លាមៗ បន្ទាប់ពីនាងកាប់ប្រហារជាច្រើនកាបិតទៅលើបុរសវ័យជិត៦០ឆ្នាំម្នាក់ដែលជាអ្នករត់ម៉ូតូឌុប បណ្ដាលឲ្យរងរបួសធ្ងន់ ក្រោយពេលក្មេងស្រីរូបនេះចាកចេញពីស្រុកមករកការងារធ្វើ លុះរកបានហើយអត់បានចូលធ្វើទេទាល់តែមានអ្នកធានាទើបគេទទួល ព្រោះនាងអត់ទាន់គ្រប់អាយុ ។
សេចក្តីរាយការណ៍បន្តថា ក្រោយមកនាងជួបនឹងបុរសខាងលើនេះ ហើយប្រាប់ថា ចាំជួយធានាឲ្យ និងជិះម៉ូតូដឹកនាងឲ្យទៅរកកន្លែងធ្វើការ តែបែរជានាំចូលទៅផ្ទះសំណាក់ចាប់បំពានសេពសន្ថវៈនាងសម្រេច២ដង តែមិនអស់ចិត្តចង់ម្ដងទៀត ដោយមិនអាចប្រកែកបាន ទើបនាងប្រើល្បិចលួងលោម រួចទាញយកកាំបិតបុ័ងតោក្នុងកាបូបកាប់តែម្ដង បង្កឱ្យមានការភ្ញាក់ផ្អើលកាលពីម៉ោង៩និង៤០នាទីព្រឹក ថ្ងៃទី០១ មិថុនា ឆ្នាំ២០២០ នៅតាមផ្លូវបេតុង QMI ស្ថិតក្នុងភូមិព្រៃព្រីងខាងជើង២ សង្កាត់ចោមចៅទី៣ ខណ្ឌពោធិ៍សែនជ័យ។
សេចក្តីរាយការណ៍បន្តថា ក្មេងស្រីរូបនេះអាយុ១៥ឆ្នាំ មានស្រុកំណើតនៅស្រុកឱរ៉ាល់ ខេត្តកំពង់ស្ពឺ ចំណែកបុរសរងគ្រោះដែលក្មេងស្រីចោទខាងលើមានអាយុ៥៨ឆ្នាំ មុខរបររត់ម៉ូតូឌុប មានទីលំនៅស្នាក់នៅសង្កាត់កាកាបទី១ ខណ្ឌពោធិ៍សែនជ័យ និងមានស្រុកកំណើតខេត្តតាកែវ។
ក្រោយពេលចាប់ខ្លួន ក្មេងស្រីរូបនេះបានប្រាប់ឲ្យនគរបាលដឹងថា នាងចាកចេញពីស្រុកកំណើតទៅធ្វើជាកម្មករបេះផ្លែស្វាយ និងដាំដំឡូង ហើយបានស្នាក់នៅផ្ទះមិត្តភក្ដិនៅឯខេត្តឧត្តរមានជ័យ រយៈពេលជាង១ខែកន្លងមកហើយ ប៉ុន្តែដោយសារតែអស់ការងារធ្វើនាងក៏ត្រឡប់មកវិញ និងបសុំព្រះសង្ឃ និងយាយជី តាជីនៅក្នុងវត្តពោធិ៍សត្ថារាម ហៅវត្តពោធិ៍ចិនតុងស្នាក់នៅ ។
ក្មេងស្រីរូបនេះបន្តថា លុះល្ងាចថ្ងៃទី៣១ ឧសភា នាងក៏ជួបជាមួយបុរសចំណាស់ដែលមានអាយុស្មើនឹងជីតារបស់នាងទៅហើយនៅក្នុងវត្តនោះ ហើយបុរសនេះព្យាយាមលួងលោមសុំនាងដោយពោលពាក្យថា «ឲ្យពូសុំម្ដងមក ចាំពូឲ្យលុយ២០ដុល្លារ» ប៉ុន្តែនាងមិនព្រមឡើយព្រោះនាងមករកការងារធ្វើមិនមែនមកលក់ខ្លួនទេ។ លុះដល់ម៉ោង១២យប់ពាក់កណ្ដាលយប់ បុរសនោះបានទៅដេកនៅជិតនាង ហើយលូកលាន់រាវស្ទាបអង្អែលសព្វកន្លែងធ្វើឲ្យនាងអត់បានដេកពេញ១យប់ តែនាងអត់បានស្រែកនោះទេ គ្រាន់តែគ្រវាសដៃចេញ និងប្រាប់កុំឲ្យគាត់ធ្វើបែបនេះអី។
ក្មេងស្រីប្រាប់បន្ថែមទៀតថា លុះដល់ព្រឹកឡើងថ្ងៃទី០១ ខែមិថុនា ជាថ្ងៃកើតហេតុនាងបានប្រាប់បុរសនេះថា នាងរកការធ្វើប៉ុន្តែខ្វះអ្នកធានា ខណៈនោះបុរសចំណាស់នោះប្រាប់ថា «មិនអីទេចាំពូជួយធានាឲ្យ» បន្ទាប់មកហៅនាងឡើងជិះម៉ូតូជាមួយដោយប្រាប់ថា ទៅរកកន្លែងធ្វើការ និងជួយម៉ាស្សាឲ្យគាត់បន្តិចចាំគាត់ឲ្យលុយ២០ដុល្លារ។ នាងក៏ព្រមទៅជាមួយ ហើយបុរសនោះក៏ឌុបនាងទៅមកៗច្រើនត្រឡប់ រួចក៏ចូលទៅក្នុងផ្ទះសំណាក់មួយកន្លែង ហើយពេលចូលទៅដល់បុរសនេះចូលទៅងូតទឹក លុះចេញមកវិញស្លៀកកន្សែង និងដេកឲ្យនាងជួយម៉ាស្សាឲ្យ បែរជាចាប់បំពានសេពសន្ថវៈរូបនាងទៅវិញ ទោះជានាងខំរើបម្រាស់ និងស្រែកយ៉ាងណាក៏មិនរួច និងគ្មានអ្នកឮដែរ។
ក្មេងស្រីរូបនេះបន្តថា ហើយបុរសនេះក៏បំពាននាងរហូតបានសម្រេច បន្ទាប់មកគាត់បានចូលទៅបន្ទប់ទឹក ចំណែកនាងរៀបចំឥវាន់បម្រុងរត់ចេញក ប៉ុន្តែបុរសនេះចេញមកពីបន្ទប់ទឹកវិញក៏ចាប់នាងម្ដងទៀតចជាលើកទី២ ហើនាងស្រែកឲ្យគេជួយ តែនៅតែគ្មានអ្នកឮដដែល។
ប្រភពពខាងលើបន្តថា លុះសម្រេចដល់ទៅ២ដងហើយនៅមិនទាន់អស់ចិត្តទៀត មួយសន្ទុះក្រោយមកបុរសនោះមានបំណងជាលើទី៣ម្ដងទៀត ប៉ុន្តែដោយមិនអាចប្រកែកបាន រើក៏ពុំរួច និងស្រែកក៏គ្មានអ្នកឮ ទើបនាងប្រើល្បិចធ្វើជាព្រម និងប្រាប់ឲ្យបុរសនោះដេកផ្កាប់មុខចាំនាងម៉ាស្សាឲ្យ ខណៈនោះបុរសនេះក៏ព្រមធ្វើតាម ហើយនាងក៏យកកាំបិតបុ័ងតោដែលដាក់តាមកាបូបទុកការពារខ្លួនកាប់ទៅលើបុរសនេះជាច្រើនកាំបិតតែម្ដង ព្រោះនាងមិនអាចទ្រាំបានតទៅទៀតបានឡើយ។
ទាង់ទិនទៅនឹងហេតុការណ៍នោះ បុរសចំណាស់ខាងលើមិនបាននិយាយច្រើនទេ ព្រោះរងរបួសធ្ងន់ធ្ងរ ដោយគ្រាន់តែប្រាប់គេឯងថា គាត់នាំស្រីមកដេកនៅផ្ទះសំណាក់ ទាស់គ្នារឿងលុយ២០ដុល្លារដែលគាត់មិនទាន់បានឲ្យនៅឡើយ ហើយក៏ត្រូវស្រីនោះកាប់ឲ្យរបួស។
ចំណែកនគរបាលប៉ុស្តិ៍ចោមចៅទី៣ បានចុះទៅកន្លែងកើតហេតុ រួចឃាត់ខ្លួនក្មេងស្រីខាងលើនាំទៅកាន់ប៉ុស្តិ៍ដើម្បីសាកសួរ ហើយបើរឿងនេះពិតជារឿងមែន ហើយក្មេងស្រីខាងលើកាប់បុរសរងគ្រោះ ដើម្បីការពារខ្លួនមែន ពុំទាន់ដឹងថា តើត្រូវមានចំណាត់ការបែបណានៅឡើយទេ? គឺសម្រេចនៅលើតុលាការ ៕ (កែសម្រួលដោយ ៖ បុប្ផា)
ចែករំលែកព័តមាននេះ