ខេត្តប៉ៃលិន ៖ ៖ រហូតមកដល់ថ្ងៃទី៣០ ឧសភា លោកផាន់ ចាន់ធុល អភិបាលខេត្ត និងជាប្រធានគណៈកម្មការប្រយុទ្ធនឹងជំងឺCOVID-១៩ ព្រមទាំងក្រុមការងារបានចុះត្រួតពិនិត្យមើលដំណើរការដាក់ម៉ាស៊ីនវាស់កំដៅស្វ័យប្រវត្តិនៅចក្រទ្វារអន្តរជាតិព្រំ ស្ថិតក្នុងភូមិព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
លោក ផាន់ ចាន់ធុល ប្រធានគណៈកម្មការប្រយុទ្ធនឹងជំងឺ COVID-19 បានឱ្យដឹងថា ៖ ម៉ាស៊ីនស្គែនកំដៅស្វ័យប្រវត្តិរកមេរោគកូវិដ-១៩នេះ នឹងបង្កលក្ខណៈងាយស្រួលសម្រាប់វាស់កំដៅអ្នកដំណើរ និងភ្ញៀវទេសចរ ចេញចូលតាមចក្រទ្វារអន្តរជាតិព្រំខេត្តប៉ៃលិន ។ លោកបានជំរុញដល់មន្ត្រីចត្តាឡីស័ក ដែលប្រចាំការនៅច្រកទ្វារអន្តរ ជាតិព្រំ ត្រូវខិតខំតាមដានដោយយកចិត្តទុកដាក់ខ្ពស់ ស្របពេលដែលមានផ្ទុះជំងឺកូវិដ-១៩ សារជាថ្មី នៅក្នុងប្រទេសកម្ពុជា ជាពិសេសលោក សូមថ្លែងអំណរគុណដល់ក្រសួងសុខាភិបាល ដែលបានផ្តល់ម៉ាស៊ីនស្គែនកំដៅស្វ័យប្រវត្តិនេះ ដើម្បីទប់ស្កាត់ការរីករាលដាលនៃជំងឺកូវិដ-១៩ ។
ក្នុងឱកាសនោះដែរ លោក ផាន់ ចាន់ធុល ក៍បានក្រើនរំលឹកដល់អជ្ញាធរមូលដ្ឋានគ្រប់ជាន់ថ្នាក់ និងក្រុមគ្រូពេទ្យជំនាញ ត្រូវបន្តធ្វើការផ្សព្វផ្សាយអប់រំ នៅតាមមូលដ្ឋាន ជាពិសេសនៅតាមទីប្រជុំជន និងទីសាធារណៈឲ្យបានផុលផុស អំពីវិធានការបង្ការ និងទប់ស្កាត់ ការរីករាលដាលនៃជម្ងឺកូវីដ-១៩ ក្នុងប្រទេសកម្ពុជា ។
បើតាមការបញ្ជាក់របស់លោក ស្លេះ យូ ប្រធានមន្ទីរសុខាភិបាលខេត្តដែលទើបនឹងតែងតាំងថ្មី បានអោយដឹងថា ៖ ការដាក់ម៉ាស៊ីនស្គែនកំដៅស្វ័យប្រវត្តិរកមេរោគកូវិដ-១៩ នៅមាត់ច្រកទ្វារអន្តរជាតិព្រំនេះ គឺដើម្បីស្គែនកំដៅពលរដ្ឋ និងភ្ញៀវចេញចូលទាំងអស់ ប្រសិនបើមានរោគសញ្ញាសង្ស័យ ដែលមានកំដៅចាប់ពី៣៨អង្សាទ្បើងទៅ មន្ត្រីជំនាញនឹងនាំចូលទៅក្នុងបន្ទប់សុវត្ថិភាព ដើម្បីធ្វើការពិនិត្យ វាស់កំដៅសារជាថ្មី ។ ក្នុងករណីសង្ស័យថា ជារោគសញ្ញាជំងឺកូវីដ១៩ គឺត្រូវដាក់នៅដាច់ដោយឡែក ហើយមានក្រុមគ្រូពេទ្យប្រចាំការ២៤ម៉ោង និងត្រូវយកសំណាកអ្នកជំងឺសង្ស័យនោះទៅពិនិត្យនៅវិទ្យាស្ថានប៉ាស្ទ័រ ដើម្បីទទួលបានលទ្ធផលច្បាស់លាស់ ៕
ចែករំលែកព័តមាននេះ