សហរដ្ឋអាមេរិក ៖ តាមAFPថាមនុស្សច្រើនម៉ឺននាក់បានប្រមូលផ្ដុំគ្នាជាថ្មីនាថ្ងៃទី៣១ឧសភា ក្នុងទីក្រុងជាច្រើនរបស់សហរដ្ឋអាមេរិក ដើម្បីទាមទាររកយុតិ្តធម៌ ក្រោយការស្លាប់ របស់ជនស្បែកខ្មៅម្នាក់លោកGEORGE FLOYD នាំឲ្យផ្ទុះការបះបោរហិង្សានានានៅពេលយប់ ចំណែកប្រធានាធិបតីអាមេរិក…
សហរដ្ឋអាមេរិក ៖ តាមAFPថាមនុស្សច្រើនម៉ឺននាក់បានប្រមូលផ្ដុំគ្នាជាថ្មីនាថ្ងៃទី៣១ឧសភា ក្នុងទីក្រុងជាច្រើនរបស់សហរដ្ឋអាមេរិក ដើម្បីទាមទាររកយុតិ្តធម៌ ក្រោយការស្លាប់ របស់ជនស្បែកខ្មៅម្នាក់លោកGEORGE FLOYD នាំឲ្យផ្ទុះការបះបោរហិង្សានានានៅពេលយប់ ចំណែកប្រធានាធិបតីអាមេរិក លោកដូណាល់ត្រាំបានបរិហារពួកអានាធិបតេយ្យរ៉ាឌីកាល់។
លោកដូណាល់ត្រាំគូសបញ្ជាក់ថា យោធានៃកងឆ្មាំជាតិ ត្រូវតែប្រើប្រាស់ដើម្បីជួយបញ្ចប់ ការបះបោរ ក្នុងទីក្រុងទាំងឡាយនិងក្នុងបណ្ដារដ្ឋ ដែលដឹកនាំដោយពួកប្រជាធិបតេយ្យ ។ លោកបានព្រមានថា កងឆាំ្មជាតិត្រូវមានប្រតិកម្មមុន ទុកឲ្យយឺតពេល ។
ក្នុងពេលដែលបាតុកម្មនានាផ្ទុះឡើង ពោរពេញដោយហិង្សានិងការបំផ្លិចបំផ្លាញ នៅទីក្រុងមីននីប៉ូលីសរដ្ឋមីនីសូតា ក្រោយការស្លាប់របស់ជនស្បែកខ្មៅរូបនោះនៅទីក្រុងនេះ ព្រមទាំងនៅតាមទីក្រុងដទៃៗទៀតរបស់ប្រទេស ប្រធានាធិបតីអាមេរិក បានអំពាវនាវដល់បណ្ដាទីក្រុងនិងបណ្ដារដ្ឋអាមេរិក ដែលអភិបាលរដ្ឋឬអភិបាលក្រុងជាអ្នកប្រជាធិបតេយ្យ ឲ្យហៅរកជំនួយរបស់កងឆ្មាំជាតិ មុនពេលអ្វីៗយឺតពេល។
តាមTWITTERលោកត្រាំសរសេរថា ទីក្រុងនិងបណ្ដារដ្ឋ ដឹកនាំដោយពួកអ្នកប្រជាធិបតេយ្យ ត្រូវធ្វើយ៉ាងណាឲ្យពួកអានាធិបតេយ្យរ៉ាឌីកាល់ធ្វេងនិយម បញ្ឈប់សកម្មភាពពួកគេ ដូចនៅក្រុងមីននីប៉ូលីសកាលពីយប់ម្សិលមិញ។ លោកថាកងឆ្មាំជាតិបានបំពេញការងារដ៏ល្អ ហើយត្រូវប្រើក្នុងរដ្ឋនិងទីក្រុងដទៃៗទៀតមុនទុកឲ្យយឺតពេល។
កំហឹងដែលផ្ទុះនៅទីក្រុងមីននីប៉ូលីសរដ្ឋមីនីសូតា ក្រោយការស្លាប់របស់GEORGE FLOYDក្នុងដៃប៉ូលិស បានឆ្លងរាលដាលយ៉ាងឆាប់ក្នុងទូទាំងប្រទេស ចាប់ពីទីក្រុងម៉ៃ៉អាមីរហូតដល់មុខសេតវិមានក្រុងវ៉ាស៊ិនតោន ។ ទាហានច្រើនពាន់នាក់នៃកងឆ្មាំជាតិ ត្រូវបានដាក់ពង្រាយក្នុងរដ្ឋ១៥និងនៅក្រុងវ៉ាស៊ិនតោន ចំណែកបំរាមគោចរណ៍ ត្រូវបានដាក់ក្នុងទីក្រុងជាច្រើនដូចជាទីក្រុងហ៊ូស្តុននិងក្រុងឡូសអេនចឺឡេស។
នៅទីក្រុងសាំងម៉ូលជិតក្រុងមីននីប៉ូលីស ចំណុចស្នូលនៃចលនាបះបោរ មនុស្សច្រើនពាន់នាក់ បានលើកគ្នាធ្វើបាតុកម្មនារសៀលថ្ងៃទី៣១ឧសភា ប្រឆាំងការប្រកាន់ពូជសាសន៍ និងឲ្យពួកប៉ូលិសដែលជាប់ទាក់ទិននឹងការស្លាប់របស់ FLOYDត្រូវទទួលទោសចំពោះអ្វីដែលពួកគេបានធ្វើ។ សម្រាប់ពេលនេះមានតែប៉ូលិសម្នាក់គត់ ក្នុងចំណោមពួកគេត្រូវបានចាប់ខ្លួននិងរងការចោទប្រកាន់ពីបទសម្លាប់មនុស្សដោយអចេតនា ។ ប៉ូលិសរូបនោះលោកDEREK CHAUVINដែលគេឃើញក្នុងវីដេអូកំពុងយកជង្គង់សង្កត់កបុរសស្បែកខ្មៅនោះរហូតដល់ស្ទះដង្ហើម ក៏ទោះបីរូបគេខំអង្វរថាមិនអាចដកដង្ហើមបានក្ដី។
បាតុកម្មក៏កំពុងប្រព្រឹត្តទៅនៅក្រុងវ៉ាស៊ិនតោន ម៉ៃអាមីនិងញូវយ៉កដោយពួកបាតុករនាំគ្នាស្រែកថា BLACK LIVES MATTER(ត្រូវគិតដល់ជីវិតជនស្បែកខ្មៅផង)។
នៅទីក្រុងឡូសអេនចឹឡេស ពួកទាហាននៃកងឆ្មាំជាតិក្នុងឯកសណ្ឋានប្រយុទ្ធ និងប្រដាប់ដោយអាវុធវាយលុក ចាប់ផ្ដើមល្បាតនាភាគកណ្ដាលក្រុង។ ក៏ទោះបីមានការដាក់ពង្រាយកងទាហានតែក៏មិនអាចទប់ពួលអ្នកបះបោរដែលលុកចូលប្លន់យកឥវ៉ាន់តាមហាងនានាពិសេសនៅមជ្ឈមណ្ឌលពាណិជ្ជកម្ម សាន់តាម៉ូនីកា។ នៅហ្វីឡាដែលហ្វីយ៉ាមនុស្សជាង៥០នាក់ត្រូវចាប់ខ្លួនដោយសារការអុកឡុកប្លន់ ចាប់ពីថ្ងៃទី៣០ឧសភាមក។
ក៏ទោះបីមានការដាក់ពង្រាយកងកម្លាំងប៉ូលិសនិងយោធាច្រើនពាន់នាក់ ក៏អំពើហិង្សានៅតែផ្ទុះឡើងក្នុងទីក្រុងជាច្រើន ក្នុងនោះមានក្រុងញូវយ៉ក ហ្វីឡាដែលហ្វីយ៉ា ដាល់ឡាស់ ឡាសវេហ្គាស់ ស៊ីអ៊ីថល ដេមន ម៉ាមហ្វី ឡូសអេនចឺឡេស អាត្លង់តា ម៉ៃអាមី ព័រឡែន ស៊ីកាហ្គោនិងរដ្ឋធានីវ៉ាស៊ិនតោន ។ បណ្ដាផ្លូវថ្នល់ត្រូវកាត់ផ្ដាច់ ហើយបណ្ដារថយន្តត្រូវដុតបំផ្លាញនិងហាងពាណិជ្ជកម្មទាំងឡាយ រងការការដុត ហើយកងកម្លាំងសន្តិសុខដាក់ពង្រាយនៅតាមទីក្រុងជាច្រើនបានតបត ដោយបាញ់ឧស្ម័ន់បង្ហូរទឹកភ្នែក និងក្នុងករណីខ្លះបាញ់គ្រាប់កៅស៊ូ ។
ប៉ូលិសប្រើរថយន្តបំបុកបាតុករនៅក្រុងវ៉ាស៊ិនតោន
នៅក្រុងវ៉ាស៊ីនតោនវីដេអូ២បានបណ្ដាលឲ្យមានប្រតិកម្មដោយក្ដៅក្រហាយ។ តាមរូបភាពនៃវីដេអូនោះគេឃ្រើញរថយន្ត១គ្រឿងរបស់ប៉ូលិស ត្រូវពួកបាតុករគប់របស់របរនានាទៅលើ ពេលប្រឈមមុខគ្នានៅសង្កាត់BROOKLYN ក្រុងញូវយ៉ក។ រថយន្តប៉ូលិសទី២បានដល់ហើយត្រូវពួកបាតុករចោមរោមជិតក៏សម្រេចបើកបំបុក បណ្ដាអ្នកដែលនៅតាមផ្លុវ។ ប៉ុន្មានម៉ោងក្រោយការចេញផ្សាយវីដេអូទាំង២នោះ មនុស្សចូលមើលច្រើនសិបលាននាក់ បានបញ្ចេញប្រតិកម្មដោយក្ដៅក្រហាយជាទូទៅ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ