បន្ទាយមានជ័យ ៖ ការចិញ្ចឹមកង្កែបលក្ខណៈអាជីវកម្មហាក់មានកំណើនខ្ពស់និងបានជួយដល់ជីវភាពប្រជាពលរដ្ឋនៅសង្កាត់ភ្នៀតបានមួយកម្រិត ដោយការចិញ្ចឹមរបស់បងប្អូនគឺសម្រាប់បម្រើការងារនៅទីផ្សារក្នុងមូលដ្ឋានផងនិងនាំចេញទៅបណ្តាខេត្ត-ក្រុងផ្សេងៗផងដែរ ។
អ្នកស្រី ម៉ក់ សាលឹម អាយុ៤៤ឆ្នាំ ជាអ្នកចិញ្ចឹមកង្កែបមួយរូបនៅភូមិកន្ទួត សង្កាត់ភ្នៀត ក្រុងសិរីសោភ័ណបានរៀបរាប់ថា គាត់បានចាប់របបចិញ្ចឹមកង្កែបរយៈពេល៥ឆ្នាំមកហើយ ដោយដំបូងគឺគាត់ចេះពីលោកមេភូមិចាស់ ហើយគាត់ក៏ចាប់ផ្តើមចិញ្ចឹមរហូតមកដល់បច្ចុប្បន្នដែលធ្វើឲ្យជីវភាពរបស់គាត់ភាពល្អប្រសើជាងមុននិងរកចំណូលសម្រាប់កូនៗបានរៀនសូត្រខ្ពង់ខ្ពស់ ។
អ្នកស្រីបានបន្តថា បច្ចុប្បន្ននេះគាត់ចិញ្ចឹមកង្កែបមានចំនួន២០ស្បៃ ដែលក្នុងមួយស្បៃដាក់កង្កែបបានជាង១.០០០ក្បាល ដែលសុរប២០ស្បៃនេះគឺ ប្រហែលជាង២ម៉ឺនក្បាល ។
ចំពោះទីផ្សារគឺគាត់លក់ក្នុងស្រុកនិងនាំចេញទៅក្រៅខេត្តតាមការបញ្ជាទិញ។ ហើយការចិញ្ចឹមនេះគឺចាំបាច់ត្រូវធ្វើការផ្តាស់ប្តូរទឹកជាប្រចាំ បើពុំនេះទេធ្វើឲ្យទឹកស្អុយប៉ះពាល់កង្កែបនៅក្នុងស្បៃ។
ជាមួយគ្នានោះដែរលោក ហួត សាវឺ ចៅសង្កាត់ភ្នៀត ក៏បានបញ្ជាក់ផងដែរថា ៖ បងប្អូននៅក្នុងសង្កាត់ភ្នៀតភាគច្រើនក្រៅពីធ្វើស្រែ គឺដាំដុះបន្លែផ្សេងៗសម្រាប់ផ្គត់ផ្គង់ជីវភាពគ្រួសារ ក៏ដូចជាយកទៅលក់នៅនៅទីផ្សារក្នុងស្រុកគឺមានបងប្អូនកសិករខ្លះគាត់ចិញ្ចឹមទាយកពងនិងចិញ្ចឹមកង្កែប ។ ចំពោះបងប្អូនកសិករដែលចិញ្ចឹមកង្កែបបច្ចុប្បន្ននេះនៅក្នុងសង្កាត់ភ្នៀតគឺមានចំនួន៤៧កន្លែងគឺស្មើនិង៤៧គ្រួសារ ។
ពាក់ព័ន្ធនឹងបងប្អូនកសិករប្រកបអាជីវកម្មចិញ្ចឹមកង្កែបនេះផងដែរ លោក ហ៊ឹល រ៉ាយ៉ា អភិបាលនៃគណៈអភិបាលក្រុងសិរីសោភ័ណ រួមនឹងក្រុមប្រឹក្សាក្រុង បានអញ្ជើញចុះពិនិត្យមើល ការចិញ្ចឹមកង្កែបរបស់បងប្អូនប្រជាកសិករ នៅភូមិកន្ទួត សង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យ កាលពីថ្ងៃទី៨ ខែឧសភា ឆ្នាំ២០២០ ។ ក្នុងនោះដែរលោក ហ៊ឹល រ៉ាយ៉ា បានលើកទឹកចិត្តដល់មួយបងប្អូនដែលចិញ្ចឹមកង្កែបឲ្យបន្តការចិញ្ចឹមឲ្យបានខ្លាំងក្លា និងបានជម្រុញពួកគាត់ពង្រីកការចិញ្ចឹមទៀតផង ដើម្បីផ្គង់ផ្គត់ជីវភាពគ្រួសារ នឹងបំពេញតម្រូវការទីផ្សារក្នុងខេត្តនិងក្រៅខេត្តផង។
លោក ហ៊ឹល រ៉ាយ៉ា បានមានប្រសាសន៍ណែនាំដល់បងប្អូនអ្នកចិញ្ចឹមកង្កែបថា «បើខ្វះខាតថវិកាសម្រាប់គម្រោងចង់ពង្រីកការចិញ្ចឹម» លោកបានណែនាំថា ឯកឧត្តម ឧបនាយករដ្ឋមន្ត្រី កែ គឹមយ៉ាន និងលោកជំទាវ បានបង្កើតមូលនិធិមួយសម្រាប់ជួយដល់បងប្អូនចង់ពង្រីកមុខរបរការចិញ្ចឹមនេះ ដោយអាចទទទួលកម្ចីបានសម្រាប់ជួយដល់កសិករ ៕
ចែករំលែកព័តមាននេះ