ប្រទេសជប៉ុន ៖ តាមប្រភពព័ត៌មាន CNN បានឱ្យដឹងថា ក្រសួងសុខាភិបាលប្រទេសជប៉ុនបានប្រកាសពីករណីឆ្លងកូវីដ១៩ថ្មី ចំនួន៧៥ករណី និងមានអ្នកបាត់បង់ជីវិតស្លាប់ចំនួន១២នាក់ នៅថ្ងៃសុក្រដែលជាថ្ងៃទីបួនជាប់ៗគ្នា ដែលប្រទេសនេះមានការកើនឡើងនៃករណីវីរុសនេះ ចាប់តាំងពីការប្រកាសដកចេញនូវការដាក់ប្រទេសក្នុងគ្រាអាសន្ន។
នេះនាំឱ្យមានករណីឆ្លងកូវីដ១៩ សរុបនៅក្នុងប្រទេសជប៉ុន កើនដល់ ១៧,៥១៦ករណី ដែលនៅលើដីគោកចំនួន ១៦,៨០៤ករណី និងផ្ទៃទឹកលើនាវា Diamond Princess ចំនួន ៧១២ករណី ខណៈដែលករណីបាត់បង់ជីវិតឡើងដល់ ៨៩៩ករណី។
ភាគខាងត្បូងនៃទីក្រុង Kitakyushu បានរាយការណ៍ពីការឆ្លងថ្មីចំនួន ២៦ករណី នៅថ្ងៃសុក្រ ដែលវា គឺជាកន្លែងសម្បូរអ្នកឆ្លងនៅក្នុងមជ្ឈមណ្ឌលថែទាំមនុស្សចាស់ និង មន្ទីរពេទ្យ។ ទីក្រុងនេះ មានចំនួនអ្នកឆ្លងថ្មីចំនួន ៦៩ករណី នៅក្នុងសប្តាហ៍មុន។
នៅទីក្រុងតូក្យូ ការឆ្លងថ្មីចំនួន ២២ករណី និងការបាត់បង់ជីវិតចំនួន ៣ករណី ត្រូវបានរាយការណ៍កាលពីថ្ងៃសុក្រ ដែលបង្ហាញពីការកើនឡើងនូវការឆ្លងនៃជំងឺនេះ។
នាយករដ្ឋមន្ត្រីជប៉ុន លោក ស៊ីនហ្សូអាបេ បានដកចេញការដាក់ប្រទេសក្នុងគ្រាអាសន្នទាំងស្រុងនៅកាលពីថ្ងៃច័ន្ទ។ ទីតាំងភាគច្រើននៃប្រទេសនេះបានបន្ធូរបន្ថយការរឹតបន្តឹងរួចហើយ លើកលែងតែទីក្រុងតូក្យូនិងខេត្តចំនួន៤ ផ្សេងទៀត៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ