រាជធានីភ្នំពេញ ៖ បុរសជាជនជាតិចិនតៃវ៉ាន់ម្នាក់បានមានបំណងជូនប្រពន្ធជនជាតិខ្មែរទៅបើកលុយនៅរោងចក្រ ប៉ុន្តែខណៈពេលគាត់ចាប់កាន់ម៉ូតូរៀបចំអូសចេញក្រៅបន្ទប់ជួលក្នុងគោលបំណងឌុបប្រពន្ធ ស្រាប់តែដួលប្រកាច់បាត់បង់ជីវិតចោលប្រពន្ធនិងកូនភ្លាមៗមួយរំពេចបង្កឲ្យមានការភ្ញាក់ផ្អើលទាំងព្រឹក ហើយសមត្ថកិច្ចនគរបាលបានអះអាងថា ជនរងគ្រោះបាត់បង់ជីវិតដោយសាជំងឺលើសឈាមនិងខ្យល់គ។
ហេតុការណ៍ខាងលើនេះបានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង៦និង៣០នាទីព្រឹកថ្ងៃទី៣១ ខែឧសភា ឆ្នាំ២០២០ នៅក្នុងបន្ទប់ជួល ស្ថិតក្នុងភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
បុរសដែលបាត់បង់ជីវិតខាងលើឈ្មោះឡុង គឺហាវជេកឃីត (ហៅជេកគី) អាយុ៦៣ឆ្នាំ ជាជនជាតិចិនតៃវ៉ាន់ មុខរបរមេការរោងចក្រកាត់ដេរ ចំណែកស្ត្រីជាប្រពន្ធឈ្មោះណុង ស្រីពេជ្រ អាយុ៣៤ឆ្នាំជាជនជាតិខ្មែរ មុខរបរកម្មការិនីរោងចក្រ មានទីលំនៅក្នុងភូមិព្រែកតាឌុក ឃុំសំរោង ស្រុកត្រាំកក់ ខេត្តតាកែវ ។ គ្រួសារនេះស្នាក់នៅបន្ទប់ជួលក្នុងភូមិឃុំកើតហេតុខាងលើ។
ស្ត្រីជាប្រពន្ធបានរៀបរាប់ឱ្យដឹងថាគាត់បានរៀបការនិងរស់នៅជាមួយបុរសរងគ្រោះខាងលើជាប្ដីប្រពន្ធអស់រយៈពេល៣ឆ្នាំមកហើយ និងកូន២នាក់ ក្នុងនោះកូនប្រុសម្នាក់ទើបបានអាយុ១ខួប និងកំពុងមានផ្ទៃពោះកូនម្នាក់ទៀត៥ខែ ។ ប្ដីរបស់គាត់មានជម្ងឺប្រចាំកាយក្រួសក្នុងប្រមាត់និងលើសឈាមយូរមកហើយ ។
ស្ត្រីជាប្រពន្ធបានរៀបរាប់បន្តថា នៅមុនពេលកើតហេតុ ក្រោយពីដាំបបរហូបរួចហើយ គាត់និងប្ដីបានរៀបចំទៅបើកលុយនៅរោងចក្រ ហើយខណៈនោះប្ដីបានដើរសំដៅទៅម៉ូតូដើម្បីអូសចេញក្រៅជិះឌុបគ្នាទៅកាន់រោងចក្រ ខណៈពេលប្តីបម្រុងនឹងអូសម៉ូតូចេញទៅហើយ ស្រាប់តែប្ដីរបស់គាត់បានដួលប្រកាច់ត្រដរខ្យល់តែម្ដង លុះពេលឃើញបែបនេះ គាត់មានការតក់ស្លុតយ៉ាងខ្លាំង ក៏បានស្រែកហៅឱ្យអ្នកជិតខាងជួយ ប៉ុន្តែជួយមិនទាន់ឡើយ ដោយប្ដីរបស់គាត់បានបាត់បង់ជីវិតបាត់ទៅហើយ។
តាមប្រភពពីនគរបាលបានប្រាប់ថា ក្រោយពេលកើតហេតុ ស្ត្រីជាប្រពន្ធបានរាយការណ៍ពីរឿងរ៉ាវដែលបានកើតឡើង ហើយកម្លាំងនគរបាលប៉ុស្តិ៍ចោមចៅទី៣បានចុះទៅពិនិត្យជាក់ស្ដែងនិងរាយការណ៍បន្តទៅកាន់នគរបាលផ្នែកព្រហ្មទណ្ឌដើម្បីរាយការណ៍បន្តទៅកាន់នគរបាលការិយាល័យបច្ចេកទេសនៃស្នងការដ្ឋាននគរបាលរាជធានីភ្នំពេញចុះពិនិត្យកោសល្យវិច័យ។
ក្រោយការពិនិត្យ លទ្ធផលបានបញ្ជាក់ថា បុរសចំណាស់ជនជាតិចិនតៃវ៉ាន់រូបនោះបានបាត់បង់ជីវិតដោយសារតែជម្ងឺលើសឈាមនិងខ្យល់គ ហើយសពត្រូវបាននាំយកទៅតម្កល់ទុកនៅឈាបនដ្ឋានវត្តស្ទឹងមានជ័យ ដើម្បីប្រគល់ជូនក្រុមគ្រួសារចាត់ចែងបន្ត៕ (កែសម្រួលដោយ ៖ ធីតា)
ចែករំលែកព័តមាននេះ