ខេត្តបាត់ដំបង ៖ បើតាមសមត្ថកិច្ចបានរាយការណ៍ជាបឋមបានឱ្យដឹងថា ម្ដាយ និងកូនស្រីអាយុ១៨ឆ្នាំបានបាត់បង់ជីវិតយ៉ាងអាណោចអាធ័មនៅក្នុងឧប្បតិហេតុគ្រោះអគ្គិភ័យដ៏រន្ធត់មួយ បង្កឱ្យមានការភ្ញាក់ផ្អើលកាលពីម៉ោង១និង៤០នាទីឈានចូលថ្ងៃទី៣១ ខែឧសភា ឆ្នាំ២០២០ ស្ថិតនៅភូមិថ្មី ឃុំបន្សាយត្រែង…
ខេត្តបាត់ដំបង ៖ បើតាមសមត្ថកិច្ចបានរាយការណ៍ជាបឋមបានឱ្យដឹងថា ម្ដាយ និងកូនស្រីអាយុ១៨ឆ្នាំបានបាត់បង់ជីវិតយ៉ាងអាណោចអាធ័មនៅក្នុងឧប្បតិហេតុគ្រោះអគ្គិភ័យដ៏រន្ធត់មួយ បង្កឱ្យមានការភ្ញាក់ផ្អើលកាលពីម៉ោង១និង៤០នាទីឈានចូលថ្ងៃទី៣១ ខែឧសភា ឆ្នាំ២០២០ ស្ថិតនៅភូមិថ្មី ឃុំបន្សាយត្រែង ស្រុកថ្មគោល តែត្រូវបានគេសង្ស័យជាជំហ៊ានដំបូងថា ទំនងអាចជាអំពើឃាតកម្ម។
សេចក្ដីរាយការណ៍បានឲ្យដឹងថា ជនរងគ្រោះក្នុងហេតុការណ៍នេះ គឺ១-ឈ្មោះ គឹម ធឿន អាយុ៥២ឆ្នាំ (ជាម្ដាយ) និង២-ឈ្មោះ គឹម សៀកមី ភេទស្រី អាយុ១៨ឆ្នាំ (កូនស្រី) រស់នៅក្នុងភូមិ-ឃុំកើតហេតុខាងលើ។
បើតាមសមត្ថកិច្ចបានឱ្យដឹងថា គ្រួសារនេះមានគ្នា៣នាក់ ម្នាក់ឈ្មោះ យៃ ឡើយ អាយុ៥២ឆ្នាំ (ជាប្ដី) និងប្រពន្ធ និងកូនស្រីដែលបានបាត់បង់ជីវិតក្នុងហេតុការណ៍ដ៏រន្ធត់នេះ ។ ហើយករណីនេះ ត្រូវបានគេសង្ស័យថា ករណីនេះជាអំពើឃាតកម្ម ព្រោះជនរងគ្រោះ២នាក់ម្ដាយ និងកូនស្រីបានបាត់បង់ជីវិតនៅក្នុងផ្ទះ ដោយមានស្នាមរបួស ហើយនឹងត្រូវគេចាក់សោរទ្វារជាប់ពីខាងក្រៅផងដែរ។ ប៉ុន្តែរហូតមកដល់ពេលនេះ គេនៅមិនទាន់ឃើញវត្តមានបុរសជាស្វាមី និងឪពុកជនរងគ្រោះនៅផ្ទះឡើយ។
បើតាមការពិនិត្យជាក់ស្ដែង សមត្ថកិច្ចបាននិយាយថា ករណីដ៏រន្ធត់ខាងលើ គេសង្ស័យថា ជនដៃដល់បានវាយសម្លាប់ជនរងគ្រោះនៅក្នុងផ្ទះ ហើយពេលចាកចេញ ជនដៃដល់រូបនេះបានចាក់សោទ្វារជាប់ពីខាងក្រៅ រួចក៏ដុតកំទេចទាំងផ្ទះ ទាំងមនុស្ស ក្នុងបំណងបំបាត់ភស្ដុតាងតែម្ដង។
គួរបញ្ជាក់ថា លំនៅឋានដែលរងការខូចខាតខាងលើមានទំហំ១០មx៥ម ធ្វើពីឈើប្រក់ស័ង្កសីដែលខូចខាតស្ទើរទាំងស្រុង, ម៉ូតូ២គ្រឿងខូចខាតទាំងស្រុង, កង់១គ្រឿងខូចខាតទាំងស្រុង រួមទាំងសម្ភារ:ផ្សេងៗទៀតនៅក្នុងផ្ទះទាំងអស់។
ទោះយ៉ាងណា នេះគ្រាន់តែជាព័ត៌មានបឋមដែលសមត្ថកិច្ចបានរាយការណ៍ប៉ុណ្ណោះ ប៉ុន្តែពេលនេះសមត្ថកិច្ចកំពុងពិនិត្យ និងធ្វើការស្រាវជ្រាវលើករណីនេះហើយ ខណៈបាត់មុខឈ្មោះយៃ ឡើយ ដែលត្រូវជាប្ដី និងឪពុកជនរងគ្រោះ។
បើតាមសមត្ថកិច្ចបានបញ្ជាក់ថា មិនត្រឹមតែគ្មានវត្តមានបុរសជាប្ដី ឬឪពុកនោះទេ សូម្បីទូរស័ព្ទរបស់បុរសរូបនេះក៏ត្រូវបានបិទស្ងាត់សូន្យដែរ នេះជាការគួរឲ្យសង្ស័យបំផុតទៅលើបុរសរូបនេះ។
ព័ត៌មានពិស្តារនឹងមានផ្សាយនៅពេលក្រោយ ។ (កែសម្រួលដោយ ៖ បុប្ផា)
ចែករំលែកព័តមាននេះ