រាជធានីភ្នំពេញ ៖ សម្ដេចតេជោ នាយករដ្ឋមន្ត្រីនៃព្រះរាជាណាចក្រកម្ពុជា បានបន្តអំពាវនាវឲ្យប្រជាពលរដ្ឋមានការប្រុងប្រយ័ត្នខ្ពស់ក្នុងការឆ្លងជំងឺ covid-19 ទោះបីជាកម្ពុជាមានអត្រាឆ្លងនៅកម្រិតទាបក៏ដោយ។
សម្តេចតេជោ បានសរសេរនៅលើបណ្តាញសង្គមនៅថ្ងៃទី៣១ ខែឧសភានេះយ៉ាងដូច្នេះថា៖ «សូមបងប្អូនជនរួមជាតិបន្តយកចិត្តទុកដាក់ថែរក្សាសុខភាពដោយមានការប្រុងប្រយ័ត្នខ្ពស់ជានិច្ច ចំពោះជំងឺឆ្លងកូវីដ១៩ ដ៏កាចសាហាវ បើទោះបីពេលនេះអត្រាឆ្លងនៅក្នុងប្រទេសមានកម្រិតទាបក៏ដោយ»។
សម្តេចថា «យើងមិនបានភ្លេចទេ ពីការតស៊ូលំបាកគ្រប់យ៉ាងកាលពីមុនចាប់តាំងពីសម័យសង្គ្រាម រហូតដល់ប្រទេសមានសុខសន្តិភាព និងរីកចម្រើនមកដល់សព្វថ្ងៃ»។ ជាមួយគ្នានោះដែរ សម្តេចក៏បានសុំអរគុណអ្នកដែលបានបង្ហោះរូបខ្ញុំ និងក្រុមគ្រួសារដែលបានរំលឹកពីជីវិតនឹងការតស៊ូរបស់ខ្ញុំ ក៏ដូចជាការតស៊ូខិតខំប្រឹងប្រែងរបស់បងប្អូនជនរួមជាតិទម្រាំយើងបានមកដល់ដំណាក់កាលនេះ។ ដូច្នេះយើងមិនត្រូវបណោ្តយខ្លួនអោយរងគ្រោះថ្នាក់ដោយសារតែការធ្វេសប្រហែស និងការមើលស្រាលចំពោះស្ថានការនៃការឆ្លងរាតត្បាតជំងឺកូវីដ១៩នោះទេ។
សម្តេចក៏បានអរគុណបងប្អូនជនរួមជាតិក្នុងការចូលរួមថែរក្សាសន្តិភាព និងទប់ស្កាត់ការរីករាលដាលជំងឺឆ្លងកូវីដ១៩ នៅទូទាំងប្រទេស។ សូមជូនពរបប្អូនចៀសផុតពីជំងឺឆ្លងកូវីដ១៩ ទាំងអស់គ្នា។
សូមជម្រាបថា គិតមកត្រឹមថ្ងៃទី29 ឧសភានេះ កម្ពុជាមានអ្នកឆ្លងជំងឺកូវីដ១៩ សរុប១២៥នាក់ ប៉ុន្តែត្រូវបានព្យាបាលជាសះស្បើយចំនួន១២៣នាក់ នៅសល់២នាក់ កំពុងសម្រាកព្យាបាលនៅមន្ទីពេទ្យ៕ (កែសម្រួលដោយ ៖ បុប្ផា)
ចែករំលែកព័តមាននេះ